قوردايداعى قاقتىعىس: ايىپتىلار انىقتالۋدا, جاعداي باقىلاۋدا

بۇل ماسەلەگە مەملەكەت باسشىسى قاسىم-جومارت توقاەۆ ايرىقشا نازار اۋدارىپ, ءوزىنىڭ Twitter-دەگى پاراقشاسىندا «جامبىل وبلىسى قورداي اۋدانىندا بۇزاقىلىق سيپاتتاعى جاپپاي توبەلەس بولدى. ونى ارانداتۋشىلار ءوز پايداسىنا قولدانباق بولعان. پوليتسيا جاعدايدى رەتتەپ, ءوز باقىلاۋىنا الدى. قوعامدىق ءتارتىپتى بۇزعاندار جاۋاپكەرشىلىككە تارتىلادى», دەپ جازعان بولاتىن. سونىمەن قاتار, پرەزيدەنت قاسىم-جومارت توقاەۆ جامبىل وبلىسىنداعى جاعدايعا بايلانىستى مالىمدەمە جاسادى. مەملەكەت باسشىسى قاقتىعىس كەزىندە قازا بولعان ازاماتتاردىڭ وتباسىلارىنا كوڭىل ايتىپ, ۇكىمەت كوميسسياسىن قۇرۋدى تاپسىرعانىن, كوميسسيا بولعان وقيعانىڭ سەبەبىن انىقتايتىنىن جەتكىزدى. «بەيبىتشىلىك پەن قوعامدىق كەلىسىم – ءبىزدىڭ مەملەكەتىمىزدىڭ بەرىك نەگىزى. حالقىمىز قيىن-قىستاۋ زامانداردا ءوزىنىڭ بىرتۇتاستىعىن ساقتاپ قالعان. سوندىقتان ءبىز كەيبىر ازاماتتارعا, سونىڭ ىشىندە ارانداتۋشىلارعا ەلىمىزدىڭ باستى قۇندىلىعىن – ىنتىماق-بىرلىگىمىزدى بۇزۋعا جول بەرمەيمىز. بۇل ەلىمىزدەگى بارشا ازاماتتارعا ورتاق تىلەك دەپ سانايمىن. ازاماتتاردى جالعان قاۋەسەتتەرگە بوي الدىرماۋعا, قوعامدىق قاۋىپسىزدىكتى قامتاماسىز ەتۋ جۇمىسىندا قۇقىق قورعاۋ ورگاندارىنا كومەك بەرۋگە شاقىرامىن. مەملەكەتتىك ورگاندار تۋىنداعان ماسەلەلەردى شەشۋ ءۇشىن بارلىق قاجەتتى شارالاردى قابىلدايدى», دەدى پرەزيدەنت.

  قازىرگى كەزدە قاقتىعىستى باستاۋشىلار مەن قاتىسۋشىلار انىقتالۋ ۇستىندە. جامبىل وبلىسىنىڭ پوليتسيا دەپارتامەنتى ازاماتتاردان تەك رەسمي اقپاراتقا عانا سەنۋدى, قاۋاسەتتەر مەن ءتۇرلى جالعان اقپاراتتاردى تاراتپاۋدى سۇراپ وتىر. ويتكەنى, ءتۇرلى الەۋمەتتىك جەلىلەردە وتىرىك-راسى بەيمالىم ءتۇرلى اقپاراتتار مەن بەينەجازبالاردىڭ تاراپ كەتكەنى بەلگىلى. قورداي اۋدانى, ماسانشى اۋىلىندا ورىن العان توبەلەس بويىنشا نۇر-سۇلتان قالاسىندا ورتالىق كوممۋنيكاتسيالار قىزمەتىندە قازاقستان رەسپۋبليكاسىنىڭ ىشكى ىستەر ءمينيسترى ەرلان تۇرعىمباەۆ, قازاقستان رەسپۋبليكاسىنىڭ اقپارات جانە قوعامدىق دامۋ ءمينيسترى داۋرەن اباەۆ جانە قازاقستان رەسپۋبليكاسى باس پروكۋرورىنىڭ ورىنباسارى بولات دەمباەۆتىڭ قاتىسۋىمەن بريفينگ وتكەن بولاتىن. وسى جەردە الىپقاشپا اڭگىمەلەرگە جول بەرىلمەۋ كەرەكتىگى تاعى دا ايتىلىپ, حالىققا ناقتى مالىمەتتەر بەرىلدى. «7 اقپاندا ساعات 19:00-دا جامبىل وبلىسىنىڭ پوليتسيا دەپارتامەنتىنىڭ كەزەكشى بولىمىنە قورداي اۋدانىنىڭ ماسانشى اۋىلىنىڭ جانىندا 70-تەن استام ادام توبەلەسىپ جاتىر دەگەن اقپارات كەلىپ ءتۇستى. زاڭسىز ارەكەتتەردى توقتاتۋ ءۇشىن وقيعا ورنىنا دەرەۋ پوليتسيا قىزمەتكەرلەرى جىبەرىلدى. سول جەردە بولعان ادامدار توبەلەستى ۆيدەوعا ءتۇسىرىپ, الەۋمەتتىك جەلى ارقىلى تاراتقان. ناتيجەسىندە, باسقا اۋىلداردان كەلگەن 300-دەن استام ازامات توبەلەسكە قوسىلىپ كەتتى. ەكى جاق ءبىر-بىرىنە تاس لاقتىرىپ, تاياقپەن ۇرىپ, قارۋ قولداندى. ناتيجەسىندە 8 ادام قايتىس بولدى. 40 ادامنان استام جاراقات الدى. اراسىندا قارۋدان زارداپ شەككەندەر دە بار. جاعدايدى تۇراقتاندىرۋ ءۇشىن وقيعا ورنىنا ىشكى ىستەر ورگاندارىنىڭ قوسىمشا كۇشتەرى جىبەرىلدى», دەدى ەرلان تۇرعىمباەۆ. قازىرگى كەزدە ماسانشى اۋىلىندا بولعان جاعدايدىڭ سەبەبىن انىقتاۋ ءۇشىن جەدەل تەرگەۋ توبى قۇرىلعان. سول بويىنشا جۇمىستار اتقارىلۋدا.

