سوڭعى جىلدارى قىزىلوردا قالاسىنىڭ اۋقىمى ۇلعايىپ, كوشەلەر كەڭەيدى, ءتۇرلى عيماراتتار بوي كوتەردى. ەڭ باستىسى, قالا تازارا ءتۇستى. ايتپەسە, جەل كوتەرىلسە كوشەدەگى قاعاز بەن تسەللوفان كوكتەگى قۇستارمەن جارىسا جالپىلداي ۇشىپ, كەلگەن قوناقتار الدىندا كوزىمىزبەن جەر شۇقىعان ساتتەرىمىز از بولماعان. قازىر سىرتتان كەلگەندەردىڭ كوپشىلىگى قىزىلوردانى قازاقستانداعى ەڭ تازا قالالار قاتارىنا قوسادى. بۇل ارينە, وبلىس پەن قالا باسشىلىعىنىڭ, ءتيىستى قۇرىلىمدار ەڭبەگىنىڭ جەمىسى.
دەگەنمەن وسى يگىلىكتىڭ ءبارىن قالالىقتار تەگىس كورىپ وتىرماعانىن ايتا كەتۋ كەرەك. اسىرەسە تەمىر جولدىڭ ارعى بەتىندەگى اۋماق تۇرعىندارى ءۇشىن ءتۇرلى دەمالىس ورىندارى مەن سپورتتىق نىسانداردىڭ سالىنۋى ورىندالۋى قيىن ارمانعا اينالىپ وتىر. قازىر قالا تۇرعىندارىنىڭ سانى 300 مىڭنىڭ ۇستىنە شىقسا, سونىڭ 30 مىڭعا جۋىعى وسى اۋداندا تۇرادى. ەل اۋزىندا شانحاي اتالىپ كەتكەن اۋداندا ورتا ءبىلىم بەرەتىن 4 مەكتەپ بار. سولاردىڭ ءىرىسى № 222 ورتا مەكتەپ. اتشاپتىرىم اۋلانىڭ ءبىر شەتىندە بالالار تارتىلاتىن تەمىردەن باسقا سپورتتىق قۇرىلعى اتىمەن جوق. مەكتەپ ديرەكتورى ماقسۇت مۇكەەۆ بۇل كوپتىڭ كوكەيىندەگى ماسەلەگە اينالعانىن ايتادى. ءبىلىم وشاعىنداعى سپورت زالى تىم تار. قىستىڭ كۇندەرى باستاۋىش سىنىپ وقۋشىلارى دەنەشىنىقتىرۋ ءپانىن مەكتەپ دالىزىندە وتكىزەدى. جەر قارا, كۇن جىلىنىڭ وزىندە دە بالا ءۇشىن بوي سەرگىتىپ, وينايتىن الاڭ جوق.
مەكتەپ ماڭايىندا تۇراتىن تۇرعىندارمەن دە تىلدەستىك. ولاردىڭ كوپشىلىگى بالالارىن ءبىر مەزگىل ويناتۋ ءۇشىن قالا ورتالىعىنا اپاراتىنىن ايتادى.
– ءبىز №222 مەكتەپتىڭ جانىندا تۇرامىز. بالالارىم دا وسى ءبىلىم وشاعىندا وقىدى, قازىر نەمەرەلەرىم بارىپ ءجۇر. ماڭايىمىزدا بالالاردى جان-جاقتى دامىتاتىن مادەني, سپورتتىق, وقۋ-ساۋىقتىرۋ كەشەندەرى, بالالارعا ارنالعان ويىن الاڭدارى, جاتتىعۋ الاڭدارى اتىمەن جوق. ءبارى قالانىڭ ورتالىعىندا ورنالاسقان. بالالارىمىزدى جەتەكتەپ, ورتالىققا اپارىپ ويناتامىز. قالانىڭ ءبىر شەتىنەن ەكىنشى شەتىنە قوعامدىق كولىكپەن جەتۋدىڭ قيىندىعىن وسىندا تۇراتىن اركىم-اق بىلەر. كەيدە اپتالاپ ۇيدەن شىقپايتىن كەزدەرى بولادى. مەكتەپتىڭ اۋلاسىندا بالا قىزىعاتىن ەشتەڭە جوق, سوسىن باسقا دۇنيەگە الاڭداپ, ءبىر بالەگە ۇشىراپ قالار دەپ قاۋىپتەنەمىز. ومىرلىك تاجىريبەمنەن بىلەمىن, ويىنى قانباعان بالادان ويلى ازامات شىعا قويادى دەۋ قيىن. مەنىڭ جانە كورشىلەرىمنىڭ تىلەگى – №222 مەكتەپتىڭ اۋلاسىنان سپورت كەشەنىن, شاعىن فۋتبول, جاتتىعۋ جانە بالالار وينايتىن الاڭدار سالىپ بەرسە, – دەيدى زەينەتكەر ءاليا رشىمبەت.
