مەملەكەت باسشىسى قاسىم-جومارت توقاەۆتىڭ باستاماسىمەن 2020 جىل ۆولونتەر جىلى دەپ جاريالانعانى بەلگىلى. تاياۋدا پرەزيدەنتتىڭ قاتىسۋىمەن «Birgemiz» اتتى رەسپۋبليكالىق ۆولونتەرلەر فرونت-ءوفيسىنىڭ اشىلۋ ءراسىمى ءوتتى. وسى سالاداعى جوبالاردى ۇيلەستىرىپ, قوعامدىق مونيتورينگ جاساپ, وقىتۋ, ناسيحاتتاۋ جۇمىسىن جۇرگىزەتىن ورتالىقتىڭ جۇمىسىنا قاتىستى جۇرتشىلىق ءوز پىكىرلەرىن ءبىلدىرىپ جاتىر. سولاردىڭ بىرقاتارىن وقىرمان نازارىنا ۇسىنۋدى ءجون كوردىك.
«جەتىم كورسەڭ, جەبەي ءجۇر...»
«Birgemiz Sabaqtastyq» جالپىحالىقتىق جوباسى – تالىمگەرلىك جونىندەگى باعدارلاما. بۇل جوبا وسىدان 5 جىل بۇرىن تالىمگەرلىكتى قولعا العان «دارا» قايىرىمدىلىق قورىنىڭ جۇمىسىمەن ۇيلەسەدى. ءبىز جەتىمدەر ۇيىندە اتا-اناسىنىڭ قامقورلىعىنسىز قالعان بالالارعا, جاسوسپىرىمدەرگە, قيىن ءومىر جاعدايىن باستان كەشىپ جاتقان بالدىرعاندارعا قول ۇشىن سوزامىز.
جەتىمدەر ۇيىنە سىيلىقپەن بارعان ادام جاقسىلىق جاسادىم دەپ ويلاسا, ول مۇلدە قاتەلەسەدى. ءبىز بار بولعانى اياۋشىلىق تانىتىپ, «سىيلىق جاسادىم» دەگەن ويمەن ءوز-ءوزىمىزدى جاقسى سەزىنەمىز. بالالار سىيلىققا مۇقتاج ەمەس. ءوز اۋىزدارىنان ەستىدىم. جەتىمدەر ءۇيىنىڭ ءبىر تاربيەلەنۋشىسى باق وكىلدەرىنە بەرگەن سۇحباتىندا: «جاڭا جىل مەرەكەسىندە ءتاتتى كامپيت ۇلەستىرگەن كەزدە ءار بالدىرعانعا كەمى 70 كەلىدەن بۇيىرادى. بىزگە سول كامپيت كەرەك دەپ ويلايسىز با؟ جوق. بىزگە كوڭىل كۇيىمىزدى سۇرايتىن, جان-دۇنيەمىزدە نە بولىپ جاتقانىن تىڭداعىسى كەلەتىن ادام كەرەك», دەگەن ەدى. ولار دۇنيە-م ۇلىككە, قىزىلدى-جاسىلدى زاتتارعا ەمەس, مەيىرىمگە ءزارۋ.
اسىراپ الۋشىلار كوبىنە-كوپ 10 جاسقا تولماعان بالالاردى قاناتىنىڭ استىنا العىسى كەلەدى. ودان ەرەسەكتەرىنە يە بولا المايمىز دەپ توپشىلاۋى مۇمكىن. مىنە ءبىز سول 10 جاستان اسقان بالالارعا قامقورلىق تانىتامىز. ولاردى ورتاعا بەيىمدەۋگە تىرىسامىز. تالىمگەر ءوز جەتىستىگىن ۇلگى ەتە وتىرىپ, تاربيەلەنۋشىگە ماماندىق تاڭداۋعا, قىزمەتكە ورنالاسۋعا قاتىستى دۇرىس جول نۇسقاۋعا تىرىسادى.
ءبىز الماتى, نۇر-سۇلتان, پاۆلودار, قاراعاندى, اقتاۋ, ورال, سەمەي, شىمكەنت, تەمىرتاۋ سىندى 9 قالادا جۇمىس جۇرگىزىپ جاتىرمىز. بارلىعى 134 تالىمگەرىمىز بار. اشىعىن ايتايىن, كەز كەلگەن ادام تالىمگەر بولا المايدى. وعان تالىمگەر بولۋعا ۇمىتكەر ازاماتتىڭ ارنايى پسيحولوگيالىق پورترەتى سايكەس كەلۋى, پسيحولوگيالىق وقۋدان ءوتۋى كەرەك. بالالارمەن قۇر ويناۋعا, سىيلىق جاساۋعا ۇمتىلعان ادامدار تالىمگەر بولا المايدى. ومىردە كورگەن-تۇيگەنى مول, ايرىقشا كوزقاراستاعى ادامداردى تالىمگەر رەتىندە قابىلدايمىز. ءار ۆولونتەر-تالىمگەر 1 بالامەن كەمى 2 جىل جۇمىس ىستەۋى تۋرالى شارتقا قول قويادى. 1 جىلدان كەيىن تالىمگەرگە بالا دا باۋىر باسىپ ۇلگەرەدى. كەيىن بۇل باۋىرمالدىق ءومىر بويىنا ۇلاسۋى مۇمكىن.
