مەلبۋرندە اياقتالعان اۋستراليانىڭ اشىق بىرىنشىلىگىنەن كەيىن الەمدىك رەيتينگ قايتا جاڭارتىلدى. قازاقستاندىق تەننيسشىلەر اراسىندا ەڭ ۇزدىك كورسەتكىش ەلەنا رىباكيناعا تيەسىلى. بۇل كۇندەرى ەلىمىزدىڭ ءبىرىنشى راكەتكاسى اتانىپ وتىرعان ارۋ WTA رەيتينگىندە 25-ورىندا تۇر. ەگەر وتكەن تاريحقا زەر سالساق, وسى سپورت ءتۇرىن سەرىك ەتكەن جەرلەستەرىمىزدىڭ اراسىنان 2012 جىلى ءدال وسى مەجە ياروسلاۆا شۆەدوۆاعا باعىنعان ەدى. اراعا سەگىز جىلعا جۋىق ۋاقىت سالىپ, وسى ناتيجەنى 20 جاستاعى رىباكينا قايتالاپ وتىر. ال سول سپورتشى جايىندا ءبىز نە بىلەمىز؟
ەلەنا 1999 جىلدىڭ 17 ماۋسىمىندا ماسكەۋدە دۇنيەگە كەلدى. بەس جاسىنان تەننيسپەن اينالىسىپ, كوپ ۇزاماي مايتالمان مامانداردىڭ قىراعى نازارىنا ىلىكتى. ءوز قۇربىلارى اراسىندا رەسەيدىڭ ىشكى بىرىنشىلىكتەرى مەن حالىقارالىق تۋرنيرلەردە بىرنەشە مارتە توپ جاردى. جاسوسپىرىمدەر اراسىنداعى ەۋروپا بىرىنشىلىگىنىڭ كوماندالىق سايىسىندا جەڭىمپاز اتاندى. وسى ورايدا جاس دارىن كەزىندە كسرو-نىڭ ءبىرىنشى راكەتكاسى اتانىپ, توقسانىنشى جىلداردىڭ باسىندا الەمدىك رەيتينگتە «توپ-10» ويىنشىنىڭ قاتارىنا قوسىلعان اتاقتى اندرەي چەسنوكوۆتىڭ قول استىندا جاتتىققانىن ايتا كەتكەن ابزال.
2017 جىلى اۋستراليانىڭ اشىق بىرىنشىلىگىنىڭ جاسوسپىرىمدەر اراسىنداعى جارىسىنىڭ جارتىلاي فينالىنا جەتكەندە, ايتۋلى تەننيسشى جايىندا ساڭلاق سپورتشىلار تاراپىنان كوپتەگەن جىلى لەبىزدەر ايتىلا باستادى. ماسەلەن, كەزىندە الەمنىڭ ءبىرىنشى راكەتكاسى اتانعان ەۆگەني كافەلنيكوۆ باق وكىلدەرىنە بەرگەن سۇحباتتارىنىڭ بىرىندە: «ەلەنا رىباكينانىڭ ەسىمىن جادىڭىزدا جاقسىلاپ ساقتاڭىزدار. بىرەر جىلدان كەيىن بۇل قىزدىڭ رەسەي تەننيسىنىڭ جارقىن جۇلدىزىنا اينالاتىنىنا مەنىڭ قىلاۋداي دا كۇمانىم جوق», دەپ ءتىل قاتقانى دا ەسىمىزدە.
ءيا, كەزىندە «كالاشنيكوۆ» دەگەن لاقاپ اتقا يە بولعان ايگىلى سپورتشى دارىندى جاستىڭ بولاشاعىن دۇرىس بولجاعان ەكەن. راسىندا دا, بۇل كۇندەرى ول الەمدەگى ۇزدىك ويىنشىلاردىڭ ساناتىنا قوسىلىپ وتىر. بىراق كافەلنيكوۆ تە ءبىر جەردە قاتەلەستى. ولاي دەۋگە نەگىز, ەلەنا رىباكينا بۇگىنگى تاڭدا رەسەيدىڭ ەمەس, قازاقستان تەننيسىنىڭ جارقىن جۇلدىزى!
جالىنداپ ءوسىپ كەلە جاتقان شاعىندا رەسەي تاراپىنان رىباكيناعا ءتيىستى قولداۋ كورسەتىلمەدى. سوعان نارازى بولعان ول قازاقستان ازاماتتىعىن الىپ, ءبىزدىڭ ەلدىڭ تۋى استىندا ونەر كورسەتۋدى قۇپ كوردى. سول تۇستا رىباكينا WTA رەيتينگىندە 191 ورىندا تۇرعان. الاش توپىرعانىنا تابانى تيگەن بەتتە ەلەنانىڭ ەكىنشى تىنىسى اشىلدى. اينالدىرعان ءبىر جارىم جىل ارالىعىندا ول باقانداي 165 ساتىعا جوعارلادى. اسىرەسە وتكەن جىلدىڭ سوڭى مەن بيىلعى جىلدىڭ باسى ايتۋلى ويىنشى ءۇشىن ءساتتى بولدى. رىباكينا شەنچجەندەگى ءتۋرنيردىڭ فينالىنا دەيىن جەتىپ, حوبارتتا الدىنا جان سالمادى. ال اۋستراليانىڭ اشىق بىرىنشىلىگىندە ءۇشىنشى كەزەڭگە دەيىن جەتىپ, سول مەجەدە الەمنىڭ ءبىرىنشى راكەتكاسى ەشلي بارتيگە جول بەردى. وسى تابىستارىنىڭ ارقاسىندا ەلەنا ءداپ قازىر WTA رەيتينگىندە 25-ورىندى يەلەنۋدە.
