«استانا بالەت» الماتىدا جاڭا قويىلىمدارىن كورسەتەدى

العاشقى كۇنى تەاتر ۇجىمى ءوزىنىڭ نەگىزگى باعىتى – نەوكلاسسيكا مەن زاماناۋي حورەوگرافيانى ءۇش ءبىر اكتىلى بالەت ارقىلى كورسەتەدى. «Astana Ballet presents» باعدارلاماسىنا دجوردج ءبالانچيننىڭ «Concerto Barocco», ر.رەبەكتىڭ «A Journey of Memory» جانە ن.فونتەنىڭ «Love’s Lost Idols» تۋىندىلارى ەنگەن.

ال, 21, 22 جانە 23 اقپاندا «كۇلشە قىز» بالەتىنىڭ پرەمەراسى وتەدى. سەرگەي پروكوفەۆتىڭ عالامات مۋزىكاسى, كولەمدى دەكوراتسيالار, عاجايىپ كوستيۋمدەر مەن بالا كەزدەن بارشامىزعا بەلگىلى سيۋجەت – حورەوگراف نادەجدا كالينينا ءساتتى سپەكتاكلدىڭ قۇرامداس بولىكتەرىن ءبىر ارناعا توعىستىرىپ, سيقىرلى حورەوگرافيا, ۇتىمدى ءازىلدى قولدانا وتىرىپ, ەرەسەكتەر مەن بالالاردىڭ كوزايىمىنا اينالعان ەرتەگى-بالەت جاسادى.

باسشىلىقتىڭ ايتۋىنشا, ەكى كورىنىستى بالەت اباي اتىنداعى ماوبت ساحناسىنا ىڭعايلانىپ, ىقشامدالعان. بىراق, سپەكتاكل اۆتورلارى بالەتتىڭ بىردە-ءبىر عاجايىپ دەتالى ۇمىت قالمايتىنىن, الماتىلىقتار بۇل سپەكتاكلدىڭ عالاماتىن سەزىنە الاتىنىن ايتىپ وتىر. كۇلشە قىز پارتياسىن ورىندايتىندار: قازاقستاننىڭ ەڭبەك سىڭىرگەن قايراتكەرى تاتيانا تەن, نازەركە ايمۇحامەتوۆا جانە دارينا قايراشەۆا; حانزادانىڭ ءرولىن سومدايتىندار - قازبەك احمەدياروۆ, سۇندەت سۇلتانوۆ جانە فارحات بوريەۆ.

«ارينە, الماتىدا ونەر كورسەتۋ بىزگە زور جاۋاپكەرشىلىك جۇكتەيدى. سەبەبى, كاسىبي ماماندارىمىز الماتىداعى بالەت مەكتەبىنىڭ تۇلەكتەرى. مۇندا ءبىزدىڭ ۇستازدارىمىز قىزمەت ەتەدى. تۋعان-تۋىستارىمىز دا وسىندا تۇرادى. بۇل قالانىڭ كورەرمەنى دە ەرەكشە – زەردەلى, تالعامپاز ءارى زيالى», - دەيدى, تەاتردىڭ باس بالەتمەيستەرى مۋكارام اۆاحري.

سونىمەن قاتار, كورەرمەن نازارىنا بالەت الەمىندەگى بەلگىلى فوتوسۋرەتشى الەكسەي كريۆتسوۆتىڭ فوتوكورمەسى ۇسىنىلادى. «استانا بالەت» تەاترىمەن بىرلەسە ىستەگەن جۇمىستارى, بالەرينا مەن بيشىلەرگە وزگە قىرىنان, كەيدە ءتىپتى, تاڭسىق راكۋرستان قاراۋعا مۇمكىندىك بەرەدى. بۇل كورمەنىڭ ءار فوتوسۋرەتى – بالەت عالاماتى مەن بيشىلەردىڭ شەبەرلىگىن اسپەتتەيتىن, قازاقستاندىق بالەتتىڭ ەرەكشەلىگىن, سونىڭ ىشىندە, ءار ءارتىستى دارالايتىن ناعىز ونەر تۋىندىسى.