جامبىل وبلىسىنىڭ قورداي اۋدانىندا بولعان قاقتىعىسقا بايلانىستى مەملەكەت باسشىسى قاسىم-جومارت توقاەۆ وقيعا سالدارىن جويۋ ماقساتىندا ۇكىمەت كوميسسياسىن قۇرۋدى تاپسىرعان بولاتىن. پرەزيدەنتتىڭ تاپسىرماسى بويىنشا بۇگىن قازاقستان رەسپۋبليكاسى پرەمەر-ءمينيسترىنىڭ ورىنباسارى بەردىبەك ساپارباەۆ باستاعان ۇكىمەت كوميسسياسى جامبىل وبلىسىنا ارنايى كەلدى.
بەردىبەك ساپارباەۆ قورداي اۋدانىنىڭ ورتالىعى قورداي اۋىلىنداعى اۋرۋحاناعا بارىپ, توپتىق توبەلەس كەزىندە زارداپ شەككەن تۇرعىندارمەن سويلەستى. كوميسسيا توراعاسىنا مەديتسينالىق مەكەمەلەرگە 12 ادامنىڭ جاتقىزىلعانى, 20 ادامنىڭ باقىلاۋدا جانە ەمحانادان شىعارۋعا ازىرلەنۋدە ەكەنى باياندالدى. سونىمەن قاتار 5 پاتسيەنت سانيتاريالىق اۆياتسيا جەلىسى بويىنشا الماتى قالاسىنا, 1 پاتسيەنت تاراز قالاسىنا اۋىستىرىلعان. بارلىعىنا قاجەتتى مەديتسينالىق كومەك تولىق كولەمدە كورسەتىلۋدە. جالپى, مەديتسينالىق كومەككە بارلىعى 127 ادام جۇگىنگەن, ونىڭ ىشىندە 84 ادام تەكسەرۋدەن سوڭ ۇيلەرىنە قايتارىلعان.
قورداي اۋدانىندا بولعان بەردىبەك ساپارباەۆ جەرگىلىكتى اقساقالدارمەن دە كەزدەسىپ, بولعان قاقتىعىستىڭ نەگىزگى سەبەپتەرى تۋرالى سۇرادى. بۇل رەتتە سورتوبە اۋىلىنىڭ تۇرعىنى ارلي مۋساروۆ مۇنىڭ تۇرمىستىق كيكىلجىڭ ەكەنىن, قازىر جاعدايدىڭ تۇراقتى ەكەنىن ايتا كەلىپ, بارلىعى دا زاڭ بويىنشا, قۇقىقتىق سالا اياسىندا بولسا ەكەن دەگەن تىلەگىن جەتكىزدى. بەردىبەك ماشبەك ۇلى اۋدانداعى تۇراقتىلىقتى قامتاماسىز ەتۋ ءۇشىن پرەزيدەنت تاپسىرماسى بويىنشا ۇكىمەت كوميسسياسى جامبىل وبلىسىنا ارنايى كەلگەنىن اتاپ ءوتتى.
ء«بىز سىزدەردەن, قوعامدا بەدەلى بار اقساقالداردان تۇرعىندارعا ءبىزدىڭ جاعدايدى وبەكتيۆتى تۇرعىدا انىقتاۋ ءۇشىن كەلگەنىمىزدى تۇسىندىرۋلەرىڭىزدى وتىنەمىز. كىنالىلەر جازاسىن تارتادى. بارلىق زارداپ شەككەندەرگە قاجەتتى مەديتسينالىق جانە باسقا دا كومەك كورسەتىلىپ جاتىر. قازىر باستى ماسەلە – وڭىردەگى تۇراقتىلىقتى, قۇقىقتىق ءتارتىپ پەن قاۋىپسىزدىكتى قامتاماسىز ەتۋ» دەدى بەردىبەك ساپارباەۆ.
جامبىل وڭىرىنە ارنايى كەلگەن ۇكىمەت كوميسسياسى قورداي, ماسانشى, اۋقاتتى, سورتوبە ەلدى مەكەندەرىندەگى قازىرگى جاعدايمەن تانىستى. سونىمەن قاتار جەرگىلىكتى تۇرعىندارمەن كەزدەسىپ, تۇرعىن ۇيلەردى, الەۋمەتتىك جانە كوممەرتسيالىق نىسانداردى ارالادى. وقيعا كەزىندە قايتىس بولعانداردىڭ وتباسىلارىمەن كەزدەستى. سونىمەن قاتار ۇكىمەت كوميسسياسى جەرگىلىكتى جەردە الەۋمەتتىك-ەكونوميكالىق جانە گۋمانيتارلىق سيپاتتاعى ماسەلەلەردى شەشۋ بويىنشا شۇعىل شارالار قابىلدادى. كوميسسيا پرەزيدەنت تاپسىرماسى نەگىزىندە جامبىل وبلىسىنىڭ اكىمدىگىمەن بىرلەسىپ, قازا تاپقانداردى جەرلەۋدى ۇيىمداستىرۋ, كەلتىرىلگەن زالالدى باعالاۋ جانە زارداپ شەككەن مەنشىك نىساندارىن قالپىنا كەلتىرۋ بويىنشا جۇمىس اتقاراتىن بولادى.
جامبىل وبلىسى