بۇل تۋرالى مەملەكەت باسشىسى قاسىم-جومارت توقاەۆ Twitter پاراقشاسىندا جازدى.
«بۇل كۇندەرى ازاماتتارىمىزدان كوپتەگەن ءوتىنىش كەلىپ تۇسۋدە. دۇنگەن بالاسىنىڭ بەينەجازباسىنا نازار اۋداردىم. جاۋاپ بەرەمىن: مەنىڭ مىندەتىم - ەلىمىزدە بەيبىتشىلىك پەن كەلىسىمدى قامتاماسىز ەتۋ» دەپ جاۋاپ بەردى قاسىم-جومارت توقاەۆ.
جۇما كۇنى كەشقۇرىم جامبىل وبلىسىنىڭ قورداي اۋدانى ماسانشى اۋىلى تۇرعىندارىنىڭ اراسىندا توپتىق توبەلەس بولدى. قازاقتار مەن دۇنگەندەر اراسىنداعى كەلىسپەۋشىلىكتىڭ سوڭى جانجالعا ۇلاسقان. ماسانشىداعى قاقتىعىس تۋرالى ءتۇرلى بەينەتۇسىرىلىمدەر مەن اقپاراتتار سول كۇنى-اق كەشكە قاراي الەۋمەتتىك جەلىلەردە تاراپ كەتتى.
قاقتىعىسقا بايلانىستى مەملەكەت باسشىسى قاسىم-جومارت توقاەۆ وقيعا سالدارىن جويۋ ماقساتىندا ۇكىمەت كوميسسياسىن قۇرۋدى تاپسىرعان بولاتىن. پرەزيدەنتتىڭ تاپسىرماسى بويىنشا كەشە قازاقستان رەسپۋبليكاسى پرەمەر-ءمينيسترىنىڭ ورىنباسارى بەردىبەك ساپارباەۆ باستاعان ۇكىمەت كوميسسيانىڭ جامبىل وبلىسىنا ارنايى كەلگەنى حابارلانعان ەدى.