قوردايداعى قاقتىعىس بارشامىزدى قاتتى الاڭداتتى. بۇل ءبىر جاعىنان جەرگىلىكتى جەردەگى بيلىك وكىلدەرىنىڭ دۇرىس جۇمىس ىستەمەۋىنىڭ سالدارى.
مەملەكەت باسشىسى قاسىم-جومارت توقاەۆتىڭ شەشىمىنە كەلىسەمىن. بۇل وقيعا ايماقتاعى باسشىلاردىڭ كەمشىلىگىن كورسەتەدى. ويتكەنى وندا لاۋازىمدى قىزمەتكە تاعايىندالعان سوڭ, تۇرعىنداردىڭ جاي-كۇيىن, نەمەن تىنىستاپ, نە ءىشىپ-جەپ وتىرعانىنا دەيىن تۇگەل ءبىلۋى ءتيىس. مۇنداي كيكىلجىڭدى الدىن الا كورە ءبىلىپ, وعان جول بەرمەۋدىڭ ارەكەتىن جاساۋى كەرەك ەدى. وكىنىشكە قاراي, ونداعى جاستاردىڭ كوبى جۇمىسسىز, الەۋمەتتىك جانە ەكونوميكالىق تەڭسىزدىك بار. قالتاسى قالىڭ ازاماتتار «بارماق باستى, كوز قىستىمەن» زاڭنان قۇتىلىپ كەتكەن دەپ ەستىپ جاتىرمىز. مۇنىڭ ءبارى, ارينە قاراپايىم حالىقتىڭ اشۋ-ىزاسىن تۋعىزادى. سونداعى لاۋازىمدى تۇلعالار وسىنىڭ بارىنە جول بەرمەۋى قاجەت بولاتىن.
قازاق حالقى بەيبىت حالىق. مۇنداي باسبۇزارلىق جەرگىلىكتى جەردە ءبىر كۇندە شىقپايدى. ۋاقىت وتە قوردالانا بەرەدى. جەرگىلىكتى اكىم-قارالار بۇعان ءمان بەرمەگەن, بايقاماعان. بۇل, بىرىنشىدەن. ەكىنشىدەن, ايماقتاعى مەملەكەتتىك مەكەمەلەردى جەمقورلىق پەن پاراقورلىق جاۋلاپ العان سىڭايلى. سوعان ەتى ۇيرەنىپ كەتكەن. مۇنى جاي عانا باسبۇزارلىق دەپ, «جابۋلى قازان جابۋلى» كۇيىندە قالدىرۋعا مۇلدەم بولمايدى. بۇل الەۋمەتتىك تەڭسىزدىكتى, رۋحاني تۇسىنىكتىڭ تومەندەگەنىن كورسەتەدى. وڭىردەگى مەملەكەتتىك مەكەمە باسشىلارى وسىعان قاتىستى جۇمىس ىستەۋگە مىندەتتى. مەملەكەت باسشىسى ايتىپ وتكەندەي, مۇنداي جاعدايعا جول بەرۋ جەرگىلىكتى اكىم-قارانىڭ سالعىرتتىعى.
قازاقستاننىڭ تۇكپىر-تۇكپىرىندە ەتنوستىق توپتار بار. ولاردىڭ تۇرمىس-تىرشىلىگى ارقيلى. تانىم-تۇسىنىگى, دۇنيەتانىمى ءارتۇرلى. الايدا سولاردىڭ ءبارى قازاق ەلىنىڭ, قازاقستاننىڭ ازاماتى. قوردايداعى قوردالانعان ماسەلە سول ەتنوستىق توپتاردىڭ كەيبىرىندە قازاقستان ازاماتى دەگەن سانا-سەزىمى ءالسىز ەكەنىن كورسەتەدى. جەرگىلىكتى جەردىڭ باسشىلارى وسى ماسەلەمەن جۇمىس ىستەۋى ءتيىس. ياعني, ءبارىمىز ءبىر ەلدىڭ ازاماتىمىز, قازاقستان – ورتاق ەلىمىز, ورتاق قازىنامىز, وعان نۇقسان كەلتىرمەۋ كەرەك دەگەن ۇعىم قالىپتاستىرۋعا كۇش سالۋ قاجەت.
ايتسە دە, بۇل ماسەلەنى شەشۋدى تەك ورتالىق اپپاراتقا ارتىپ قويۋ دۇرىس ەمەس. اۋىلدىق جەرلەردە اقساقالدار القاسى, زيالى قاۋىم وكىلدەرى بار. ولار دا وسى تۇيتكىلمەن اينالىسىپ, ەلدىڭ تۇتاستىعى مەن تاتۋلىعىن, قازاقستان ازاماتى دەگەن ۇعىمدى كۇشەيتۋگە كۇش سالۋى ءتيىس. قوردايداعى قوردالانعان ماسەلە بارىمىزگە ساباق بولۋى كەرەك.
عاريفوللا ەسىم,
قوعام قايراتكەرى