الماتىدا قالا اكىمى باقىتجان ساعىنتاەۆتىڭ شەشىمىمەن قالا اكىمىنىڭ ورىنباسارى ەرجان باباقۇماروۆ توراعالىق ەتەتىن كوروناۆيرۋس ينفەكتسياسىن تاراتۋدى ەسكەرتۋ بويىنشا وڭىرلىك شتاب قۇرىلدى.
شتاب ەل ۇكىمەتىنىڭ شەشىمدەرىن ورىنداۋ جانە الماتىدا كوروناۆيرۋس ينفەكتسياسىن تاراتۋعا جول بەرمەۋ بويىنشا ۇلتتىق جوسپاردى جۇزەگە اسىرۋ ءۇشىن قۇرىلدى. شتاب دەنساۋلىق ساقتاۋ ءمينيسترى ەلجان ءبىرتانوۆتىڭ جانە قازاقستاننىڭ باس سانيتارلىق دارىگەرى جانداربەك بەكشيننىڭ ءىس-قيمىلدى جالپى ۇيلەستىرۋى بويىنشا جۇمىس ىستەيدى.
وڭىرلىك شتابتىڭ العاشقى وتىرىسى بارىسىندا الماتى قالاسىندا سانيتارلىق-ەپيدەميولوگيالىق جانە پروفيلاكتيكالىق شارالاردى كۇشەيتۋدىڭ شارالارى تۋرالى ماسەلەلەر قارالدى.
بۇگىندە قالالىق ۆەدومستۆوارالىق جوسپار ازىرلەندى. ەلىمىزدىڭ تۇرعىنى كوپ مەگاپوليسىنىڭ اۋماعىنا كوروناۆيرۋس ينفەكتسياسىنىڭ ەنۋىنە جانە تاراۋىنا جول بەرمەۋ ماقساتىندا تۋريستىك جانە ميگراتسيالىق لەك بارلىق باعىتتار بويىنشا باقىلاۋعا الىنعان. ۆيرۋس تاراعان ەلدەردەن كەلگەندەر حالىقارالىق اۋەجاي مەن تەمىر جول ۆوكزالدارىندا مىندەتتى تۇردە تەرمومەتريادان وتەدى. بۇل ءۇشىن جىلۋۆيزورلارى مەن ءپورتاتيۆتى ينديكاتورلار قولدانىلادى. ودان وزگە, الماتى قالاسى بەتپەردەلەرمەن, دارىلىك پرەپاراتتارمەن, شپريتستەرمەن جانە باسقادا قۇرالدارمەن جەتكىلىكتى قامتاماسىز ەتىلگەن. مەديتسينالىق زاتتاردىڭ قاجەتتى رەزەرۆى بار. جالپى, قالاداعى جاعداي تۇراقتى جانە ۇنەمى قاتاڭ باقىلاۋدا.
وتىرىستىڭ قورىتىندىسى بويىنشا قالا اكىمىنىڭ ورىنباسارى – شتاب توراعاسى ەرجان باباقۇماروۆ وتكىزۋ پۋنكتتەرىندە باقىلاۋدى كۇشەيتۋ بويىنشا بىرقاتار حاتتامالىق تاپسىرمالار بەردى. مەملەكەتتىك ورگاندارعا كوروناۆيرۋس ينفەكتسياسىنىڭ ەنۋىنە جانە تاراۋىنا جول بەرمەۋ شارالارىنىڭ كەشەندى جوسپارىن ورىنداۋدى جانە مونيتورينگ جۇرگىزۋدى قامتاماسىز ەتۋ تاپسىرىلدى. دارىلەر مەن مەديتسينالىق زاتتاردى, ونىڭ ىشىندە مەديتسينالىق بەتپەردەلەردى وتكىزۋدە باعالىق كەلىسىمدەرگە جول بەرمەۋدىڭ بارلىق شارالارىن قابىلداۋ بويىنشا جەكە تاپسىرما بەرىلدى.
وڭىرلىك شتابتىڭ وتىرىسى اپتاسىنا ءبىر رەت جانە قاجەت بولعان جاعدايدا وتەدى.