الماتىدا ءال-فارابي اتىنداعى قازاق ۇلتتىق ۋنيۆەرسيتەتىندە ءابۋ ناسىر ءال-ءفارابيدىڭ 1150 جىلدىق مەرەيتويى رەسمي تۇردە باستالدى. بيىل يۋنەسكو-نىڭ قولداۋىمەنحالىقارالىق اۋقىمدا اتالىپ وتەتىن عۇلامانىڭ مەرەيتويى الەمنىڭ 40-تان اسا ەلىنەن قوناقتاردىڭ باسىن قوستى.
سالتاناتتى جيىندا ءسوز العان مارتەبەلى قوناقتاردىڭ قاتارىندا قازاقستان, قىرعىزستان, تاجىكستان جانە وزبەكستان بويىنشا الماتىداعى يۋنەسكو-نىڭ كلاستەرلىك بيۋروسىنىڭ ديرەكتورى كريستا پيككات حانىم دا بولدى.
–مەن يۋنەسكو اتىنان سىزدەردى ءابۋ ناسىر ءال-ءفارابيدىڭ مەرەيتويىنا ارنالعان وسى ءىس-شارادا كورگەنىمە قۋانىشتىمىن.
1150 جىلدىق مەرەيتويدى يۋنەسكو-نىڭ جاھاندىق اتاۋلى كۇندەر تىزىمىنە ەنگىزىلۋى 2020 جىلعا سايكەس كەلۋىنە دۇنيەجۇزىلىك ءمان بەرىلەدى.
ءال-ءفارابيدىڭ ءومىرى مەن بىلىمگە ۇمتىلىسى, الەم جانە ءومىردىڭ ءمانىن ءتۇسىنۋدىڭ ۇلگىسى بولىپ تابىلادى.
عۇلاما عالىم ءبىلىم جولىندا كوپتەگەن قالالاردى باعداد, الەپپو, داماسكىدە بولدى.
ءال-فارابي ءوز ءومىرىن عىلىمعا ارناي وتىرىپ ءبىلىم, ونەر, استرونوميا, ماتەماتيكا جانە فيلوسوفيا سياقتى ءتۇرلى سالالاردا كوپتەگەن ەڭبەكتەر قالدىردى. ۇلى عالىمنىڭ دانالىق وي-پىكىرلەرى مەن رۋحاني دايەك سوزدەرى نەگىزىندە ادامدى تۇلعا رەتىندە تاربيەلەپ جانە شىنايى ادامي قۇندىلىقتاردى نىعايتۋعا بولادى. ۇلى ۇستازدىڭ دانالىعى بۇگىنگى كۇنى دە وزەكتى جانە ۇلكەن مانگە يە بولىپ وتىر.
عالىمنىڭ تراكتاتتارىن ءتۇسىنۋ بەلگىلى ءبىر دەڭگەيدى, ىشكى دايىندىق پەن سانالىلىقتى قاجەت ەتەدى.
سوندىقتان دا قازاقستاننىڭ الدىڭعى قاتارلى ۋنيۆەرسيتەتىنە ءال-فارابي اتى بەرىلگەنى كەزدەيسوق جاعداي ەمەس. بۇل وتە سيمۆوليكالىق ءىس, ويتكەنى ۋنيۆەرسيتەت ءوز قىزمەتىندە تانىم ماسەلەلەرىنە كوڭىل بولەدى, ادامنىڭ مۇمكىندىكتەرى مەن قابىلەتتەرىن اشۋعا جانە ۇمتىلىسىن دامىتۋعا ىقپال ەتەدى.
عالىمنىڭ اتى ۋنيۆەرسيتەتكە, وقىتۋشىلار مەن ستۋدەنتتەرگە ارنايى مارتەبە بەرەدى, سول سەبەپتى دە ۋنيۆەرسيتەت مەرەيتويلىق ءىس-شارالاردىڭ ۇيىمداستىرۋدىڭ نەگىزگى ورىنداۋشىسى بولىپ بەكىتىلدى.
سوندىقتان ۋنيۆەرسيتەتتىڭ بارلىق ۇجىمى مەن ستۋدەنتتەرىن العاشقى ءىس-شارا سالتاناتىمەن جانە ءال-فارابي ورتالىعىنىڭ اشىلۋىمەن قۇتتىقتاعىم كەلەدى. مەرەيتوي بارىسىندا جوسپارلانعان ءىس-شارالار باعدارلاماسىن جۇزەگە اسىرۋدا سىزدەرگە ۇلكەن تابىس تىلەيمىن!
ءال-ءفارابيدىڭ جاڭا ورتالىعىن قۇرۋ جانە ونىڭ جۇمىسى بۇۇ مەن يۋنەسكو ءۇشىن ۇلكەن ماڭىزعا يە.
ءال-ءفارابيدىڭ دۇنيەتانىمى مەن مۇراسى تۇراقتى دامۋ سالاسىنداعى جاڭا كۇن تارتىبىمەن, سونداي-اق يۋنەسكو-نىڭ باعدارلامالارى جانە ماقساتتارىمەن ۇندەس. سوندىقتان دا ورتالىق قازاقستاندا عانا ەمەس, ورتالىق ازيادا دا مادەنيارالىق ديالوگتى دامىتاتىن يۋنەسكو-نىڭ بەلسەندى سەرىكتەسىنە اينالۋى مۇمكىن.
ورتالىقتىڭ قىزمەتى يۋنەسكو-نىڭ جاستار اراسىندا عىلىمدى ىلگەرلەتۋگە, تۇراقتى دامۋدى جەتىلدىرۋگە قاجەت ءبىلىم مەن داعدىلاردى ىنتالاندىرۋعا, سونداي-اق الەم مادەنيەتىن دامىتۋدا جانە زورلىق-زومبىلىققا قارسى ءىس-ارەكەت ەتۋدە, مادەني ارتۇرلىلىك قۇندىلىقتارىن تانۋدا كومەك بەرە الادى, دەدى.