دەنساۋلىق ساقتاۋ مينيسترلىگى مەن دسۇ ۇيىمى كەلىسىمگە قول قويدى

كەلىسىمنىڭ نەگىزگى ماقساتى قوعامداعى مەملەكەتتىك دامۋدىڭ بارلىق باعىتتارىندا سەكتورارالىق ءتاسىلدى قولدانۋ ارقىلى ازاماتتاردىڭ دەنساۋلىعىن نىعايتۋ جانە دەنساۋلىققا قاتىستى ادىلەتسىزدىكتەردى ازايتۋ ءۇشىن بار مۇمكىندىكتەردى پايدالانۋ.

ەلجان ءبىرتانوۆ قازاقستان ۇكىمەتى مەن ددسۇ ەۋروپالىق وڭىرلىك بيۋروسىنىڭ ىنتىماقتاستىق تۋرالى ەكىجاقتى كەلىسىمى قازاقستان حالقىنىڭ دەنساۋلىعىن جاقسارتۋعا ىقپال ەتەتىنىن اتاپ ءوتتى. سونىمەن قاتار, ول مەديتسينالىق كومەكتىڭ ساپاسى مەن قولجەتىمدىلىگىن جاقسارتۋعا مۇمكىندىك بەرەتىن العاشقى مەديتسينالىق-سانيتارلىق كومەك (مساك) بويىنشا جەدەل نەگىز ەنگىزۋ قاجەتتىلىگىنە نازار اۋداردى. ءمينيستردىڭ ايتۋىنشا, بۇل باعىتتا ۇلتتىق دەڭگەيدە عانا ەمەس, ايماقتىق, وڭىرلىك جانە جاھاندىق دەڭگەيدە دە جۇمىس ىستەۋ ماڭىزدى.

ددسۇ ەۋروپالىق ايماقتىق بيۋروسىنىڭ ديرەكتورى حانس كليۋگە ىنتىماقتاستىقتىڭ نەگىزگى باعىتتارىن اتادى.ء«بىز مەديتسينالىق قىزمەتتەر مەن دارىلىك زاتتارعا, ونىڭ ىشىندە ۆاكتسينالارعا قولجەتىمدىلىكتى جاقسارتۋدى; ءومىر ءسۇرۋ جاعدايى, قورشاعان ورتا جانە ت.ب. سياقتى ادامداردىڭ دەنساۋلىعىنا اسەر ەتەتىن نەگىزگى فاكتورلاردى; قوعامدىق دەنساۋلىق ساقتاۋ سالاسىنداعى باسىمدىقتاردى ايقىنداۋ ماقساتىندا سەكتورارالىق ىنتىماقتاستىقتى كۇشەيتۋدى قوسا العاندا, بىرنەشە باعىتتارمەن بىرلەسىپ جۇمىس ىستەيتىن بولامىز. سونداي-اق, توتەنشە جاعدايلار باعدارلاماسىنا ەرەكشە نازار اۋدارامىز. بۇل كوروناۆيرۋستىق ينفەكتسيانىڭ ورشۋىنە بايلانىستى قازىرگى ۋاقىتتا دا وتە وزەكتى ماسەلە»,- دەدى ددسۇ ەۋروپالىق ايماقتىق بيۋروسىنىڭ ديرەكتورى حانس كليۋگە.

جالپى, تاراپتار ىنتىماقتاستىق تۋرالى كەلىسىم اياسىندا ءوزارا ءىس-قيمىلدى جاڭا دەڭگەيگە كوتەرۋگە مۇمكىندىك تۋاتىنىن اتاپ ءوتتى. بۇل قازىر ازاماتتار دەنساۋلىعىنىڭ قاۋىپسىزدىگىن قامتاماسىز ەتۋ ءۇشىن, كوروناۆيرۋستىڭ جاڭا ءتۇرىنىڭ تارالۋىنا جول بەرمەۋ ءۇشىن اسا ماڭىزدى.