مەملەكەت باسشىسى قاسىم-جومارت توقاەۆ ديپلوماتيالىق قاتىناستار ورناعان 28 جىلدا نۇر-سۇلتان مەن ابۋ-دابي كوپقىرلى ىنتىماقتاستىقتى نىعايتىپ, مازمۇندى ءارى اشىق ساياسي ديالوگ ورناتقانىن ايتتى.
«ساۋدا-ەكونوميكالىق جانە مادەني-گۋمانيتارلىق بايلانىستارىمىز قارقىندى دامىپ كەلە جاتىر. ەكى ەل كاسىپكەرلەرى بەلسەندى جۇمىس ىستەۋدە. بۇگىنگى تاڭدا 350-گە جۋىق بىرلەسكەن كاسىپورىن قۇرىلدى. مىسالى, ەلوردامىز نۇر-سۇلتان قالاسىندا سالىنىپ جاتقان «ابۋ-دابي پلازا» كەشەنى وسىنداي تابىستى بايلانىستاردىڭ جارقىن كورىنىسى. ارينە, مۇنداي جەمىستى ىنتىماقتاستىق قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ جانە امىرلىكتەر پرەزيدەنتى, شەيح حاليفا جانە شەيح مۇحاممەد, ءسىزدىڭ اراڭىزداعى شىنايى دوستىق پەن باۋىرلاستىقتىڭ ارقاسىندا جۇزەگە استى», - دەدى قاسىم-جومارت توقاەۆ ابۋ-ءدابيدىڭ مۇراگەر حانزاداسى, شەيح مۇحاممەد بەن زايد ءال ناحايانمەن كەزدەسۋدە.
كەزدەسۋ سوڭىندا تاراپتار قول قويىلعان قۇجاتتارمەن الماستى. قر ەنەرگەتيكا مينيسترلىگى مەن ءباا ەنەرگەتيكا جانە ونەركاسىپ مينيسترلىگى اراسىندا مۇناي-حيميا ونەركاسىبى سالاسىنداعى ءوزارا تۇسىنىستىك پەن ىنتىماقتاستىق تۋرالى مەموراندۋمعا, قر ساۋدا جانە ينتەگراتسيا مينيسترلىگى مەن ءباا ەكونوميكا مينيسترلىگى اراسىنداعى ءوزارا تۇسىنىستىك تۋرالى مەموراندۋمعا, «استانا» حالىقارالىق قارجى ورتالىعىنىڭ قارجىلىق قىزمەت كورسەتۋدى رەتتەۋ جونىندەگى كوميتەتى مەن ءباا ورتالىق بانكى اراسىنداعى ءوزارا تۇسىنىستىك تۋرالى مەموراندۋمعا قول قويىلدى.