«ەڭبەك» مەملەكەتتىك باعدارلاماسى اياسىندا وتكەن جىلى 1212 ەلوردالىق گرانت الدى. ونىڭ ىشىندە: جاستار – 858, كوپبالالى وتباسىلار – 6, مۇگەدەكتەر – 59, ااك الۋشىلار – 33 ادام ءوز بيزنەسىن ىسكە قوستى. بۇل تۋرالى نۇر-سۇلتان قالاسى اكىمدىگىنىڭ ءباسپاسوز قىزمەتى حابارلادى.
مەملەكەتتىك باعدارلاما ەڭبەك نارىعىندا سۇرانىسقا يە كاسىبي داعدىلار مەن بىلىكتىلىك الۋدىڭ ءتيىمدى جۇيەسىن قۇرۋعا, جاپپاي كاسىپكەرلىكتى دامىتۋعا, حالىقتىڭ الەۋمەتتىك وسال توپتارىن قولداۋدى قوسا العاندا, ەڭبەك دەلدالدىعىنىڭ ءتيىمدى مودەلىن قۇرۋعا باعىتتالعان.
اتالمىش باعدارلاما نەگىزىندە كاسىبىن دوڭگەلەتكەن ادامداردىڭ ءبىرى – ارتەم ارەشكين. ول وتكەن جىلدىڭ ساۋىرىندە حالىقتى جۇمىسپەن قامتۋ ورتالىعىنا جۇگىنىپ, جاڭا بيزنەس-يدەيالاردى ىسكە اسىرۋ ءۇشىن مەملەكەتتىك گرانت باعدارلاماسىنا قاتىسۋعا شەشىم قابىلدادى. وسىلايشا, «ەلەكتروتەحنيكالىق جانە مونتاجداۋ جۇمىستارى» بيزنەس-يدەياسىن ۇسىنىپ, 252 500 تەڭگە كولەمىندە گرانت الدى. بۇگىنگى كۇنى جاس كاسىپكەردىڭ Retro Light قىزمەتتەرى نارىقتا سۇرانىسقا يە.
سونداي-اق باعدارلاما باعىتتارى بويىنشا جوعارى وقۋ ورنىن بىتىرگەن جاستارعا دا قولداۋ كورسەتىلەدى. ەكى جىل بۇرىن اينۇر مۇقاشوۆا س.سەيفۋللين اتىنداعى قازاق اگروتەحنيكالىق ۋنيۆەرسيتەتىن ساۋلەت ماماندىعى بويىنشا تامامداعان. «مەن وتكەن جىلدىڭ 4 اقپانىندا حالىقتى جۇمىسپەن قامتۋ ورتالىعىنا جۇگىندىم. «ەڭبەك» مەملەكەتتىك باعدارلاماسى اياسىندا ءوتىنىش بىلدىرگەن كۇنى «گرۋپپا كومپاني تابىس پليۋس» جشس جاستار تاجىريبەسىن وتۋگە جىبەرىلدىم. قازىر, مىنە, ساۋلەتشى رەتىندە جۇمىس ىستەپ جاتىرمىن. سول ءۇشىن العىس بىلدىرەمىن, ويتكەنى وسى باعدارلاما تاجىريبە الۋعا جانە كەيىننەن ماماندىعى بويىنشا جۇمىسقا ورنالاسۋعا مۇمكىندىك بەردى», دەدى ول. ودان بولەك, «ەڭبەك» باعدارلاماسى اياسىندا بولاشاق كاسىپكەرلەرگە شاعىن نەسيە بەرىلەدى.
«مەن ۋنيۆەرسيتەتتى بىتىرگەن سوڭ وتباسىلىق بيزنەستى ودان ءارى دامىتۋدى شەشتىم. «ەڭبەك» مەملەكەتتىك باعدارلاماسى تۋرالى بىلگەننەن كەيىن كاسىپكەرلىك قىزمەت نەگىزدەرىنە وقىتۋ كۋرسىنا جازىلدىم. اۆتوبولشەكتەردى ساتۋ نارىعىن زەردەلەي وتىرىپ, ءوز ءىسىمدى كەڭەيتۋدى ۇيعاردىم. وسىلايشا, ساۋدا جاساۋ ءۇشىن شاعىن نەسيە الدىم. قازىرگى ۋاقىتتا قالا بويىنشا 3 ساۋدا نۇكتەمىز جۇمىس ىستەيدى, بيزنەس تۇراقتى تابىس اكەلەدى. اۆتو بولشەكتەر مەن ساتىلىمدارعا دەگەن سۇرانىس وسۋدە. سونداي-اق بيزنەستى كەڭەيتۋ وعان حالىق ءۇشىن جاڭا جۇمىس ورىندارىن اشۋعا مۇمكىندىك بەردى», دەدى كاسىپكەر باقىت قاجىمۇقان.
ايتا كەتسەك, وسى جىلدىڭ 1 قاڭتارىنان باستاپ ءونىمدى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان «ەڭبەك» مەملەكەتتىك باعدارلاماسىنا جاڭا ەنگىزىلىمدەر كۇشىنە ەندى.
قازىرگى كەزدە كاسىپتىك وقىتۋ وقىتىلعان ادامداردى جۇمىسقا ورنالاستىرۋعا كەپىلدىك بەرەتىن جۇمىس بەرۋشىلەردىڭ وتىنىمدەرى بويىنشا جۇزەگە اسىرىلادى.⠀سونداي-اق كوپبالالى جانە تابىسى از وتباسى مۇشەلەرىن كاسىپكەرلىككە تارتۋ ءۇشىن ولارعا ميكروكرەديتتەر جىلدىق 4% - دان اسپايتىن پايىزدىق مولشەرلەمەمەن 7 جىلعا دەيىنگى مەرزىمگە بەرىلەتىن بولادى.⠀
جاڭا ەرەجەگە ساي, حالىقتىڭ بارلىق ساناتتارى ءۇشىن بىرىڭعاي مەملەكەتتىك گرانتتاردىڭ مولشەرى 200 اەك-ءتى قۇرادى. سونىمەن بىرگە كوپبالالى جانە تابىسى از وتباسىلاردىڭ مۇشەلەرى الدىن الا وقىتۋسىز گرانت الۋعا قۇقىلى.⠀
وسى جىلدان باستاپ جاستار تاجىريبەسىنە ء«بىرىنشى جۇمىس ورنى» جانە «ۇرپاقتار كەلىسىمشارتى» جوبالارى ەنگىزىلدى. ءبىرىنشى جوبا بويىنشا 29 جاستان اسپاعان, ونىڭ ىشىندە NEET ساناتىنداعى ازاماتتارعا, جۇمىس تاجىريبەسى جوق, ءبىلىم بەرۋ ۇيىمدارىنىڭ تۇلەكتەرىنە, ەڭبەككە جارامدى مۇگەدەكتەرگە ءبىرىنشى جۇمىس ورنىنا جۇمىسقا ورنالاسۋعا مۇمكىندىك بەرىلەدى. ەكىنشى جوبا زەينەتكەرلىك جاسقا جەتكەن جۇمىس ىستەيتىن قىزمەتكەردى كەيىننەن اۋىستىرا وتىرىپ, جۇمىسقا ورنالاستىرۋدى كوزدەيدى.