ءيا, بيىل وڭىردەگى قىس جىلداعىداي جايماشۋاق ەمەس, تۇرعىنداردى ابدەن اۋرەگە سالىپ-اق تۇر. ءبىر كۇن بوران, ءبىر كۇن اياز, ءبىر كۇن جىلىمىق. سەنەسىز بە, سەنبەيسىز بە, 11 اقپاندا وبلىستىڭ ءبىر عانا اۋدانىندا 60 كولىك پەن 202 ادام كومەككە ءزارۋ بولدى.
كوكپەكتى اۋدانىنداعى بايبۋرا مەن ومەش اسۋىن بىلمەيتىن ايماق تۇرعىندارى از شىعار. اسىرەسە قىستىڭ كوزى قىراۋدا جولعا ءجيى شىعاتىن اعايىن قوس اسۋدى جاقسى بىلەدى. 11 اقپاندا وسى ەكى اسۋدا 200-گە جۋىق جولاۋشى قار قۇرساۋىندا قالدى. بايبۋرا ۋچاسكەسى كۇندىزگى ساعات 12-دە جابىلعان-دى. الايدا وعان دەيىن كوكپەكتى اۋىلىنان قالباتاۋعا شىعىپ كەتكەن 35 كولىك, ياعني 112 ادام اقتۇتەك بوران كەسىرىنەن جولدا توقتاۋعا ءماجبۇر بولعان ەدى. كومەككە كوكپەكتىدەگى №33 ءورت ءسوندىرۋ ءبولىمى جىبەرىلىپ, جولاۋشىلار كوكپەكتى اۋىلىنداعى ءشايجۇنىسوۆ جانە كوكپەكتى ورتا مەكتەپتەرىنە, تۋىستارىنا جانە قوناقۇيلەرگە ورنالاستىرىلىپتى. ال «وسكەمەن – سامار» باعىتىنداعى ومەش اسۋىنداعى جول ۋچاسكەسى دە وسى كۇنى كۇندىزگى ساعات 12-دە جابىلعان بولاتىن. الايدا تاڭەرتەڭ ەرتەمەن وسكەمەننەن شىققان جولاۋشىلار (25 كولىك, 90 ادام) «وسكەمەن –سامار» جولىنىڭ 112 شاقىرىمىندا قار قۇرساۋىندا قالعان-دى. بۇل جەرگە كومەككە سامارداعى №51 ءورت ءسوندىرۋ ءبولىمىنىڭ كۋنگ تەحنيكاسى مەن وسكەمەندەگى وبلىستىق توتەنشە جاعداي دەپارتامەنتى تاراپىنان ترەكول كولىگى كەلىپ, جولاۋشىلاردى سامار اۋىلىنداعى سپورت مەكتەبىنە, اگروتەحنيكالىق كوللەدجگە, سامار باستاۋىش مەكتەبىنە, تۋىستارى مەن قوناقۇيلەرگە ورنالاستىردى. بۇدان بولەك 11 اقپاندا «وسكەمەن – التاي – كاتونقاراعاي – راحمان قاينارى» باعىتىنداعى جولدا 97 كولىك قارعا باتىپ, شاعىن اۆتوبۋستان 6 ادام قاۋىپسىز جەرگە جەتكىزىلدى, قالعان 303 جولاۋشى (سونىڭ 36-سى بالا) كومەكتەن باس تارتتى. وبلىستىق توتەنشە جاعدايلار دەپارتامەنتى ءباسپاسوز قىزمەتىنىڭ تاراتقان مالىمەتتەرىنە سەنسەك, وڭىردە تەك 11 اقپاندا 30 ادام قار قۇرساۋىنان شىعارىلىپ, 463 ادام قاۋىپسىز ورىندارعا جانە 142 كولىك ارنايى تەحنيكالار كومەگىمەن مەجەلى جەرلەرىنە جەتكىزىلدى.
سونىمەن قاتار كەشە ءوڭىردىڭ بىرنەشە قالاسى مەن اۋدانىنداعى مەكتەپتەردە ساباق توقتاتىلدى. بورودۋليحا اۋدانىندا اياز 32, التاي مەن جارمادا 30, ۇلان اۋدانى مەن وسكەمەندە 28, سەمەي مەن كۋرچاتوۆتا 23 گرادۋسكە جەتىپ, 1 اۋىسىمنىڭ 1-4-سىنىپ وقۋشىلارى ساباقتان بوساتىلدى. ال گلۋبوكوە اۋدانىندا گرادۋس باعانى 32, كوكپەكتى اۋدانىندا 30, شەمونايحادا 28, بەسقاراعايدا 28, ريددەردە 27-ءنى كورسەتىپ, 1 اۋىسىمنىڭ 1-9-سىنىپتارى جوسپاردان تىس دەمالۋعا ءماجبۇر بولدى. زايسان اۋدانىندا كوكتايعاق بولعاندىقتان, 1 اۋىسىمنىڭ 1-11-سىنىپ وقۋشىلارى ساباققا بارعان جوق.
شىعىس قازاقستان وبلىسى