قىتايدان شىققان كوروناۆيرۋس اۋرۋى ەل ىشىندە ۇرەيمەن قاتار ءتۇرلى اڭگىمەلەردى دە تۋدىرۋدا. جامبىل وبلىسىندا دا وسى ۋاقىتقا دەيىن ءتۇرلى الەۋمەتتىك جەلىلەر ارقىلى شۋ اۋدانى تەمىرجولى ماڭىندا ارنايى كيىنگەن قىزمەتكەرلەردىڭ سۋرەتى تاراعان بولاتىن. سونىمەن قاتار جىبەرىلگەن حابارلامالاردا ءۇرىمجى قالاسىنان كەلگەن تسۋ جان حۋي ەسىمدى 1972 جىلى تۋعان ازاماتتىڭ مالىمەتتەرى جازىلعان ەدى. سوڭىنان شۋ اۋدانىنا قىتايلىق ازاماتتاردىڭ كەلگەنى, ولاردىڭ جەدەل رەسپيراتورلىق ۆيرۋستىق ينفەكتسيالار كۇدىگىمەن اۋرۋحاناعا جاتقىزىلعانى راستالدى.
قازىر جامبىل وبلىسىنىڭ شۋ اۋدانىنا كەلگەن قىتاي ازاماتتارى كوروناۆيرۋسقا تەكسەرىلۋ ۇستىندە. ابىروي بولعاندا شەتەلدىك ازاماتتار كوروناۆيرۋسقا شالدىقتى دەگەن حابار ناقتىلانعان جوق. بۇل رەتتە كوپشىلىكتىڭ دۇرلىگۋى نەگىزسىز. اتاپ ايتساق, شۋ قالاسىنىڭ تەمىرجول بەكەتىنەن 29 قاڭتار كۇنى تاڭعى ساعات 05:45 شاماسىندا 103 نومىرىنە ۆيرۋستى ينفەكتسيا جۇقتىرعان بولۋى مۇمكىن دەگەن ادامداردىڭ بار ەكەندىگى تۋرالى حابار تۇسكەن. ارتىنشا جامبىل وبلىستىق دەنساۋلىق ساقتاۋ باسقارماسىنىڭ قىزمەتكەرلەرى №86 «سارىاعاش-نۇر-سۇلتان» باعىتىنداعى پويىزدان قىتايلىق ەكى ازاماتتى ءتۇسىرىپ الىپ, شۋ اۋداندىق ورتالىق اۋرۋحاناسىنا جەتكىزگەن. ال جامبىل وبلىسى اكىمدىگىنىڭ مالىمەتىنشە, ولار اۋداندىق اۋرۋحانانىڭ جۇقپالى اۋرۋلار بولىمشەسىندە مەديتسينالىق باقىلاۋعا الىنىپ, جەدەل رەسپيراتورلىق ۆيرۋستىق ينفەكتسيالارى بار دەگەن دياگنوز قويىلعان. قىتايلىقتاردىڭ جاعدايلارى بۇگىندە بىرقالىپتى. ولاردىڭ دەنە قىزۋىنىڭ كوتەرىلۋى دە بايقالماعان. ەندى «سارىاعاش-نۇر-سۇلتان» باعىتىنداعى پويىزدىڭ سول ۆاگونىندا بولعان بۇل جولاۋشىلار 14 كۇن بويى دارىگەرلەردىڭ باقىلاۋىندا بولادى. بۇگىندە وبلىستىڭ مەديتسينالىق ورتالىقتارى مەن شۋ اۋدانىنىڭ مەديتسينالىق ۇيىمدارى جەكە قورعانۋ قۇرىلعىلارىمەن, دارىلىك پرەپاراتتارمەن, ءبىر رەت قولدانىلاتىن بەتپەردەلەرمەن جانە زالالسىزداندىرۋ قۇرالدارىمەن تولىق قامتاماسىز ەتىلگەن.
جامبىل وبلىسى