س.تورايعىروۆ اتىنداعى پاۆلودار وبلىستىق كىتاپحاناسى وبلىستىق مادەنيەت, تىلدەردى دامىتۋ جانە ارحيۆ ءىسى باسقارماسىنىڭ باستاماسىمەن «بيبليوكەرۋەن» اتتى تىڭ جوبانى قولعا الدى. جاڭا جوبا اياسىندا كىتاپحاناشىلار وڭىردەگى كەيبىر مەكەمەلەر مەن ۇيىمدارعا بارىپ كوشپەلى كورمە وتكىزەدى.
العاشقى كىتاپ كورمەسى وبلىس ورتالىعىنداعى ەستاي كوشەسى 40 ءۇي مەكەنجايىندا ورنالاسقان «حالىق بانك» اق بولىمشەسىندە ءوتتى. اتالعان كىتاپ كورمەسىنە وبلىستىق كىتاپحانانىڭ سيرەك كەزدەسەتىن كىتاپ قورىنان تاڭداۋلى تۋىندىلار قويىلدى. سورەدەگى كىتاپتاردىڭ ەڭ كونەسى 1777 جىلى جارىق كورگەن. بۇدان بولەك, ۇلى ويشىل, فيلوسوف, اقىن اباي قۇنانباي ۇلىنىڭ شىعارماشىلىعىنان سىر شەرتەتىن كىتاپتار دا كورمەدەن ورىن الدى. اتاپ ايتساق, م.اۋەزوۆ دايىنداعان 1945 جىلى رەسەي استاناسى ماسكەۋدە جارىق كورگەن ابايدىڭ تاڭدامالى شىعارمالار جيناعى, 1936 جىلى باسىلعان ۆس.روجدەستۆەنسكيدىڭ اباي شىعارمالارىنىڭ اۋدارماسى دا كوپشىلىك نازارىنا ۇسىنىلدى.
كورمەنى تاماشالاۋشىلار جۇبان مولداعاليەۆ, اقۇشتاپ باقتىگەرەەۆا سەكىلدى باسقا دا اقىن-جازۋشىلاردىڭ تاڭداۋلى شىعارمالارىمەن تانىستى. كىتاپحانا ۇجىمى الدا تاعى دا بىرنەشە مەكەمەلەرگە بارىپ, ءدال وسىنداي شارالاردى قولعا الۋدى جوسپارلاۋدا. كورمەنى ۇيىمداستىرۋداعى ماقسات, حالىقتى جاپپاي كىتاپ وقۋعا شاقىرۋ, كىتاپحانالاردىڭ جۇمىسىن ناسيحاتتاپ, قوعامدا كىتاپ وقۋ مادەنيەتىن قالىپتاستىرۋ.