الماتى وبلىسىنىڭ قىتايمەن شەكارالاس اۋداندارىندا كورونوۆيرۋسقا قارسى ساقتىق شارالارى كۇن تارتىبىنەن تۇسكەن جوق.
ەكى ەل اراسىنداعى ساۋدا-ساتتىق الاڭىنا اينالعان «قورعاس» شەكارا ماڭى حالىقارالىق ىنتىماقتاستىق ورتالىعىنىڭ جۇمىسىنا ىندەت قاۋىپى تۋرالى اقپارات جاريا بولعان كۇننەن باستاپ شەكتەۋ قويىلعان ەدى. جاعداي تۇراقتانبايىنشا ول شەكتەۋدىڭ مەرزىمى ۇزارا بەرمەك. قازىر بۇل ورتالىقتىڭ ەسىگىنە 1 ناۋرىزعا دەيىن قارا ق ۇلىپ ىلىنگەن.
ال ەكىجاقتى بارىس-كەلىس نەگىزىنەن پانفيلوۆ اۋدانىنداعى شەكارا بەكەتتەرىندە جۇرەتىندىكتەن, بۇل جاقتاعى قاۋىپسىزدىك شارالارى جوعارى دەڭگەيگە كوتەرىلدى. جولاۋشىلاردىڭ ءارى-بەرى بەيساۋات وتۋىنە تىيىم سالىنىپ, اۋماقتاعى Nur joly جانە «التىنكول» وتكىزۋ بەكەتتەرىندەگى جۇمىس شەكتەلگەن. ەكى بەكەتتە دە سانيتارلىق-ەپيدەميولوگيا باقىلاۋ قىزمەتىنىڭ ماماندارى كۇشەيتىلگەن رەجىمدە كەزەكشىلىك ەتۋگە كوشكەن.
سونداي-اق توتەنشە جاعدايعا بايلانىستى جاركەنت قالاسىندا 100 ادامعا ارنالعان ارنايى سانيتارلىق وقشاۋلاۋ ورىنى دايىن تۇر. قاجەتتىلىك تۋا قالعان جاعدايعا ارنالعان تاعى 160 ورىن قوسىمشا قاراستىرىلىپتى. ارناۋلى ورىندار بارلىق سانيتار-ەپيدەميولوگ ماماندارمەن جانە مەديتسينالىق جابدىقپەن تولىق قامتاماسىز ەتىلگەن ەكەن.
كۇنى كەشە ەلىمىزدىڭ باس سانيتارى جانداربەك بەكشين ايماققا ارنايى كەلىپ, پانفيلوۆ اۋدانىنداعى ءۇش شەكارالىق وتكىزۋ بەكەتتەرىندە ورنالاسقان مەديتسينالىق پۋنكتەردىڭ جۇمىسىن تەكسەردى. ساپار بارىسىندا ول شەكارادان وتكەن جولاۋشىلاردى وقشاۋلاۋعا قاتىستى تالاپتىڭ كۇيشەيگەنىن ايتتى.
– اقپاننىڭ جيىرماسىنان باستاپ قىتايدان كەلگەن ادامداردىڭ بارلىعى 14 كۇنگە دەيىن ارنايى سانيتارلىق ورىنعا جىبەرىلەدى. ويتكەنى بۇل ۆيرۋستى جۇقتىرعان ادامنان بىردەن ەشقانداي سىرقات بەلگىلەرى بايقالماۋى مۇمكىن. كوروناۆيرۋستىڭ اعزاداعى جاسىرىن كەزەڭى 14 كۇننەن 24 كۇنگە دەيىن سوزىلۋ فاكتىسى انىقتالعان. جانە دە بۇل ازاماتتار 14 كۇن وقشاۋلاۋ ورتالىعىندا جاتىپ شىققاننان كەيىن دە قوسىمشا ون كۇن بويى ءبىزدىڭ باقىلاۋىمىزدا بولادى, – دەدى جانداربەك بەكشين.
الماتى وبلىسى