2020 جىلعى 14 اقپاندا باس قالانىڭ دوستىق ۇيىندە قازاقستان حالقى اسسامبلەياسى توراعاسىنىڭ ورىنباسارى – حاتشىلىق مەڭگەرۋشىسى جانسەيىت تۇيمەباەۆتىڭ نۇر-سۇلتان قالاسىنىڭ قازاقستان حالقى اسسامبلەياسى حاتشىلىعى مەن قۇرىلىم مۇشەلەرى, ەتنومادەني بىرلەستىكتەردىڭ توراعالارىمەن كەزدەسۋى ءوتتى.
جيىنعا قحا توراعاسىنىڭ ورىنباسارلارى يۋ.كەليگوۆ پەن ش.پۋلاتوۆ, نۇر-سۇلتان قالاسى اكىمىنىڭ ورىنباسارى ب.ماكەن, قحا مۇشەلەرى مەن ەتنوبىرلەستىكتەردىڭ جەتەكشىلەرى قاتىستى.
كەزدەسۋ بارىسىندا اسسامبلەيا توراعاسىنىڭ ورىنباسارى مەملەكەتىمىزدىڭ كونستيتۋتسياسى ۇلتى, ءناسىلى, ءدىنى مەن باسقا دا وزگەشەلىكتەرىنە قاراماستان, ءوزىنىڭ بارلىق ازاماتتارىنىڭ مۇددەلەرىن قورعاۋعا كەپىلدىك بەرەتىنىن اتاپ ءوتتى.
قحا ۇلتتىق بىرلىكتىڭ مەملەكەتتىك ساياساتىنىڭ سەنىمدى تىرەگى بولا تۇرىپ, تۇراقتىلىقتى نىعايتۋدا ماڭىزدى ءرول اتقارادى.
جامبىل وبلىسى قورداي اۋدانىنداعى وقيعادا اسسامبلەيا شەت قالماي, كيكىلجىڭدى شۇعىل شەشۋ ءۇشىن العاشقى مينۋتتاردا-اق بىرقاتار جۇمىستار اتقارعان بولاتىن.
ج.تۇيمەباەۆ قىلمىستا ۇلت جوق ەكەندىگىن اتاپ ءوتتى. بارلىق كىنالىلەر زاڭعا سايكەس جاۋاپقا تارتىلادى.
سونىمەن قاتار ول كيكىلجىڭنىڭ سەبەپتەرىنە توقتالا وتىرىپ, مەملەكەتتىڭ اتالعان ماسەلە بويىنشا تولىق تۇسىنىگى مەن ونىڭ شەشۋ الگوريتمىنىڭ بار ەكەندىگىن ايتا كەتتى.
كەزدەسۋ بارىسىندا «بىرلىك كوپتۇرلىلىكتە» ءپرينتسيپى نەگىزىندە قوعامدىق كەلىسىم مەن ۇلتارالىق بىرلىكتى نىعايتۋ, ەتنوسارالىق قاتىناستىڭ نەگىزى رەتىندە – مەملەكەتتىك ءتىلدى ۇيرەنۋ, جالپىۇلتتىق تاريحي سانانىڭ دامۋى جانە ت.ب. بويىنشا بىرقاتار مىندەتتەر قويىلدى.