ماجىلىستە مارات وسپانوۆقا ارنالعان كىتاپتىڭ تۇساۋكەسەرى ءوتتى

ءىس-شاراعا ءماجىلىس توراعاسى نۇرلان نىعماتۋلين, پارلامەنت دەپۋتاتتارى, قوعام قايراتكەرلەرى جانە م. وسپانوۆتىڭ وتباسى, تۋعان-تۋىستارى جانە جاقىندارى قاتىستى.

-مارات وسپانوۆ تۋرالى ەستەلىكتەر ءبىزدىڭ قازاقستانىمىزدىڭ ەگەمەندى ەل اتانعان تاريحي كەزەڭىمەن قاتار جۇرەدى. سەبەبى مارات تۇردىبەك ۇلى تۇڭعىش پرەزيدەنتىمىز, ەلباسى نۇرسۇلتان ءابىش ۇلى نازارباەۆتىڭ سەنىمدى سەرىگى بولا ءجۇرىپ, تاۋەلسىزدىككە جەتۋ, ونى قالىپتاستىرۋ جانە دامىتۋ جولىندا ايانباي ەڭبەك ەتتى, دەدى نۇرلان نىعماتۋلين.

مارات وسپانوۆتىڭ مول ءبىلىمىن, ەرەكشە قابىلەتىن, باتىل مىنەزى مەن ۇلكەن ساياسات جولىندا ەڭبەك ەتىپ, وتاندىق پارلامەنتاريزمدى دامىتۋعا زور ۇلەس قوسقانىن العا تارتقان ءماجىلىس توراعاسى ونىڭ ەڭبەك جولى ۇرپاققا ۇلگى بولاتىنىن ايتتى.

مارات وسپانوۆ باسقارعان جىلدارى پارلامەنت جان-جاقتى جانە تابىستى ەڭبەك ەتتى. وسى جىلداردا پارلامەنت 400-دەن استام زاڭ قابىلدادى. سول ۋاقىتتا قابىلدانعان بارلىق زاڭداردا, سونىڭ ىشىندە, ەكونوميكالىق قۇجاتتاردا مارات تۇردىبەك ۇلىنىڭ قوسقان ۇلەسى زور جانە ەرەكشە. ول تەك زاڭ شىعارۋ قىزمەتىمەن اينالىسىپ قانا قويماي, قوعامدىق جۇمىسىنا دا, سونىڭ ىشىندە, مادەنيەت, سپورت سالاسىن نىعايتۋعا بەلسەنە ارالاستى. مارات وسپانوۆ – بۇكىل ءومىرىن ەگەمەن ەلىمىزدىڭ دامۋىنا ارناعان بىلىكتى ساياساتكەر, ىسكەر باسشى, قايراتكەر تۇلعا, دەدى پالاتا سپيكەرى.

م. وسپانوۆپەن بىرگە جۇمىس ىستەگەن ارىپتەستەرى مەن دوستارىنىڭ ەستەلىكتەرى, ماجىلىستە ۇيىمداستىرىلعان فوتوكورمە اياسىندا ءومىرىنىڭ جارقىن ساتتەرىن بەينەلەيتىن كوپتەگەن فوتوسۋرەتتەر ونىڭ جوعارى ادامگەرشىلىك جانە كاسىبي قاسيەتتەرىن ەسكە سالدى.

ايتا كەتەيىك, مارات تۇردىبەك ۇلى وسپانوۆ (17.09.1949 – 23.01.2000) – قازاقستان رەسپۋبليكاسى پارلامەنت ءماجىلىسىنىڭ العاشقى توراعاسى. ءتورت شاقىرىلىم دەپۋتاتى: قازاق كسر-ءى جوعارى كەڭەسىنىڭ حII-حIII شاقىرىلىمى جانە I جانە II شاقىرىلىمداعى قازاقستان رەسپۋبليكاسىنىڭ پارلامەنتى ءماجىلىسىنىڭ دەپۋتاتى. ەكونوميكا عىلىمدارىنىڭ دوكتورى. قازاقستان رەسپۋبليكاسى سالىق كودەكسىنىڭ, تاۋەلسىز قازاقستاننىڭ دەكلاراتسياسىن ازىرلەۋگە اتسالىسقان. 2-دارەجەلى «بارىس» وردەنىمەن ماراپاتتالعان.