قازاقستان اسكەري-تەڭىز كۇشتەرىنىڭ «قازاقستان» زىمىراندىق-ارتيللەريالىق كەمەسىنىڭ ەكيپاجى كەمەلىك-جاۋىنگەرلىك وقۋ-جاتتىعۋ بارىسىندا جوعارى باعا الدى. اشىق تەڭىزگە شىققان قازاقستان قارۋلى كۇشتەرى اسكەري-تەڭىز كۇشتەرىنىڭ اسكەري قىزمەتشىلەرى اشىق تەڭىزدە تاكتيكالىق ستسەناريگە سايكەس, كەمەگە شارتتى تۇردە اۋەدەن جانە كاتەردەن شابۋىلدى تويتاردى. شارتتى تۇردە جاپپاي زاقىمداۋ قارۋى, تەڭىز مينالارى قولدانىلۋىنا قارسى ارەكەت ەتتى, ىزدەستىرۋ-قۇتقارۋ ءىس-شارالارىن جۇرگىزدى. بۇل اسكەري ءىس-قيمىلدار «جەكە كەمەمەن تەڭىز ۇرىسىن جۇرگىزۋ» جاتتىعۋىنىڭ شەڭبەرىندە جاسالدى.
كاپيتان-لەيتەنانت ەركەبۇلان ءداركەنباەۆ باسقارعان «قازاقستان» زىمىراندىق-ارتيللەريالىق كەمەسىنىڭ ەكيپاجى قويىلعان ءمىندەتتى نىق سەنىممەن ورىنداپ شىقتى. «تەڭىزشىلەر كەمەنى باسقارۋ مەن كەمەدە بار اتىس قۇرالدارىن قولدانۋدىڭ جاقسى دەڭگەيىن كورسەتتى», – دەپ اسكەري-تەڭىز بازاسىنىڭ كومانديرى ءبىرىنشى ءدارەجەلى كاپيتان ساكەن مانسۇروۆ باعا بەردى.
اسكەري تەڭىزشىلەردىڭ جاتتىعۋلارى كاسپي تەڭىزىنىڭ ايدىنىندا جوسپار بويىنشا جالعاسا بەرمەك. قر قك اتك كەمەلەرىنىڭ ەكيپاجدارى جاۋىنگەرلىك دايىندىق قارقىنىن ارتتىرىپ, جاڭا مىندەتتەردى ورىنداۋعا ازىرلەنۋدە. قازاقستان قارۋلى كۇشتەرى ءاسكەري-تەڭىز كۇشتەرىنىڭ ساپىندا گيدروگرافيالىق, راكەتالىق-ارتيللەريالىق, مينا ترالداۋشى كەمەلەر بار. ال «قازاقستان» زىمىراندىق-ارتيللەريالىق كەمەسى وتاندىق قورعانىس-ونەركاسىپتىك كەشەنىنىڭ العاشقى ءونىمى. بيىل ءساۋىر ايىندا «زەنيت» زاۋىتىندا تاعى دا ءبىر «ورال» اتتى اسكەري كەمە قۇراستىرىلىپ شىقتى. بۇل كەمەنىڭ ەكيپاجى دا وزدەرىنىڭ مىندەتتەرىن اتقارۋعا كىرىستى.
«ەگەمەن-اقپارات».