تاريحقا جۇگىنسەك, ءار جىلدارى قازاقستاننىڭ تۋى استىندا ونەر كورسەتكەن تەننيسشىلەر اراسىندا الەمدىك رەيتينگتە ەڭ جوعارى ناتيجەگە بۇعان دەيىن ياروسلاۆا شۆەدوۆا قول جەتكىزگەن. 2012 جىلدىڭ كۇزىندە ول 25 ورىندى ەنشىلەدى. وسىدان ەكى جىل بۇرىن يۋليا پۋتينتسەۆا 27 ساتىعا جايعاسىپ, ءوز جانكۇيەرلەرىن ءبىر قۋانتقان ەدى. 2015 جىلدىڭ قاڭتار ايىندا زارينا دياستىڭ 31 ورىنعا كوتەرىلگەنى ەسىمىزدە. بۇل كۇندەرى پۋتينتسەۆا – 34, دياس – 63 ساتىعا تابان تىرەدى.
ءسوز ورايى كەلگەندە, ەلەنا ليحوۆتسەۆا جايىندا دا ايتا كەتسەك ەش ايىبى جوق دەگەن ويدامىز. 1975 جىلى الماتىدا تۋىپ-وسكەن ول 20 جاسقا تولعانعا دەيىن ءتۇرلى جارىستاردا قازاقستاننىڭ نامىسىن قورعادى. بىراق كەيىننەن رەسەيگە قونىس اۋداردى. سول جاقتا ءجۇرىپ, كوپتەگەن ءدۇبىرلى دودالاردا دارالاندى. ليحوۆتسەۆا WTA ساناتىنداعى تۋرنيرلەردى بارلىعى 27 مارتە ۇتتى. رولان گارروستىڭ جارتىلاي فينالىنا جانە ۋيمبلدون مەن اۋستراليانىڭ اشىق بىرىنشىلىگىنىڭ شيرەك فينالىنا دەيىن جەتتى. جۇپتىق سايىستارداعى كورسەتكىشتەرى تىپتەن كەرەمەت. الماتىنىڭ تۋماسى 1999 جىلى الەمدىك رەيتينگتەگى ءوزىنىڭ ەڭ بيىك ناتيجەسىنە قول جەتكىزىپ, 15 ورىندى يەلەندى. الايدا سول تۇستا ونىڭ رەسەيدىڭ تۋى استىندا ويناعانى ءمالىم. سوندىقتان دا ليحوۆتسەۆانىڭ وسى تابىستارىنىڭ بارلىعى وزگە مەملەكەتتىڭ ەنشىسىنە جازىلدى. وعان قازاقستاننىڭ ەش قاتىسى جوق.
حورۆاتيالىق باپكەر ستەفانو ۆۋكوۆتىڭ قول استىندا جاتتىعىپ جۇرگەن ەلەنا رىباكينا وسى كۇنگە دەيىن WTA تۋرنيرلەرىندە ەكى مارتە جانە ITF دودالارىندا ءتورت رەت توپ جاردى. الەمدىك رەيتينگتە «توپ-25» ويىنشىنىڭ قاتارىنا قوسىلىپ وتىر. راسىمەن دە, 20 جاستاعى تەننيسشىنىڭ قازىرگى قارقىنى قۋانتارلىق. ال كەيىپكەرىمىزدىڭ ءوزى: «بۇل ءالى باسى عانا. كەلەشەكتە قوماقتى تابىستارعا قول جەتكىزۋ ءۇشىن بارىمدى سالامىن» دەيدى.
ەلىمىزدىڭ ءبىرىنشى راكەتكاسىنىڭ باستى ماقساتى – تورتكۇل دۇنيەنىڭ تەڭدەسسىز تەننيسشىلەرىنىڭ ساناتىنا قوسىلۋ. الداعى ءدۇبىرلى جارىستاردا جاسىنداي جارقىراپ, بارىنشا تابىستى ونەر كورسەتىپ, مول ولجاعا كەنەلۋ. «ۇلكەن دۋلىعا» تۋرنيرلەرىندە توپ جارۋ. سونداي-اق ءساتى كەلىپ جاتسا, الەمدىك رەيتينگتە ۇزدىكتەر كوشىن باستاۋ...