قازاق ۇلتتىق قىزدار پەداگوگيكالىق ۋنيۆەرسيتەتىنىڭ ستۋدەنتتەرى WikiGap Kazakhstan جوباسىنا قاتىسۋدا. بۇل جوبا ءتۇرلى سالا بويىنشا جەتىستىككە جەتكەن قازاقستاندىق ايەلدەر تۋرالى ونلاين كىتاپحانانى قۇرۋعا باعىتتالعان.
يگىلىكتى باستاما نيدەرلاندى كورولدىگىنىڭ قازاقستانداعى ەلشىلىگىنىڭ قولداۋىمەن وقۋ ورنى جانىنداعى الەۋمەتتىك جانە گەندەرلىك عىلىمي-زەرتتەۋلەر ينستيتۋتىندا جۇزەگە اسىرىلۋدا.
WikiGap Kazakhstan جوباسى سەگىز باعىتتى قامتيدى. اتاپ ايتقاندا, ءبىلىم, عىلىم, ونەر, ساياسات, بيزنەس, مەديا, ۇكىمەتتىك ەمەس سەكتور مەن سپورت سالاسىنداعى تانىمال 100 قازاقستاندىق ايەل تۋرالى اقپارات Wikipedia عالامتور ەنتسيكلوپەدياسىنا قازاق, ورىس جانە اعىلشىن تىلدەرىندە ورنالاستىرىلماق.
ۇيىمداستىرۋشىلاردىڭ ايتۋىنشا, جوبا بارىسىندا ستۋدەنتتەر وزدەرى جەتىك مەڭگەرگەن تىلدەردىڭ بىرىندە قاجەتتى مالىمەتتى دايىنداپ, ونلاين ەنتسيكلوپەدياعا ورنالاستىرادى. Wikipedia جەلىسىنە ماقالانى ورنالاستىرۋ ءۇشىن IT مامانداردىڭ ارنايى ترەنينگتەرى وتەدى. جوبا بيىلعى ناۋرىز ايىنا دەيىن جالعاسپاق. حالىقارالىق ايەلدەر كۇنى قارساڭىندا ارنايى جيىن ءوتىپ, جوباعا بەلسەندى قاتىسقاندار سەرتيفيكاتپەن جانە ۇسىنىس حاتپەن ماراپاتتالادى.
– بۇل جوبانىڭ قازاقستان ءۇشىن پايداسى كوپ دەپ ويلايمىز. باستى ماقسات – ەسىمى كوپشىلىك ءۇشىن بەيمالىم دەسە دە ءوز سالاسى بويىنشا تابىسقا جەتكەن نازىكجاندىلاردى كەڭىنەن ناسيحاتتاۋ, ينتەرنەت كەڭىستىكتە ولار تۋرالى اقپاراتتى قولجەتىمدى ەتۋ. وسىنداي يگىلىكتى ىسكە اتسالىسۋعا قىزدار ۋنيۆەرسيتەتىنىڭ ستۋدەنتتەرىن شاقىرامىز, - دەيدى الەۋمەتتىك جانە گەندەرلىك عىلىمي-زەرتتەۋلەر ينستيتۋتىنىڭ ماماندارى.
جاندار اسان