شىمشاھار اكىمى مۇرات ايتەنوۆ قالا تۇرعىندارىنا ەسەپ بەردى

«شىمكەنت قالاسى تمد ەلدەرىنىڭ مادەني استاناسى اتاندى. بيىل شىمكەنتتىڭ 2200 جىلدىق مەرەيتويى وتەدى. ونى يۋنەسكو-نىڭ مەرەيتويلار تىزىمىنە ەنگىزۋ تۋرالى ۇسىنىس بەرىلدى. پرەزيدەنت ءوز جولداۋىندا اكىمدەرگە حالىقتى مازالايتىن پروبلەمالاردى جەدەل شەشۋدى تاپسىردى.

وسى ماقساتتا بيزنەستى قولداۋ, جاڭا جۇمىس ورىندارىن اشۋ بويىنشا كوپ جۇمىس ىستەۋ قاجەت. ينفراقۇرىلىم, باسپانا, ءبىلىم جانە مەديتسينا, قاۋىپسىزدىك سالاسى دا نازاردان تىس قالمايدى», دەدى قالا اكىمى.

م.ايتەنوۆ 2019 جىلى اۋقىمدى جۇمىس اتقارىلىپ, ماقساتتى ينديكاتورلارعا قول جەتكىزىلگەنىن ايتتى.

«ونەركاسىپ ءونىمى 2018 جىلمەن سالىستىرعاندا 15 پايىزعا ءوستى. اۋىل شارۋاشىلىعى ءونىمى 6,3 پايىزعا, جاڭا تۇرعىن ۇيلەر 19,2 پايىزعا, ال, بولشەك ساۋدا 7,1 پايىزعا كوبەيدى. رەسپۋبليكا بويىنشا يندۋستريالدى-يننوۆاتسيالىق دامۋ باعدارلاماسى ىسكە اسىرىلۋدا. شىمكەنتتە باعدارلاما اياسىندا 3 جىلدا 24 كاسىپورىن اشىلدى. 1300 تۇراقتى جۇمىس ورنى پايدا بولدى. قازىر قالادا 2 يندۋستريالدى ايماق بار. بىراق, وندا بوس جەر جوق. ەلەكتر قۋاتى جەتپەيدى. گاز قىسىمى تومەن. بۇل پروبلەمالار ءوندىرىستى دامىتۋعا كەدەرگى كەلتىرەدى. وسى ماقساتتا الداعى 3 جىلدا جاڭادان 2 يندۋستريالدى ايماق اشىلادى», دەدى شاھار باسشىسى.

قالادا ينجەنەرلىك ينفراقۇرىلىم وزەكتى ماسەلە. قالا اكىمى ونىڭ بىرنەشە سەبەبى بار ەكەنىن ايتتى. حالىق سانى جەدەل وسۋدە. جاڭادان 41 ەلدىمەكەن قالاعا قوسىلدى. ماگيسترالدى جۇيەلەر جوق. اكىم وسىنىڭ بارىنە قاراماي ينفراقۇرىلىم بارىنشا دامىتىلاتىنىن ايتتى.

اتاپ ايتقاندا, جولداردىڭ وتكىزۋ قابىلەتىن كوتەرۋ ءۇشىن 13 ماگيسترالدى جول قايتا قۇرىلادى. 2 ۇلكەن جولايىرىق پەن 5 كوپىر سالىنادى. قوناەۆ داڭعىلىنىڭ جالعاسى, ا-2 اينالما جولى, №1 اۆتوجول, ادىربەكوۆ كوشەسىن قايتا قۇرۋ, ءال-فارابي كوشەسىنىڭ جالعاسىن سالۋ جوسپارلانۋدا.

«قازىر قالانىڭ سولتۇستىك شاعىن اۋداندارىندا اۋىز سۋ قۇبىرىنىڭ قۋاتى جەتىسپەيدى. پروبلەمانى شەشۋ ءۇشىن 3 ماگيسترالدى قۇبىر سالۋ قاجەت. قالاداعى 81 ەلدىمەكەننىڭ 63-ءى اۋىز سۋمەن تولىق قامتىلعان. 10-ى جارتىلاي. 8 ەلدى مەكەن تاسىپ ىشەدى. قامتىلۋى 94,7 پايىز. بيىل قالالىق بيۋدجەتتەن 441 ملن. تەڭگە قارالدى. 8 ەلدىمەكەندى سۋمەن قامتيتىن 2 ماگيسترالدى قۇبىر قۇرىلىسى باستالادى. قازىر مەردىگەر انىقتالۋدا. سونىمەن قاتار شەتكى 5 ەلدىمەكەندى سۋمەن قامتيتىن ماگيسترالدى قۇبىر سالىنۋدا. ناتيجەسىندە سۋدى تاسىپ ىشەتىن 8 ەلدىمەكەننىڭ ماسەلەسى تولىق شەشىلەدى.الداعى 3 جىل ىشىندە جارتىلاي قامتىلعان 10 ەلدى مەكەننىڭ پروبلەماسى دا شەشىمىن تابادى. قالاعا جەتىسپەيتىن 90 شاقىرىم ماگيسترالدى سۋ قۇبىرى دا تارتىلادى», - دەدى م.ايتەنوۆ.

كەزدەسۋدە تۇرعىندار وزدەرىن مازالاعان ماسەلەلەر بويىنشا ساۋالدارىن قويدى. مۇرات دۇيسەنبەك ۇلى تۇرعىنداردىڭ ساۋالدارىنا تولىق ءارى جان-جاقتى جاۋاپ بەرۋدە.

سونداي-اق, شاھار باسشىسى ەسەپتى كەزدەسۋ اياقتالعاننان كەيىن «كورمە» ورتالىعىندا تۇرعىنداردىڭ ماسەلەلەرى بويىنشا كەشكە دەيىن جەكە  قابىلداۋ وتكىزەتىندىگىن جەتكىزدى.

شىمكەنت