  سونىمەن قاتار, داۋرەن اباەۆ قورداي اۋدانىنداعى جاعداي تۋرالى اقپارات بەرگەندە جۋرناليستەردى وبەكتيۆتى بولۋعا شاقىردى. «ازاماتتاردى الاڭداتاتىن, ەلدى شۋلاتاتىن مالىمەت بەرمەۋدى سۇرايمىن. بايقاساڭىزدار, مىنا جانجال ەڭ باسىندا تەك ءبىر اۋىل دەڭگەيىندە بولعان. الايدا ۋاتساپ, تەلەگرامم سياقتى مەسسەندجەرلەر ماسەلەنى قوزدىرعان. جاعدايدى ۋشىقتىرعان. ناتيجەسىن كورىپ وتىرسىزدار. بىرنەشە ادام قازا تاپتى, جاراقات الدى. قانشاما ءۇي-جاي ورتەندى. سوندىقتان, ۇمىتپاۋ كەرەك, ءاربىر تاراتقان اقپاراتقا جاۋاپ بەرەمىز. بۇل دا ايتىلعان ءسوز سياقتى قايتارا المايسىز. سوندىقتان اۋديو-ۆيدەونى تاراتقاندا اباي بولىڭىزدار. ءسىز تاراتقان اقپاراتتان كىناسىز بىرەۋدىڭ زارداپ شەكپەۋىن ويلاۋ قاجەت. وسى تۇستا تەك جۋرناليستەرگە عانا ەمەس, ەلىمىزدىڭ ءاربىر ازاماتىنا ەسكەرتكىم كەلەدى. ءبىز «ادامزاتتىڭ ءبارىن ءسۇي, باۋىرىم دەپ», دەگەن ابايدىڭ ەلىمىز عوي. اسىعىس شەشىم قابىلدامايىق. سابىر ساقتايىق. بۇل جانجالدى باستاعاندار ەشقايدا قاشىپ قۇتىلا المايدى. قازىر ينتەرنەت, بارلىق الەۋمەتتىك جەلىلەر, مەسسەندجەرلەر مونيتورينگ جاسالۋدا. ول جەردە ۆيدەو-اۋديو حابارلاردىڭ بارلىعى قارالاتىن بولادى. قازىردىڭ وزىندە بىرنەشە قولدانۋشىلار انىقتالىپ وتىر. ولار ۇلتارالىق ارازدىقتى قوزدىراتىن حابارلار تاراتقان. ول مالىمەتتەر قۇقىق قورعاۋ ورگاندارىنا بەرىلەدى», دەدى داۋرەن اباەۆ. ال, بولات دەمباەۆ بۇل جاعدايدىڭ باس پروكۋروردىڭ دا باقىلاۋىندا ەكەنىن, جاعدايدى تۇراقتاندىرۋ ماقساتىندا  جۇمىستار اتقارىلعانىن ايتتى. سونىمەن قاتار, جالعان اقپارات تاراتۋ زاڭعاي قايشى ارەكەت ەكەنىن, مۇنداي جاعدايدا ادامداردىڭ جاۋاپقا تارتىلاتىنىن اتاپ ءوتتى.

قورداي اۋدانىندا ورىن العان قايعىلى جاعداي بويىنشا پرەزيدەنت قاسىم-جومارت توقاەۆتىڭ تاپسىرماسىمەن ۇكىمەتتىك كوميسسيا قۇرىلدى. ال, جامبىل وبلىسىنىڭ اكىمى اسقار مىرزاحمەتوۆ باستاعان جەرگىلىكتى ءتيىستى باسشىلاردىڭ ءبارى دە بۇگىندە وقيعا ورنىندا. قازىرگى كەزدە وڭىردە جاعداي تۇراقتى. جانجالدىڭ قانداي جاعدايدان شىققانى, ونى كىمدەردىڭ باستاعانى انىقتالۋدا. مەملەكەت باسشىسىنىڭ تاپسىرماسى بويىنشا جامبىل وبلىسىنىڭ اكىمدىگى ۇكىمەتتىك كوميسسيامەن بىرلەسىپ, قازا بولعانداردى جەرلەۋ, زارداپ شەككەندەرگە كومەكتەسۋ جۇمىستارىن ۇيىمداستىرادى.

جامبىل وبلىسى