«Qazaqstan» تەلەارناسىنداعى «اشىق الاڭ» باعدارلاماسىنىڭ تىكەلەي ەفيرىندە ءبىلىم جانە عىلىم ءمينيسترى اسحات ايماعامبەتوۆ پەداگوگ مارتەبەسىنە قاتىستى ارنايى زاڭ كۇشىنە ەنگەنىمەن, مۇعالىمدەردىڭ مارتەبەسىن ءبىر عانا زاڭمەن كوتەرۋ مۇمكىن ەمەس ەكەنىن ايتتى.
«پەداگوگ مارتەبەسى تەك زاڭمەن وزگەرمەيدى. بۇل مۇعالىمدەردىڭ وزىنە, ءوزىنىڭ بىلىكتىلىگى مەن جەكە قاسيەتتەرىنە بايلانىستى جانە قوعامعا بايلانىستى. «پەداگوگ مارتەبەسى تۋرالى» زاڭ ەڭ الدىمەن بالالارعا ارنالعان. جاسىراتىنى جوق, مۇعالىمدەر بىزدە زال تولتىرادى. قۇجات جيناۋ كەرەك بولسا, مۇعالىمدەردى جىبەرەدى. مۇعالىمدەر بىزدەن اۋلا ارالايىق پا, الدە بالالارعا ءبىلىم بەرەيىك پە دەپ سۇراپ جاتتى. ەسەپتەر, قاعازباستىلىق, وسىنىڭ بارلىعى زاڭ قابىلدانار الدىندا بولعان ماسەلە», - دەدى مينيستر.
ونىڭ ايتۋىنشا, مۇعالىمدى قىزمەتتەن تىس جۇمىسقا تارتقان ادامدارعا جازا قولدانىلادى.
«باسىندا ەسكەرتۋ جاسالادى. ودان كەيىن 20 اەك ءتيىستى ايىپپۇلدار بار», - دەدى ول.