جالپى, سوڭعى جىلدارى ماي اۋدانىندا تۇرعىندار سانى ازايدى. بۇل كۇندەرى مۇندا 10 مىڭداي ادام تۇرادى. اۋدانداعى 13 اۋىل مەكتەبىندە 1636 وقۋشى عانا قالعان. سوندىقتان, اۋدان اكىمدىگى وڭتۇستىكتەن ەل كوشىرۋ باعدارلاماسىن جالعاستىرۋدا.
ارينە, ەل قونىپ, ورتا تولعانىنا كەڭتۇبەك اۋىلى قۋانىشتى. قۇجات جۇزىندە دۇرىس رەتتەلمەگەن بە, بۇل اۋىلدىڭ كوكتۇبەك, جالتىر دەگەن اتاۋلارى دا بار. وسى ءۇش اتاۋى بار اۋىلعا وڭىردەگى «نۇرلى ەرتىس» باعدارلاماسى بويىنشا الماتى وبلىسىنىڭ تەكەلى قالاسىنان, جامبىل, ەڭبەكشىقازاق اۋدانىنان, تۇركىستان وبلىسىنىڭ ورداباسى اۋدانىنان بىرنەشە وتباسى كوشىپ كەلدى. مەكتەپكە كەلگەن كۇننەن بەلسەندى قانات قازىمجان ۇلى, سۇلتانسەيىت باكداۋرەن روبوتوتەحنيكا سالاسى بويىنشا جارىستارعا قاتىسۋدا.
بالالار جاپپاي وقىتۋ قورىنان ىستىق تاماقپەن, زاڭناماعا سايكەس قارجىلاي كومەكپەن قامتاماسىز ەتىلدى. اتا-انالارى جۇمىسقا ورنالاسسا, كەيبىرى باۋ-باقشا ەگۋدى باستاپ كەتىپتى.
ەندى جۋىردا اۋداندىق ءبىلىم ءبولىمىنىڭ باستاماسىمەن مەكتەپتە دومبىرا سىنىبى دا اشىلدى. دومبىرا سىنىبىنىڭ اشىلۋى وقۋشىلاردىڭ اۋدان ورتالىعىنداعى بايعابىل جىلقىباەۆ اتىنداعى بالالار مۋزىكا-ونەر مەكتەبىندە وقۋلارىن جالعاستىرۋعا مۇمكىندىك تۋعىزدى. ۇلت اسپاپتار وركەسترى, جاس دومبىراشى, ءانشى, كۇيشى, قوبىزشى جانە حور ۇجىمى مەن سۋرەتشىلەرى بار ونەر مەكتەبى وڭتۇستىك وڭىرلەردەن كەلگەن بالالارمەن دە تولىعار. ونەر مەكتەبىن موڭعوليادان العاشقىلاردىڭ ءبىرى بولىپ ورالعان ءتولباستار سايىرحان ۇلى باسقارادى. ال مەكتەپتە اشىلعان دومبىرا سىنىبىنا ايناگۇل بىرجانقىزى مەن مەرۋەرت قالكەنقىزى جەتەكشىلىك ەتۋدە. سىنىپتىڭ اشىلۋىنا اۋداندىق بيۋدجەتتەن قاراجات ءبولىندى. سىنىپ ءىشى رۋحاني-تانىمدىق ۇلگىدە ەرەكشە بەزەندىرىلدى. وقۋشىلارعا ۇلتتىق كيىمدەر, بىرنەشە دومبىرا ساتىپ الىندى.
– وقۋشىلارىمىز دومبىرا ۇيىرمەسىنىڭ اشىلۋىن قىزىعۋشىلىقپەن قابىلدادى. دومبىرا سىنىبىنا قازىر 40 وقۋشى قاتىسادى. وبلىس ورتالىعىندا وتكەن بالالار شىعارماشىلىعى فەستيۆالىنە حاميت ەراسىل قاتىسىپ, جۇلدەگەر اتاندى. قازىر وقۋشىلار «سارىوزەن», «ەركەم-اي», «ورنەك», «كەلىنشەك» كۇيلەرىن ۇيرەنۋدە. ەلىمىزدە جىل سايىن اتالىپ وتەتىن «ۇلتتىق دومبىرا كۇنىنە» دايىندىق وسى كۇننەن باستالۋدا, – دەيدى مەكتەپتەگى تاربيە ءىسىنىڭ مەڭگەرۋشىسى گۇلدەن ابەۋوۆا.
دومبىرا سىنىبىنىڭ اشىلۋىندا ورتاعا جاڭا قوسىلعان حاميت ەراسىل, سماعۇل ەرالى, مەرەي زارلىقوۆا, جانسايا جۇماعاليەۆا, مانات قازىمجان ۇلى, ومىربەك ايبىن, يبراي الەم, الىبەك ءادىلجان سەكىلدى وقۋشىلار كۇمبىرلەتىپ كۇي تارتىپ, ءوز ونەرلەرىن كورسەتتى.
پاۆلودار وبلىسى,
ماي اۋدانى