بۇل كۇندەرى رەسەيدىڭ سانكت-پەتەربۋرگ قالاسىندا جۇلدە قورى 848 000 اقش دوللارىن قۇرايتىن «WTA Premier» دەپ اتالاتىن تەننيسشىلەردىڭ تۋرنير وتۋدە.
ايتۋلى جارىستا قازاقستاننىڭ ءبىرىنشى راكەتكاسى ەلەنا رىباكينا تابىستى ونەر كورسەتۋدە. تۇساۋكەسەر كەزدەسۋدە چەحيالىق كاتەرينا سينياكوۆاعا (59 راكەتكا) سان سوقتىرعان جەرلەسىمىز كەلەسى كەزەڭدە فرانتسيالىق فيونا فەررودان (58 راكەتكا) ايلاسىن اسىردى. ءبىر عاجابى, فرانتسيانىڭ وكىلىنە قارسى باسەكەنىڭ العاشقى سەتىندە ەلەنا 1:3 جانە ەكىنشى سەتتە 0:3 ەسەپتەرىمەن جەڭىلىپ جاتتى. دەسەك تە شەشۋشى تۇستا شيراق قيمىلداعان ول جەڭىستى قارسىلاسىنىڭ ۋىسىنان ج ۇلىپ اكەتتى. جوعارىداعى قوس كەزدەسۋدە دە 6:3, 6:4 ەسەپتەرى تىركەلدى.
ءتۋرنيردىڭ شيرەك فينالىنا شىققان رىباكينا وسى مەجەدە تاعى ءبىر فرانتسۋز ويىنشىسى وسەان دودەنمەن (159 راكەتكا) شەبەرلىك بايقاسادى.
نەۆا جاعالاۋىنداعى جارىستا يۋليا پۋتينتسەۆا (34 راكەتكا) دا باق سىنادى. الايدا ول العاشقى اينالىمدا رەسەيلىك ۆەرونيكا كۋدەرمەتوۆاعا (38 راكەتكا) ەسە جىبەردى.