پلاستيك وڭدەۋ – ەكولوگيالىق ءتيىمدى ءوندىرىس

«Rocket Plastic» كومپانيا­سىنىڭ نەگىزىن قالاعان دانيار باكيموۆتىڭ ايتۋىنشا, جوبا رەس­پۋبليكا تۇرعىندارىنىڭ قور­شاعان ورتاعا دەگەن كوزقاراسىن وزگەرتىپ, ەكولوگيا ماسەلەلەرىنە بەيجاي قاراماۋعا ۇندەيدى. «وت­كەن جىلى الماتى مارافونى كە­زىندە پلاستيك ىدىستاردىڭ كوپ­تەپ تاستالعانىن كوردىم. قال­دىق سالاتىن جاشىكتەردە, كوشە­لەردە شاشىلعان پلاس­تيكتەردى وڭدەپ, وندىرىسكە پايدالانۋ تۋرالى وي وسى كەزدە تۋدى», دەيدى دانيار باكيموۆ.

«نارحوزدىڭ» تۇلەگى دانيار باكيموۆ IT-بيزنەس بو­يىن­شا ارىپتەستەرىمەن پلاس­تيك ءون­دىرىسىن جولعا قويۋدىڭ العى­شارتتارى بيزنەس-مەكتەپتە وقىپ جۇرگەندە قالانعانىن ايتادى. الەۋمەتتىك جوبا جاساۋ بويىنشا تاپسىرما العان دانيارعا نيدەرلاندتىڭ ەكولوگيالىق باعىتتاعى تاجىريبەسى تارتىمدى بولىپ كورىنەدى. ال ءارى قاراي پوليمەرلەرمەن جۇمىس ىستەۋ ءوندىرىسىن جولعا قويۋ ماقساتىندا اتۋ جەڭىل ونەركاسىپ عىلىمي-زەرتتەۋ زەرتحاناسىنان كەڭەس العان جاس كاسىپكەرلەر بۇگىندە ۇلكەن ءوندىرىستىڭ ىرگەتاسىن قالادى دەۋگە نەگىز بار. العاشقى كاپيتالمەن بىرگە وتكەن جىلى «كوكا كولا» كومپانياسى جانە ء«بىز الماتى» جوباسىنان جەڭگەن گرانتتار ەسە­بىنەن وندىرىسكە قوسىمشا قۇ­رال-جابدىقتار الىندى. الداعى ۋاقىتتا پلاستيك قۇتىلاردى وڭدەۋ ارقىلى جەڭىل ونەركاسىپ, قۇرىلىس سالاسىندا ەكولوگيالىق تازا ونىمدەر الۋعا بولادى. مىسالى, پلاستيكتەن جاسالعان سينتەپونداردى كيىمدەردى جىلىلاۋعا, جاستىق, كورپە جاساۋدا پايدالانۋعا بولسا, قۇرىلىس, جيھاز وندىرىسىندە, سونداي-اق دەكوراتيۆتى بۇيىمدار, ۇستەل, ورىندىقتار جاساۋدا دا پايداسى زور. بۇگىندە جەكەلەگەن كومپانيالار تاپسىرىس بەرگەن كەڭسەگە قاجەتتى بۇيىمدار, مەرەكەلىك سىيلىقتار – پلاستيك ءوندىرىسىنىڭ العاشقى جەتىستىگى. ال شىمبۇلاق دەمالىس ورنىنا قويىلعان ۇستەلدەر, سونداي-اق «نارحوز» ۋنيۆەرسيتەتىندەگى ستۋدەنتتەرگە ارنالعان پارتالار ديزاينى ەرەكشە ءارى ەكولوگيالىق جا­عىنان ءتيىمدى. بۇگىندە كومپانيا­نىڭ جيىر­مادان اسا ءونىم ءتۇرى بار. دانيار باكيموۆتىڭ ايتۋىنشا, پلاس­تيك ىدىستاردى وڭدەۋ ارقىلى ۇزاق جىلدار پايدالانۋعا ارنالعان بۇيىمدار شىعارۋدىڭ مۇمكىندىگى زور. ەكولوگيالىق تازا, ىستىق پەن سۋىققا ءتوزىمدى ءارى سۋ وتكىزبەيتىن ونىمدەر ال­دا­عى ۋاقىتتا ىشكى نارىقتا زور سۇرانىسقا يە بولارى ءسوزسىز. مى­سالى, «دسپ» ماتەريال­دارى زياندى قالدىقتار بولەتىن بولسا, پلاستيك ءوندىرىسى زالالسىز ءارى قالدىقسىز ءوندىرىس سانالادى. وسى ورايدا الداعى جوسپارىمەن ءبولىسىپ وتكەن دانيار باكيموۆ ەكوپانەلدەر وندىرىسىنە دە توقتالدى.

