1979 جىلى اشىلعان تەڭىز مۇناي كەنىشى – الەمدەگى ەڭ تەرەڭ جانە ءىرى مۇناي كەنىشتەرىنىڭ ءبىرى. اتالعان كەنىشتە 1993 جىلى 6 ساۋىردە قازاقستان مەن «شەۆرون» كومپانياسى اراسىندا جاسالعان كەلىسىم نەگىزىندە قۇرىلعان «تەڭىزشەۆرويل» جاۋاپكەرشىلىگى شەكتەۋلى سەرىكتەستىگىندە بىلتىر مۇناي ءوندىرۋ كولەمى 29,79 ملن توننانى (237,7 ملن باررەل) قۇرادى.
جالپى, قازىرگى تاڭدا تشو سەرىكتەستەرى مەن ولاردىڭ ۇلەسىنە «شەۆروننىڭ» 50%-ى, «قازمۇنايگاز» ۇق اق-نىڭ 20%-ى, «ەكسونموبيل قازاقستان ۆەنچۋرس ينك.» كاسىپورنىنىڭ 25%-ى جانە «لۋكاركونىڭ» 5%-ى تيەسىلى. بارلانعان قورى جونىنەن تەڭىز كەنىشىندە 3,2 ملرد توننا (25,5 ملرد باررەل), ال كورولەۆ كەن الاڭىندا 200 ملن توننا (1,6 ملرد باررەل) شاماسىندا مۇناي بار دەپ ەسەپتەلىنەدى.
2019 جىلى تشو وندىرىلگەن گازدىڭ 98,7%-ىن كادەگە جاراتتى. سونداي-اق بىلتىر كاسىپورىندا سۋدى قايتا پايدالانۋ كورسەتكىشى 40%-دى قۇرادى. تشو تۇرمىستىق اعىن سۋلاردى كادەگە جاراتۋ, وندىرىستىك ماقساتتا تازارتۋ جانە قايتا پايدالانۋ ارقىلى سۋدى ۇنەمدەۋ بويىنشا ءىس-شارالاردى جۇرگىزۋدى جالعاستىرۋدا. تشو قالدىقتاردىڭ 35-تەن اسا ءتۇرىن قايتا وڭدەۋگە جىبەرەدى. 2019 جىلى قالدىقتاردى قايتا وڭدەۋدىڭ جالپى كورسەتكىشى 64%-دى قۇرادى.
بىلتىر كومپانيا سۇيىتىلعان گاز ساتۋ كولەمىن شامامەن 1,3 ملن توننادان اسىرىپ, قۇرعاق گاز ساتۋ كولەمىن 7,9 ملرد تەكشە مەتر, ال كۇكىرت ساتۋ كولەمىن 2,6 ملن توننادان اسىردى. سونداي-اق وتكەن جىلى تشو-نىڭ قازاقستانعا تولەگەن تىكەلەي قارجى كولەمى 10,6 ملرد دوللاردان استى. 2019 جىلى كومپانيا قازاقستاندىق تاۋارلار مەن قىزمەتتەردى پايدالانۋعا 4,6 ميلليارد دوللار شاماسىندا قارجى جۇمسادى.
بىلتىر «يگىلىك» ەرىكتى الەۋمەتتىك ينفراقۇرىلىم باعدارلاماسىنىڭ بيۋدجەتى 25 ميلليون دوللاردى قۇرادى. اتالعان قارجىنىڭ نەگىزگى ۇلەسى اتىراۋ وبلىسىندا بالاباقشالار, مەكتەپتەر جانە باسقا دا الەۋمەتتىك نىسانداردىڭ قۇرىلىسىنا جۇمسالۋدا. سونىمەن بىرگە اتىراۋ جانە ماڭعىستاۋ وبلىستارىنىڭ دەنساۋلىق ساقتاۋ, ءبىلىم بەرۋ سالالارىنا قولداۋ كورسەتۋ جانە الەۋمەتتىك كاسىپكەرلىكتى دامىتۋ ماقساتىندا الەۋمەتتىك ينۆەستيتسيالار باعدارلاماسى اياسىندا 2 ميلليون دوللاردان استام قارجى ءبولدى.
2016 جىلى تشو سەرىكتەستەرى تەڭىز كەن ورنىنىڭ وندىرىستىك قۋاتىن ارتتىرۋدىڭ كەلەسى كەزەڭى سانالاتىن كەلەشەك كەڭەيۋ جوباسى مەن ۇڭعى ەرنەۋىندەگى قىسىمدى باسقارۋ جوباسىن (ككج-ۇەقبج) قارجىلاندىرۋعا قاتىستى قورىتىندى شەشىمنىڭ قابىلدانعانىن حابارلاعان بولاتىن. ساتىمەن جۇزەگە اسقان شيكى گاز ايداۋ/ەكىنشى بۋىن زاۋىتى جوباسىنا نەگىزدەلگەن كەلەشەك كەڭەيۋ جوباسى مۇناي ءوندىرۋ كولەمىن جىلىنا شامامەن 12 ملن تونناعا نەمەسە تاۋلىگىنە 260 مىڭ باررەلگە ارتتىرماق. مۇناي ءوندىرۋدىڭ جالپى كولەمى جىلىنا شامامەن 39 ملن توننانى نەمەسە تاۋلىگىنە 850 مىڭ باررەلدى قۇرايدى. ال ۇەقبج كەنىشتەگى ۇڭعى ەرنەۋىندەگى قىسىمدى تومەندەتىپ, ءونىم زاۋىتقا جەتكەن كەزدە قولدانىستاعى التى تەحنولوگيالىق جەلىنىڭ كىرەبەرىسىندەگى قىسىمدى كوتەرۋ ارقىلى تەڭىز كەن ورنىنداعى زاۋىتتاردى تولىق قۋاتتا ۇستاپ تۇراتىن بولادى. ەل اۋماعىندا ككج-ۇەقبج اياسىندا 41 مىڭنان استام قازاقستاندىق ازامات ەڭبەك ەتەدى, بۇل قازاقستانداعى جالپى جوبا قىزمەتكەرلەرى سانىنىڭ 91 پايىزىن قۇرايدى. تشو قازاقستاندىق كومپانيالاردى ككج-ۇەقبج اياسىنداعى جوبالاۋ, ساتىپ الۋ, مودۋل جاساۋ جۇمىستارىنا جۇمىلدىردى جانە 2 200-دەن استام قازاقستاندىق كومپانيانى الدىن الا ىرىكتەۋدەن جانە 1 200-دەن استام كومپانيانى الدىن الا كۆاليفيكاتسيالىق باعالاۋدان وتكىزدى. جوبا باسىنان بەرى ككج-ۇەقبج اياسىندا قازاقستاندىق قامتۋعا جۇمسالعان قارجىنىڭ جالپى كولەمى شامامەن 8,4 ملرد دوللاردى قۇرادى.