تاراز قالاسىنداعى جاڭادان سالىنعان 15-شاعىن اۋدانى كونە شاھاردىڭ ساۋلەتىن ارتتىرعان جوبانىڭ ءبىرى. جۋىردا عانا مۇندا 80 پاتەرلى ءۇي ءوڭىر تۇرعىندارىنا بەرىلگەن بولاتىن.
الداعى ۋاقىتتاردا دا بۇل جەردى كوركەيتۋ, تۇرعىندارعا مۇمكىندىگىنشە جاعداي جاساۋ قاراستىرىلعان. بۇگىن تاراز قالاسىنىڭ اكىمى ايتقازى قارابالاەۆ «كونە تاراز» ەتنو-تاريحي كەشەنىندە بيزنەس قۇرىلىم وكىلدەرىمەن كەزدەستى.
كەزدەسۋ بارىسىندا تارازدىڭ ءىرى كاسىپورىندارىنىڭ جەتەكشىلەرى مەن بيزنەس وكىلدەرى 15-شاعىناۋداندى قالانىڭ جاڭا مادەني-ىسكەرلىك ورتالىعىنا اينالدىرۋ جونىندەگى جوبالارىمەن تانىستى.
سونىمەن قاتار, بيزنەس وكىلدەرىنە ەندى سالىناتىن نىسانداردىڭ ەسكيزى دە تانىستىرىلدى. ولارعا 15-شاعىن اۋداننىڭ جوبالىق-سمەتالىق قۇجاتتارى مەن قاجەتتى ينفراقۇرىلىمدارمەن قامتاماسىز ەتىلگەندىگى تۋرالى مالىمەت بەرىلدى. بۇل باستاماعا بىرقاتار بيزنەس وكىلدەرى قىزىعۋشىلىق ءبىلدىرىپ, قالتالى ازاماتتار جەر تەلىمى, قۇرىلىس كولەمى مەن ونىڭ مەرزىمى تۋرالى سۇراقتارىنا ءتيىستى مامانداردان ناقتى جاۋاپتار الدى.
اكىم ايتقازى قارابالاەۆ قالتالى ازاماتتاردى قالانىڭ كوركەيىپ, گۇلدەنۋىنە ءوز ۇلەستەرىن قوسۋعا جانە جاڭا جوباعا ءوز ينۆەستيتسيالارىن سالۋعا شاقىردى.
جامبىل وبلىسى