قازاقستان مەن رەسەي شەكاراسىنداعى وتكىزۋ پۋنكتەرى رەكونسترۋكتسيادان وتەدى

قازاقستان مەن رەسەي شەكاراسىندا بۇگىنگى تاڭدا 30 وتكىزۋ پۋنكتى بار. ونىڭ 17-ءسى – كوپجاقتى, 13-ءى – ەكىجاقتى وتكىزۋ پۋنكتى. يندۋستريا جانە ينفراقۇرىلىمدىق دامۋ مينيسترلىگى مەن ۇلتتىق قاۋىپسىزدىك كوميتەتى وكىلدەرىنەن قۇرالعان كوميسسيا جۇمىس ىستەپ تۇرعان وتكىزۋ پۋنكتەرىنىڭ تەحنيكالىق جاعدايىن باقىلادى. كوميسسيا تەكسەرۋ جۇمىستارىنىڭ قورىتىندىسى بويىنشا وتكىزۋ پۋنكتەرىنىڭ جۇكتەمەسى, وتكىزۋ قابىلەتتىلىگىن ەسەپكە الا وتىرىپ, رەكونسترۋكتسيانى تالاپ ەتەتىن 27 وتكىزۋ پۋنكتىن انىقتادى.

وسىلايشا «سىرىم», «تاسقالا», «قوساق», «ۇرلىتوبە» «جاڭا جول», «الىمبەت», «قاراقوعا», «شاعان», «قۇرمانعازى», «ۇبە», «شارباقتى», «قىزىلجار», «قايراق», «اۋىل», «بيدايىق», «جانىبەك», «اقساي», «قوندىباي», «ايات», «اقبالشىق», «نايزا», «جەزكەنت», «قويانباي», «بايتانات», «امانگەلدى», «وباعان» جانە «جەلقۋار» بەكەتتەرى 2025 جىلعا دەيىن كەزەڭ-كەزەڭىمەن جاڭارتۋ جۇمىستارىنان وتەتىن بولادى.

سونىمەن قاتار 2019 جىلدىڭ قاراشاسىندا وتكەن قازاقستان مەن رەسەي اراسىنداعى وڭىرارالىق ىنتىماقتاستىق فورۋمىندا يندۋستريا جانە ينفراقۇرىلىمدىق دامۋ مينيسترلىگى مەن رف كولىك مينيسترلىگى اراسىندا مەملەكەتتىك قازاق-ورىس شەكاراسىنداعى وتكىزۋ بەكەتتەرىنىڭ جۇمىسى بويىنشا بىرلەسكەن ءىس-شارالار تۋرالى باعدارلاماعا قول قويىلعان بولاتىن. قۇجاتقا سايكەس جۇمىس ىستەپ تۇرعان وتكىزۋ پۋنكتەرىنىڭ جاعدايىنا تالداۋ جۇرگىزۋ, 2020 جانە 2025 جىلدار ارالىعىندا قازاق-ورىس شەكاراسىنداعى وتكىزۋ پۋنكتەرىن دامىتۋدىڭ جول كارتاسىن ازىرلەۋ كوزدەلگەن.