سونىمەن قاتار بىزدە كورپوراتيۆتى تالىمگەرلىك دەگەن باعىت تا بار. قازاقستاندىق جانە حالىقارالىق ۇيىمداردىڭ قىزمەتكەرلەرى ارقىلى ءىس-ارەكەتكە, كاسىپكە, جۇمىسقا داعدىلايمىز. ماسەلەن, جەتىمدەر ۇيىندەگى تاربيەلەنۋشىلەر ءومىر داعدىسىنا, ورتاعا بەيىمدەلۋى قاجەت. قاراپايىم مىسال – جۇمىسقا قانداي كيىم كيىپ بارۋ كەرەكتىگىنە دەيىن ۇعىندىرامىز. بىزگە سونىڭ بارلىعىن اتا-انامىز ۇيرەتتى. ۇيرەتپەسە, باقىلاي ءجۇرىپ تۇسىندىك. ال جەتىمدەر ۇيىندەگى بالالاردىڭ اتا-انالارى مۇلدە جوق نەمەسە ناشاقورلىققا, ىشىمدىككە سالىنىپ كەتكەن. تۇرمەدە وتىرعاندارى دا بار. سوندىقتان ونداي بالالاردى ومىرگە بەيىمدەۋ – اۋاداي قاجەت دۇنيە.
الداعى جوسپارىمىز – بۇگىنگى جەتكەن جەتىستىگىمىزدى لايىقتى جالعاستىرۋ. سونداي-اق اتىراۋ, شىمكەنت قالالارىندا تالىمگەرلەردى دايىنداۋدى, بەدەلدى, اتاقتى ازاماتتار اراسىنان تالىمگەرلەر ىزدەۋدى كوزدەپ وتىرمىز.
اينۇر ايمۋرزينا,
«Birgemiz Sabaqtastyq» جالپىحالىقتىق جوباسىنىڭ امباسسادورى, «دارا» جوبالار مەن باعدارلامالار قايىرىمدىلىق قورىنىڭ ديرەكتورى
ۆولونتەرلەردىڭ بەدەلى ارتادى
ۆولونتەرلەردىڭ رەسپۋبليكالىق فرونت-ءوفيسىنىڭ اشىلۋىنا ارنالعان جيىنعا قاتىسقان ۆولونتەرلەر بىرنەشە باعىت بويىنشا ناقتى ماسەلەگە كوز جەتكىزىپ, ءوز ىستەرىن الاڭسىز جالعاستىرۋعا جانە جۇمىستارىن ىنتالاندىرۋعا قاتىستى ماڭىزدى سۇراقتاردىڭ جاۋابىن تاپتى دەپ ويلامىن.
ءوزىم ەكى نارسەنى انىق بايقادىم. بىرىنشىدەن, مەملەكەت باسشىسى قاسىم-جومارت توقاەۆ ۆولونتەرلەردىڭ اتقارعان جۇمىسىنىڭ زاڭدى نەگىزى جاسالاتىنىن ايتتى. ەندىگى جەردە جاستاردىڭ ۆولونتەرلىككە ارناعان جىلدارى ەڭبەك ءوتىلى رەتىندە ەسەپكە الىناتىن بولدى. بۇل – ءبىز ءۇشىن كوپتەن كۇتكەن جاعىمدى جاڭالىق بولدى. ەندى ۆولونتەرلەردىڭ قاتارىنا سۇرانۋشىلاردىڭ لەگى كوبەيەدى دەپ ويلايمىن ەندى. سونداي-اق ولاردىڭ ەڭبەگىنە قاراي كوتەرمەلەۋ اقىسىمەن, ستيپەنديامەن ىنتالاندىرۋ شەشىلمەك. بۇل دا ۆولونتەرلىكتىڭ بەدەلىن كوتەرىپ, ولاردىڭ قىزمەتىنە دەگەن قۇرمەتتى ارتتىرماق. ەكىنشىدەن, ەلىمىزدىڭ بارلىق ايماعىنان كەلگەن زامانداستارىمىزبەن تانىسىپ, پىكىر الماسۋدىڭ وڭتايلى ءساتى بولدى. ۇسىنىستارىمىزدى ورتاعا سالدىق, تاجىريبەمىزبەن بولىستىك. دوستاستىق, اقىلداستىق. بۇل بولاشاقتا ەرىكتىلەردىڭ تۇتاس ەل بويىنشا جۇمىلا ەڭبەك ەتۋىنە وڭ اسەر ەتەدى. ۆولونتەرلەردىڭ رەسپۋبليكالىق شتابى اياسىندا فرونت-وفيس اشىلدى. وسىنداي ورتالىقتار وبلىستاردا دا جۇمىس ىستەيتىن بولادى.
