18 اقپان كۇنى ءۇندىستاندا كۇرەس تۇرلەرىنەن ازيا چەمپيوناتى باستالادى. قۇرلىق دوداسىندا ەل نامىسىن قورعايتىن داۋلەت نيازبەكوۆ الداعى تۋرنيرگە قاتىستى پىكىرىمەن ءبولىستى. بۇل جايىندا ۇلتتىق وليمپيادالىق كوميتەتتىڭ ءباسپاسوز قىزمەتى حابارلادى.
«چەمپيوناتقا دايىندىق وتە جاقسى دەڭگەيدە. قازىرگى تاڭدا ەكىنشى وقۋ-جاتتىعۋ جيىندارىن وتكىزىپ جاتىرمىز. ازيا چەمپيوناتى وليمپيادا قارساڭىنداعى ەڭ ماڭىزدى, ءوز الەۋەتىمىزدى تاعى ءبىر تەكسەرىپ الاتىن تۋرنير. ونىڭ ۇستىنە, بۇل باسەكەدە رەيتينگىلىك ۇپاي بەرىلەدى. سوندىقتان ۇندىستانداعى تۋرنير ءبارىمىز ءۇشىن دە اسا قاجەت. قارسىلاستار دا قارىمدى. كىلەم يەسى ءۇندىستاننان بولەك, جاپونيا, يران, وزبەكستان بالۋاندارى بار. ءبىز بار كۇشىمىزدى سالامىز», - دەيدى د. نيازبەكوۆ.
ايتا كەتەلىك, داۋلەت نيازبەكوۆ بۇگىنگە دەيىن ازيا چەمپيوناتىندا ءۇش رەت توپ جارىپ, ءۇش مارتە قولا جۇلدەگەر اتانعان.