شىمكەنتتەگى اسكەري بولىمدەردىڭ ءبىرىنىڭ سەرجانتى بەيبىت تۇرعىنعا قاستاندىق جاسادى. قاسىنداعى سىبايلاسىمەن 25 جاستاعى بويجەتكەندى زورلاپ, سوڭىنان بۋىندىرىپ ولتىرگەن. 25 شىلدەنىڭ تۇنىندە ورىن العان قاندى وقيعانىڭ اق-قاراسىن قازىر تەرگەۋ انىقتاپ جاتىر. بۇل تۋرالى otyrar.kz حابارلادى.
ايتا كەتەيىك, بۇل جىل باسىنان بەرى وڭىردە اسكەريلەردىڭ قاتارداعى ازاماتتارعا قاتىستى جاسالعان جالعىز قىلمىس ەمەس.
25 جاسار ايەل ادامنىڭ ءمايىتى «شاپاعات-2» شاعىن اۋدانىنداعى شۇقىردان تابىلعان. ساراپتاما بويجەتكەننىڭ قىلقىندىرىپ ولتىرىلگەنىن انىقتاپ وتىر. ءولى دەنەنى وسى ماڭداعى تۇرعىننىڭ ءبىرى تاۋىپ, پوليتسياعا حابار بەرگەن.
اسكەري پروكۋراتۋرانىڭ مالىمەتىنشە, اتالعان شاعىناۋداننىڭ تۇرعىنى 1978 جىلى تۋعان يسلامحان شارافۋددين اۋماقتاعى №43 ۋپپ-ءنىڭ ينسپەكتورى پوليتسيا كاپيتانى و.الگيباەۆقا «شاپاعات-2» شاعىن اۋدانىنداعى سايدا ءمايىت جاتقانى تۋرالى حابارلاعان.
انىقتاۋ شارالارى بويجەتكەننىڭ ءومىرى باسقا جەردە قيىلعانىن كورسەتتى. اسكەري پروكۋراتۋرانىڭ مالىمەتىنشە, ولتىرەردىڭ الدىندا بويجەتكەن زورلانعان. وسى وقيعا بويىنشا قالاداعى اسكەري بولىمدەردىڭ ءبىرىنىڭ سەرجانتى قولعا ءتۇستى.
«اسكەري قىزمەتكەر 03-534 اسكەري ءبولىمىنىڭ كەلىسىم-شارت بويىنشا اسكەري قىزمەتكەرى. مىرزاعاليەۆ دەگەن. ول قازىرگى تاڭدا وسى ءىس بويىنشا كۇدىكتى رەتىندە. ول بۇل قىلمىستى سوكولەنكو دەگەن ازاماتپەن توپتالىپ جاساعان. قازىرگى تاڭدا 29-شىلدە 2013 جىلدىڭ ەڭبەكشى اۋداندىق سوتتىڭ شەشىمىمەن ولار قاماۋدا وتىر», - دەدى شىمكەنت گارنيزونى اسكەري پروكۋرىنىڭ ورىنباسارى ەسجان سىبانباەۆ.
بەلگىلى بولعانى, وقيعا شىلدەنىڭ 25-ىنەن 26-سىنا قاراعان ءتۇنى ورىن العان. كورشىسىمەن سەرىلىككە شىققان كەلىسىمشارت سەرجانتى 25 جاستاعى بويجەتكەنمەن تانىسادى. تانىستىق قايناربۇلاق ساياجايىندا جالعاسادى. قىلمىس تا سول جەردە ورىن العان. قىزىقتى كەش بارىسىندا ەل قورعايدى دەگەن سارباز قىز زورلايدى. قىلمىسىن جاسىرۋ ءۇشىن ونى ءولتىرىپ, ءمايىتتى قالانىڭ ەكىنشى شەتىنە اپارىپ تاستاعان. كۇدىكتى قىزمەت ەتەتىن 03-534 اسكەري ءبولىمىنىڭ باسشىلىعى قىزمەتكەرىنەن مۇنداي قاتىگەزدىكتى كۇتپەسە كەرەك. «توبەمىزدەن جاي تۇسكەندەي بولدى» دەپ وتىر.
«مەن ول جەردە نە بولعانىنان حابارسىزبىن. ءتىپتى ەشتەڭە تۇسىنەر ەمەسپىن. ءبىز ءۇشىن كۇتپەگەن اۋىر جاعداي بولدى بۇل. سەنەسىزدەر مە, ءبىزدىڭ ۇجىمدا سوڭعى 10 جىل ىشىندە ەشقانداي ءتارتىپ بۇزۋشىلىق ورىن الماعان. تاتۋ-ءتاتتى تۇرامىز, ماقتان تۇتاتىن ەدىم», - دەيدى سەرگەي پوپلاۆسكي, 03-534 اسكەري ءبولىمىنىڭ كومانديرى.
قازىر وسى وقيعا بويىنشا قىلمىستىق ءىس تەرگەلىپ جاتىر. سارباز بەن بىرگە ونىڭ كورشىسى دە — قاراپايىم ازامات تۇتقىنعا الىندى. ايتا كەتەيىك, وڭتۇستىك قازاقستان وبلىسىندا اسكەري قىلمىستار سانى 20 پايىزعا ازايعان. ەسەسىنە, ساربازداردىڭ قاراپايىم تۇرعىندارعا قاتىستى قىلمىسى 30 پايىزعا ارتىپ وتىر.
مۇرات ايتقوجا.