19 اقپان كۇنى ەلوردا تۇرعىندارى مەن قوناقتارىنىڭ نازارىنا دج.ۆەرديدىڭ عالامات «دون كارلوس» وپەراسى ۇسىنىلادى. العاش رەت پاتشايىم ەليزاۆەتا ۆالۋانىڭ باستى پارتياسىندا «استانا وپەرا» ۇلكەن زالى ساحناسىنا تەاتردىڭ ايگىلى جەتەكشى ءسوليسى قازاقستاننىڭ ەڭبەك سىڭىرگەن ءارتىسى, مەملەكەتتىك سىيلىقتىڭ لاۋرەاتى مايرا مۇحامەدقىزى شىعادى. بۇل تۋرالى «استانا وپەرا» تەاترىنىڭ ءباسپاسوز قىزمەتى حابارلادى.
– ەليزاۆەتا پارتياسىندا ۆوكال دا, اكتەرلىك شەبەرلىك تە كۇردەلى. پاتشايىم بولعان قانداي؟ ياعني, بۇل سىمباتتىلىقتى, قيمىل-قوزعالىستىڭ ايرىقشا يكەمدىلىگىن, كەربەزدىگىن قاجەت ەتەدى. ەليزاۆەتا جاس, اقىلدى, وكتەم جان, كورەرمەن مەنىڭ پاتشايىم ەكەنىمە سەنەتىندەي ەتىپ بەينەنى جاساۋىم كەرەك. وسى پارتياعا دەيىن مەنىڭ رەپەرتۋارىمدا تەك عاشىق نەمەسە قازا بولاتىن قىزدار عانا بولدى. قازىر ءوز بەينەمدى ىزدەۋدەمىن. ول نە تۋرالى ويلايتىنىن, ونىڭ قانداي سەزىمدە بولعانىن تۇسىنگىم كەلەدى. ەليزاۆەتا – ازاپ شەگۋشى ايەل – دون كارلوستى جان-تانىمەن سۇيەدى, بىراق پاتشانىڭ الدىندا ءوزىنىڭ ادالدىعىن, ار-نامىسىن ساقتايدى. دايىندىق جاساپ ءجۇرىپ, مەن ولاردىڭ ءومىرى قانداي قيىن بولعان دەپ ويلانامىن. مىسالى, بۇكىل الەم فيليپپ پاتشانىڭ اياعىنىڭ استىندا, بىراق ونى ەشكىم جاقسى كورمەگەندىكتەن, ول ازاپ شەگەدى. وسىنداي ساتتەردە مەن ءوزىمدى باقىتتى وپەرا ءانشىسى سانايمىن. سەبەبى ءارتۇرلى كەيىپكەرلەردىڭ تاعدىرىن باستان وتكىزىپ, قايتا ءوزىمنىڭ قالپىما كەلە الامىن, – دەدى مايرا مۇحامەدقىزى.
باس پارتيالاردا «استانا وپەرانىڭ» جەتەكشى سوليستەرى ونەر كورسەتەدى: فيليپپ II – ارمەنيانىڭ حالىق ءارتىسى بارسەگ تۋمانيان, دون كارلوس – قازاقستاننىڭ ەڭبەك سىڭىرگەن قايراتكەرى, يتاليا جۇلدىزى وردەنىنىڭ كاۆالەرى مەدەت چوتاباەۆ, رودريگو – قازاقستاننىڭ ەڭبەك سىڭىرگەن قايراتكەرى تالعات مۇساباەۆ جانە تەاتر سوليستەرى: ۇلى ينكۆيزيتور – بولات ەسىمحانوۆ, حانشايىم ەبولي – تاتيانا ۆيتسينسكايا, موناح – شىڭعىس راسىلحان, تەبالدو – ءمادينا يسلاموۆا, اسپان داۋىسى – ەلەنا گانجا, گراف دي لەرما – ەرۇلان كامەل, گەرولد – رامزات بالاكيشيەۆ.
«استانا وپەرا» سيمفونيالىق وركەسترى, حورى, بالەتى, ميمانس ارتىستەرى, مۋزىكالىق جەتەكشى – تەاتردىڭ باس ديريجەرى, قازاقستاننىڭ ەڭبەك سىڭىرگەن قايراتكەرى, مەملەكەتتىك سىيلىقتىڭ لاۋرەاتى الان بورىباەۆ. قويۋشى رەجيسسەر, ستسەنوگراف – وپەرا الەمىنىڭ ەڭ بەدەلدى Opera Star Award 2019 ماراپاتىنىڭ يەگەرى داۆيدە ليۆەرمور. ستسەنوگرافيا – Gio Forma ستۋدياسى, كوستيۋمدەر بويىنشا سۋرەتشىلەر – قازاقستاننىڭ ەڭبەك سىڭىرگەن قايراتكەرلەرى سوفيا تاسماعامبەتوۆا, پاۆەل دراگۋنوۆ, باس حورمەيستەر – قازاقستاننىڭ ەڭبەك سىڭىرگەن قايراتكەرى ەرجان ءداۋىتوۆ.
فريدريح شيللەردىڭ اتتاس دراماسى بويىنشا ليبرەتتوسىن جوزەف مەري مەن كاميل ديۋ لوكل جازعان. الەمدىك پرەمەراسى 1867 جىلى 11 ناۋرىزدا پاريجدە ورىن العان, ال «استانا وپەراداعى» قويىلىم پرەمەراسى جەتىنشى تەاتر ماۋسىمى اياسىندا 2019 جىلدىڭ قازان ايىندا وراسان زور تابىسپەن ءوتتى.