سەنات توراعاسى داريعا نازارباەۆا دۇنيەجۇزىلىك دەنساۋلىق ساقتاۋ ۇيىمى ەۋروپالىق ايماقتىق بيۋروسىنىڭ ديرەكتورى حانس كليۋگەمەن كەزدەستى. بۇل تۋرالى پارلامەنت سەناتىنىڭ ءباسپاسوز قىزمەتى حابارلادى.
شاراعا پارلامەنت سەناتىنىڭ دەپۋتاتتارى, ددۇ جەنەۆاداعى وكپە اۋرۋلارى جونىندەگى جاھاندىق باعدارلامانىڭ ديرەكتورى تەرەزا كاساەۆا, ددۇ ەۋروپالىق ايماقتىق بيۋروسى ەلدەرىمەن ستراتەگيالىق قاتىناستار جونىندەگى ۇيلەستىرۋشى باقتىگۇل كاريەۆا, ددۇ قازاقستانداعى تۇراقتى وكىلىنىڭ مىندەتىن اتقارۋشى كەرولاين كلارينۆال, دەنساۋلىق ساقتاۋ ءمينيسترى ەلجان ءبىرتانوۆ قاتىستى.
كەزدەسۋگە قاتىسۋشىلار انا مەن بالا دەنساۋلىعىن ساقتاۋ جانە نىعايتۋ, ايتۆ/جيتس-پەن كۇرەسۋ جانە الدىن الۋ, سانيتارلىق قىزمەتتى جەتىلدىرۋ جانە وتباسىلاردى الەۋمەتتىك قولداۋ ماسەلەلەرى جونىندەگى مەملەكەتتىك ساياساتتى ىسكە اسىرۋدىڭ كەلەشەك باعىتتارىن تالقىلادى.
سەنات توراعاسى العاشقى مەديتسينالىق-سانيتارلىق كومەك كورسەتۋ جونىندەگى استانا دەكلاراتسياسىن ىلگەرىلەتۋگە ددۇ-نىڭ قولداۋ كورسەتكەنى ءۇشىن ح.كليۋگە العىس ءبىلدىردى. پالاتا توراعاسىنىڭ ايتۋىنشا, جالپىعا بىردەي دەنساۋلىق ساقتاۋ قىزمەتتەرىمەن قامتۋدىڭ نەگىزى العاشقى مەديتسينالىق-سانيتارلىق كومەكتىڭ ءتيىمدى جانە تۇراقتى جۇيەسى بولىپ تابىلادى.
حانس كليۋگە اڭگىمە بارىسىندا كوروناۆيرۋستىڭ تارالۋىنا جول بەرمەۋدى كوزدەيتىن قابىلدانعان بارلىق شارالار ءۇشىن قازاقستانعا العىسىن ءبىلدىردى.
داريعا نازارباەۆا قازىرگى كەزدە ازىرلەنىپ جاتقان ءارى مەملەكەت, جۇمىس بەرۋشىلەر مەن حالىقتىڭ ازاماتتاردىڭ دەنساۋلىعى ءۇشىن ىنتىماقتى جاۋاپكەرشىلىگىن كۇشەيتۋگە, سونداي-اق دەنساۋلىق ساقتاۋدى تسيفرلىق تۇرعىدا دامىتۋدى كوزدەيتىن «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكس جايىندا ددۇ وكىلدەرىن حاباردار ەتتى.