بۇگىندە «Rocket Plastic» كوم­پانياسى وڭىرلەردە شەبەرحانالار اشۋدى جوسپارلاپ وتىر. شەبەرحانالاردى دامىتۋدىڭ ماقساتى, بىرىنشىدەن ەكولوگيانى ساقتاۋ بولسا, ەكىن­شىدەن, قوسىمشا جۇمىس ورىندارىن اشۋعا مۇمكىندىك بەرەدى. بۇل باعىتتا ەكولوگيا, گەولوگيا جانە تابيعي رەسۋرستار مينيسترلىگىمەن كەلىسسوزدەر جۇرگىزىلۋدە.

اي سايىن وندىرىسكە وقۋشى­لاردى, ستۋدەنتتەردى تارتۋ ارقىلى قوعامنىڭ قورشاعان ورتاعا دەگەن سۇيىسپەنشىلىگىن ارتتىرىپ, جاس­تاردى ەڭبەككە باۋلۋداعى بۇل ءوندىرىستىڭ تاجىريبەسى وزگەلەرگە ۇلگى. ماشينا قۇرىلىسى مامان­دىعىندا وقيتىن ستۋدەنتتەرگە وندىرىستەگى قۇرال-جابدىقتارمەن جۇمىس ىستەپ, ۇيرەنۋ مۇمكىندىگى بار. سونداي-اق كومپانياداعى الەۋمەتتىك جوبا – ۆەلوشرەدەر ار­قىلى جاستارعا پلاستيك وڭدەۋ ءون­دىرىسىنىڭ تيىمدىلىگىن تانىستىرۋ دا – ناتيجەلى باستامالاردىڭ ءبىرى.

دانيار وندىرىستە پلاستيك­ بۇيىم­داردى ماركاسىنا قاراي سۇرىپتاپ بارىپ وڭدەۋ­گە جىبەرى­لەتىنىن ايتادى. بۇگىن­دە ەلىمىزدە پلاس­تيك ىدىستار­دى جيناپ, ونى وتكىزەتىن كومپانيالار بارشىلىق. بىراق ولاردىڭ شيكىزاتتى بىردەن شەتەلدەرگە وتكىزۋى ىشكى نارىققا كەرى ىقپالىن تيگىزىپ وتىر. مى­سالى, ءبىر كگ ءونىمدى 200 تەڭگەگە وتكىزىپ, ناتيجەسىندە شەتەلدەردەن دايىنىن بەس ەسە قىمبات باعاعا ساتىپ الامىز. كەرىسىنشە, شيكىزاتتان دايىن ونىمگە دەيىنگى وتاندىق ءوندىرىستى دامىتۋ ارقىلى ىشكى نارىقتى قولجەتىمدى باعاداعى بۇيىمدارمەن قامتاماسىز ەتۋ ۋاقىت كۇتتىرمەيدى. قازىرگى كەزدە «Rocket Plastic» ءوندىرىسى الماتى قالاسى اكىمدىگىنە ۇسىنعان جوبا­لا­رى اياسىندا قالانىڭ دەمالىس پاركتەرىنە وتىراتىن ەكولو­گيالىق ورىندىقتار, باسقا دا ەكولوگيالىق ءتيىمدى جوبالاردى ازىر­لەۋدە.

الماتى