ينتەرپول اتىراۋ وبلىسىنىڭ بۇرىنعى اكىمى بەرگەي رىسقاليەۆ پەن ونىڭ سىبايلاستارىنا ىزدەۋ جاريالادى. بۇل تۋرالى ەكونوميكالىق قىلمىسقا جانە سىبايلاس جەمقورلىققا قارسى كۇرەس (قارجى پوليتسياسى) اگەنتتىگىنىڭ رەسمي وكىلى مۇرات جۇمانباي بريفينگ كەزىندە ءمالىم ەتتى.
«قازىرگى تاڭعا بەرگەي رىسقاليەۆپەن قىلمىستىق قاۋىمداستىقتا تۇرعان 23 ايىپتالۋشىنىڭ قىلمىستىق ىستەرىمەن تانىسۋ پروتسەدۋراسى ءجۇرىپ جاتىر. بۇلاردىڭ 11-ءى وسى كۇندەرى قاماۋدا وتىرسا, تاعى 10 ادام ۇيقاماققا الىنعان. تاعى ەكى ادام ەشقايدا كەتپەۋ تۋرالى قولحاتپەن ءجۇر. بۇگىنگە دەيىن سوت جۇزىندە بەرگەي رىسقاليەۆ پەن ونىڭ اعاسى امانجان رىسقاليەۆكە, سونداي-اق تاعى 9 ادامعا قاتىستى قاماۋعا الۋ سانكتسياسى بەرىلىپ قويعان. ولارعا حالىقارالىق ىزدەۋ جاريالاندى. ىزدەۋ ينتەرپول جۇيەسى بويىنشا جۇرەدى. بىلايشا ايتقاندا, بۇل قىلمىسكەرلەردى ىزدەۋگە ەندى وسى حالىقارالىق جەلىسى بار ەلدەردىڭ بارلىعى قوسىلادى», - دەدى ول.
رەسمي وكىل سونىمەن بىرگە, ب.رىسقاليەۆتىڭ ءجىتى باسشىلىعىمەن جۇمىس جاساعان اتالعان ۇيىمداسقان قىلمىستىق قاۋىمداستىقتىڭ ارەكەتى 71 ملرد. تەڭگەنىڭ توڭىرەگىنەن ەسەپتەلەتىنىن جەتكىزدى. مەملەكەتكە كەلتىرىلگەن وسىنشاما مولشەردەگى شىعىننىڭ 23 ملن. تەڭگەسى قازىرگە دەيىن قايتارىلدى. مۇنى مۇمكىن ەتكەن قارجى پوليتسياسى بۇدان ءارى قايتارىمدى جالعاستىرۋ ماقساتىندا تاعى جالپى قۇنى 39 ملرد. تەڭگە تۇراتىن م ۇلىككە توقتاۋ سالدى.
قۇرىش نۇرىمبەت.