جەتىسۋلىق ۆولونتەرلەر ءۇشىن جاستارعا جۇكتەلگەن مىندەتتەر قالىپتى شارۋا دەسەم, قاتەلەسپەسپىن, ءوڭىر جاستارى بىلەك سىبانىپ جۇمىس ىستەۋدى داستۇرگە اينالدىرعان. ءبىز تابيعاتتى ايالاۋعا, ارداگەرلەر مەن قارتتارعا كومەك كورسەتۋدە ۇنەمى باستاماشى بولىپ ءجۇرمىز, ءتارتىپ ساقشىلارىنا كومەكشى بولىپ, قوعامدىق باقىلاۋعا دا ۇلەس قوسىپ وتىرمىز. بيىل اۋىل جاستارىنىڭ ءبىلىمىن ارتتىرۋعا, ونىڭ ىشىندە اعىلشىن ءتىلىن وقىتۋعا ءوز كۇشىمىزدى جۇمساۋعا كىرىسەمىز. بۇعان وبلىستاعى 17 اۋدان مەن 3 قالادا بارلىق جاعداي جاسالعان.
ەرجان داۋلەتباەۆ,
ۆولونتەر
الماتى وبلىسى
تالاپتى جاستارعا بەرىلگەن مۇمكىندىك
ۆولونتەر فرونت-ءوفيسىنىڭ اشىلعانىنا ەرەكشە قۋانىپ وتىرمىن. بۇل شاراعا ءوزىم دە قاتىستىم. بيىلعى جىل ەلىمىزدەگى ۆولونتەرلەر ءۇشىن ۇلكەن مۇمكىندىك دەپ ەسەپتەيمىن. قازىر رەسپۋبليكا بويىنشا كوپتەگەن تىڭ جوبالار قولعا الىنىپ جاتىر. 2017 جىلى ءبىزدىڭ ۋنيۆەرسيتەتتە ۆولونتەرلىك كورپۋس اشىلعان. ءبىزدىڭ ۆولونتەرلىك كورپۋس بىرنەشە باعىتتا جۇمىس ىستەيدى. تۇرعىندارعا الەۋمەتتىك كومەك كورسەتەمىز. بۇدان بولەك ۆولونتەر رەتىندە رەسپۋبليكالىق سايىستارعا دا قاتىسامىز. ماماندىعىمىز دارىگەر بولعاننان كەيىن قالاداعى مەديتسينالىق مەكەمەلەردە اۋىر ناۋقاستاردى ەمدەيتىن دارىگەرلەرگە جاردەمدەسەمىز. ولاردىڭ جۇمىسىن جەڭىلدەتۋگە اتسالىسامىز. بيىل رەسەيدىڭ ۆولونتەرلەرىمەن بىرلەسە جۇمىس ىستەمەك ويىمىز بار. مەديتسينالىق مەكەمەلەرگە كومەكتەسۋدى جالعاستىرامىز. بالالار ءۇيى مەن قارتتار ۇيىنە دە ءداستۇرلى تۇردە بارىپ كونتسەرت قويامىز. ءوزىم كەشە نۇر-سۇلتانداعى فرونت-كەڭسەسىنىڭ اشىلۋىنا وراي ۇيىمداستىرىلعان سەكتسيادا ءسوز سويلەپ, ۆولونتەرلەردىڭ اۋىر ناۋقاستارعا كومەكتەسۋى جونىندە ويىمدى ورتاعا سالدىم. وسى جيىندا جاقسى يدەيالار ايتىلدى. دەنساۋلىق ساقتاۋ ۆيتسە-ءمينيسترى مەديتسينا باعىتىنداعى ۆولونتەرلەرگە قولداۋ بىلدىرەتىنىن جەتكىزدى. ءبىر سوزبەن ايتقاندا, 2020 جىل تالاپتى جاستاردىڭ قوعامدىق ىستەرگە بەلسەنە ارالاسۋىنا زور مۇمكىندىك بەرەتىنى انىق.
گۇلفايرۋز تۋكينوۆا,
سەمەي مەديتسينا ۋنيۆەرسيتەتىنىڭ 5-كۋرس ستۋدەنتى, ۋنيۆەرسيتەت جانىنداعى «QazMedVolunteers» كورپۋسىنىڭ ءتورايىمى