قازاقستان رەسپۋبليكاسى سىرتقى ىستەر ءمينيسترىنىڭ ورىنباسارى ەرجان اشىقباەۆ 2020 جىلى 10-12 اقپاندا اۋسترياعا جاساعان جۇمىس ساپارى بارىسىندا ۆەنادا ورنالاسقان بۇۇ ۇيىمدارىنىڭ باسشىلىعىمەن كەزدەستى. بۇل تۋرالى سىرتقى ىستەر مينيسترلىگىنىڭ ءباسپاسوز قىزمەتى حابارلادى.
اتاپ ايتقاندا, اتوم ەنەرگياسى جونىندەگى حالىقارالىق اگەنتتىگىنىڭ باس ديرەكتورى رافاەل گروسسي قازاقستاننىڭ يادرولىق قارۋدى تاراتپاۋ رەجيمىن نىعايتۋ جونىندەگى جاھاندىق كۇش-جىگەردەگى ەرەكشە ءرولىن اتاپ ءوتتى. تاراپتار يادرولىق قاۋىپسىزدىكتى نىعايتۋ جانە اتوم ەنەرگياسىن بەيبىت ماقساتتا پايدالانۋ ماسەلەلەرىن, سونداي-اق اۋىلشارۋاشىلىعى, مەديتسينا, سۋ شارۋاشىلىعى, بۇرىنعى سەمەي پوليگونىنىڭ اۋماعىن قالپىنا كەلتىرۋ ماقساتىندا اەحا-نىڭ اتومدىق جانە رادياتسيالىق تەحنولوگيالارىن پايدالانۋ بولاشاعىن تالقىلادى.
اەحا باس ديرەكتورى ۆەنا قالاسىندا وتكەن يادرولىق قاۋىپسىزدىك جونىندەگى كونفەرەنتسياعا قازاقستاندىق دەلەگاتسياسىنىڭ قاتىسقانى ءۇشىن العىسىن ايتىپ, ەلىمىزدىڭ يادرولىق قاۋىپسىزدىكتى نىعايتۋعا قوسقان ۇلەسىن ەسكەرە وتىرىپ, قازاقستان 2021 جىلى ۆەنادا وتەتىن يادرولىق ماتەريالدى فيزيكالىق قورعاۋ تۋرالى كونۆەنتسيانىڭ شولۋ كونفەرەنتسياسىندا ءتيىستى دەڭگەيدە قاتىسادى دەپ ءۇمىت ءبىلدىردى.
بۇۇ-نىڭ ۆەناداعى ءبولىمىنىڭ جاڭادان تاعايىندالعان باس ديرەكتورى, بۇۇ ەسىرتكى جانە قىلمىس جونىندەگى باسقارماسىنىڭ (بۇۇ ەقب) اتقارۋشى ديرەكتورى گادا ۆاليمەن بولعان كەزدەسۋ بارىسىندا تاراپتار قىلمىستىڭ الدىن الۋ جانە قىلمىستىق سوت تورەلىگى, سونداي-اق شەتەل تەرروريست جاۋىنگەرلەرگە قاتىستى قاۋىپ-قاتەرلەردىڭ الدىن الۋ سىندى ەكسترەميزم مەن تەرروريزمگە قارسى ءىس-قيمىل سالاسىنداعى كەڭ اۋقىمدى ماسەلەردى تالقىلادى.
گ. ۆالي قازاقستاننىڭ ءوز ازاماتتارىن, ەڭ الدىمەن ايەلدەر مەن بالالاردى تاياۋ شىعىستاعى سوعىس اۋماقتارىنان قايتارۋ جونىندەگى كۇش-جىگەرىن جوعارى باعالادى. سونداي-اق, بۇۇ ەقب الماتى قالاسىندا ورنالاسقان ورتالىق ازيالىق اقپاراتتىق ۇيلەستىرۋ ورتالىعىنىڭ (CARICC) ەسىرتكىمەن كۇرەستەگى پراكتيكالىق قىزمەتىنە ەرەكشە نازارىن جالعاستىراتىرۋعا دايىندىعى جانە وسى ورتالىققا تولىققاندى قولعابىس كورسەتۋگە نيەتتى ەكەنى ايتىلدى.
يادرولىق سىناقتارعا جاپپاي تىيىم سالۋ تۋرالى شارت ۇيىمىنىڭ (ياسجتش) اتقارۋشى حاتشىسى لاسسينا زەربو سۇحبات بارىسىندا 1991 جىلعى 29 تامىزدا سەمەي پوليگونىن جابۋعا شەشىم قابىلداعان قازاقستاننىڭ تۇڭعىش پرەزيدەنتى – ەلباسى ن.نازارباەۆتىڭ ارقاسىندا 1996 جىلى ياسجت-نى قابىلداۋ ۇدەرىسى باستالعانى تۋرالى اتاپ ءوتتى. سۇحباتتاس قازاقستاننىڭ ياسجتشۇ-عا قوسىپ وتىرعان ەرەكشە ۇلەسىنە نازار اۋدارىپ, ەلىمىزدىڭ باستاماسى بويىنشا بىرىككەن ۇلتتار ۇيىمى جىل سايىن 29 تامىزدا حالىقارالىق يادرولىق سىناقتارعا قارسى كۇندى اتاپ وتەتىنىن مالىمدەدى.
قازاقستان مەن ياسجتشۇ اراسىنداعى ودان ءارى ىنتىماقتاستىقتىڭ باعىتتارى, اتاپ ايتقاندا, يادرولىق سىناقتاردى جاسىرۋعا مۇمكىندىك بەرمەيتىن ياسجتشۇ-نىڭ عالامدىق باقىلاۋ جۇيەسىنىڭ بىرلەسكەن ەلەمەنتى رەتىندە ەلىمىزدە العاشقى بەكزات گازداردىڭ راديونۋكليدتىك باقىلاۋ ستانتسياسىن ورنالاستىرۋ ماسەلەلەرى تالقىلاندى.
سونىمەن قاتار, بۇۇ-نىڭ ۆەناداعى بولىمىنە زيارات بارىسىندا ە.اشىقباەۆ ەسىرتكى جانە ونىڭ پرەكۋرسورلارى سالاسىندا عىلىمي جانە سوت-ساراپتامالىق زەرتتەۋلەر جۇرگىزەتىن, سونداي-اق قۇقىق قورعاۋ, ارنايى جانە كونسۋلدىق قىزمەتتەردىڭ جالعان سايكەستەندىرۋ قۇجاتتاردى انىقتاۋ سىندى قۇزىرەتىن ارتتىراتىن مامانداندىرىلعان زەرتحانانىڭ قىزمەتىمەن تانىستى.