وسى اۋداننىڭ تاعى ءبىر تۇرعىنى گۇلجانات شاكيەۆا دە تەلەفونعا تەلمىرگەن بالالاردىڭ كوڭىلىن اۋلايتىن ورىن جوق ەكەنىن قىنجىلا ايتىپ وتىر.
بۇل اۋماقتا سپورتتىق نىسانداردان جالعىز ءجالاڭتوس ءباھادۇر اتىنداعى وليمپيادالىق رەزەرۆتىڭ وبلىستىق مامانداندىرىلعان مەكتەپ-ينتەرناتى عانا بار. بىراق بۇل مەكتەپتە بولاشاق سپورتشىلار عانا جاتتىعادى.
وسى اۋدانداعى № 212, 253 جانە 43-مەكتەپتەر اۋلاسىنان دا كوزگە تۇسەر ەشتەڭە تابا المادىق.
ماسەلەگە وراي قالالىق تۇرعىن ءۇي-كوممۋنالدىق شارۋاشىلىعى, جولاۋشىلار كولىگى, اۆتوموبيل جولدارى جانە تۇرعىن ءۇي ينسپەكتسياسى بولىمىنە جولىقتىق. ءبولىم باسشىسىنىڭ ورىنباسارى ابزال رىسبەك سول اۋدانداعى كوپقاباتتى ۇيلەر اۋلاسىنان ەكى سپورتتىق الاڭ سالىنعانىن ايتادى. جاقىن ماڭداعى مەكتەپتەر كۇتىپ ۇستايدى دەگەن ويمەن ونى قالالىق ءبىلىم ءبولىمىنىڭ بالانسىنا وتكىزىپتى. بىراق دۇرىس باقىلاۋ بولماعاندىقتان توزعان الاڭداردى جاقىندا قايتادان ءوز قاراۋلارىنا العان. قازىر قالا بويىنشا وسىنداي 152 الاڭ بار, بىلتىر ولاردى ۇستاپ تۇرۋ ءۇشىن بيۋدجەتتەن 16 ملن تەڭگە بولىنگەن.
– مەكتەپتەر اۋلاسىنا الاڭ سالۋ قالالىق ءبىلىم ءبولىمىنىڭ مىندەتى. ال جالپى اۋدانعا كەلسەك, سپورتتىق, ويىن الاڭدارى ءۇشىن بوس جاتقان جەر تەلىمى قاجەت. سالىنا قالعان كۇننىڭ وزىندە دە ونى ءبىر مەكەمە ءوز قاراۋىنا الىپ, الاڭ جاعدايىن ۇنەمى باقىلاپ وتىرۋى كەرەك, – دەيدى ءبولىم باسشىسىنىڭ ورىنباسارى.
«ارعى بەتتەن سالىندى» دەگەن الاڭداردى دا بارىپ كوردىك. ەكەۋىنىڭ دە قورشاعان تورى سەتىنەپ, بالا وينايتىنداي جاعدايى قالماعان ەكەن. تايمانوۆ كوشەسىندەگى الاڭعا بالا جىبەرمەك تۇگىلى, جانىنان جۇرگىزۋگە بولمايدى. قيسايىپ تۇرعان قابىرعاسى قۇلاسا, استىندا قالارى انىق.
ايتپاقشى, قالا اكىمدىگىنىڭ وكىلى بۇل ماسەلەنىڭ اۋماق تۇرعىندارىمەن بىرلەسە وتىرىپ شەشىلۋى مۇمكىن ەكەنىن ايتىپ قالدى. بىزگە وسى ءسوز ءوز اۋدانىنان بالا وينايتىن الاقانداي الاڭ تاپپاعان تۇرعىنداردىڭ ءۇمىتىن وياتاتىنداي كورىنىپ تۇر.
قىزىلوردا