قاراتال اۋداندىق كىتاپحاناسى 1934 جىلى قۇرىلعان ەكەن. رۋحانيات شاڭىراعىنىڭ قورىندا 50 مىڭنان استام كىتاپ بار. وكىنىشكە قاراي, كىتاپحانانىڭ جەكە عيماراتى جوق. قازىر اۋداننىڭ بيبليوگرافتارى ۇشتوبە قالاسىنداعى ا.پۋشكين اتىنداعى ورتا مەكتەپتىڭ ءبىر بولمەسىندە سىعىلىسىپ وتىر.
- اۋداندىق كىتاپحانانىڭ قورىندا 50 مىڭ كىتاپ بار. 10 قىزمەتكەر جۇمىس ىستەيدى. بۇعان دەيىن بىرنەشە عيماراتقا كوشىپ, قونىپ جۇردىك. قازىر مەكتەپتىڭ ءبىر بولمەسىندە وتىرمىز. 280 شارشى مەتر اۋماقتا ءارى كىتاپ ساقتاپ, ءارى وقىرمانعا قىزمەت كورسەتىپ كەلەمىز. مادەني كوپشىلىك شارالار وتكىزۋ كەزىندە قينالامىز. كىتاپحانا قىزمەتىنىڭ شارتى بويىنشا ءوزىمىزدىڭ سيرەك قورىمىز, گازەت-جۋرنالدار ساقتايتىن قويمامىز بولۋى ءتيىس ەدى. ول ارنايى عيماراتتا, قالىپتى اۋا جۇيەسىندە ساقتالۋى كەرەك. وكىنىشكە قاراي, مۇنىڭ ءبىرى دە جوق. جاعدايدان اۋدان باسششىلىعى, وبلىستىڭ مادەنيەت باسقارماسى حاباردار. جىل سايىن كىتاپحانا ءۇشىن عيمارات سالۋ نەمەسە ساتىپ الۋ تۋرالى ماسەلە كوتەرىلەدى, ازىرگە شەشىمىن تابار ەمەس, - دەيدى قاراتال اۋداندىق ورتالىق كىتاپحانا مەڭگەرۋشىسى گۇلشات سەمبەكوۆا.
ايتپاقشى, اۋداندىق كىتاپحانا ءوڭىردىڭ تاريحىنا قاتىستى دەرەكتەردى جيناقتاۋمەن اينالىسىپ وتىرعان جانە تۇرعىنداردىڭ رۋحاني جاڭعىرۋىنا ۇلەس قوسىپ جۇرگەن جالعىز مادەني مەكەمە ەكەن. ويتكەنى, بۇل وڭىردە ولكەتانۋ مۋزەيى جوق. ءبىز حابارلاسقان اۋداننىڭ بەلسەندى جاستارى تاريحى تەرەڭنەن تارتاتىن اۋداندا ورتالىق مۋزەيدىڭ مۇلدەم بولماعانىن ايتادى.
جالپى, الماتى وبلىسىنىڭ قاراتال اۋدانى 1924 جىلى قۇرىلعان ەكەن. قازىر اۋماقتى 45 مىڭعا جۋىق تۇرعىن مەكەندەيدى. وسكەن ولكەدەن ەسكەلدى, بالپىق, ايتۋ سياقتى قارا قىلدى قاق جارعان بيلەر مەن قارىمباي, جولبارىس باتىرلار, قابان جىراۋ, جالمەندە بولىس پەن پىشان اقىن سىندى تاريحي تۇلعالار شىققان.