قازاق ۇلتتىق قىزدار پەداگوگيكالىق ۋنيۆەرسيتەتىندە ابايتانۋ كۋرسى ەنگىزىلدى. بۇگىندە وقۋ ورنىنىڭ ستۋدەنتتەرىنە ابايتانۋدىڭ باستاۋلارى, اقىننىڭ ءومىرى مەن شىعارماشىلىق جولى وقىتىلىپ جاتىر. بۇل تۋرالى ۋنيۆەرسيتەتتىڭ ءباسپاسوز قىزمەتىنىڭ جەتەكشىسى جاندار اسان حابارلادى.
بۇعان دەيىن قىزدار ۋنيۆەرسيتەتىنىڭ قازاق فيلولوگياسى جانە الەم تىلدەرى فاكۋلتەتىنىڭ بىلىمگەرلەرىنە زاكي احمەتوۆ, تۇرسىنبەك كاكىشەۆ, مەكەمتاس مىرزاحمەت ۇلى سىندى عالىمدار ابايتانۋ كۋرسىن جۇرگىزگەن بولاتىن. ال بىلتىرعى وقۋ جىلىنان باستاپ ول بارلىق فاكۋلتەتتەردە وقىتىلا باستادى.
بولاشاق پەداگوگتار كۋرس بارىسىندا ابايتانۋ ماسەلەلەرىنىڭ دامۋ باعىتتارىمەن, ونىڭ اقىندىق مەكتەبىمەن جانە حاكىمنىڭ «تولىق ادام» فيلوسوفياسىمەن تانىسادى.
وسى ورايدا قىزدار ۋنيۆەرسيتەتىنىڭ پروفەسسورى, فيلولوگيا عىلىمدارىنىڭ دوكتورى رۋدا زايكەنوۆانىڭ «ابايتانۋ» اتتى وقۋلىعى دا جارىق كوردى.
كىتاپتا اقىننىڭ شىعىس, باتىس جانە ورىس ادەبيەتتەرىمەن بايلانىسى, عۇلاما ويشىلدىڭ عىلىم, ءبىلىم, ونەر, ەل بيلەۋ, تاريح, ماحاببات, ءدىني تانىم تاقىرىبىندا جانە سىنشىلدىق كوزقاراستا جازىلعان فيلوسوفيالىق قاراسوزدەرىنىڭ, ولەڭدەرىنىڭ, پوەمالارىنىڭ, اۋدارمالارىنىڭ ءمان-ماعىناسى مەن ماڭىزى كەڭىنەن تۇسىندىرىلگەن.
– شىنايى تالانت – ىلۋدە بىرەۋدىڭ عانا ماڭدايىنا جازىلاتىن ءتاڭىردىڭ سىيى. وسى تۇرعىدان الىپ قاراعاندا, XIX عاسىردىڭ ەكىنشى جارتىسىندا كيىز تۋىرلىقتى شاڭىراق استىنان قاراپ-اق, الەمدىك دەڭگەيدە شەبەرلىك ناقىش تۋعىزىپ, ورەلى وي ايتقان قازاق حالقىنىڭ ۇلى اقىنى, حاكىم اباي دانالىعىنا جاڭا زامان بيىگىنەن قاراپ, كوڭىل اۋدارۋدىڭ ماڭىزى زور. اباي – عالامدىق تۇلعا. ابايتانۋدىڭ باستاۋى XX عاسىردىڭ باس كەزىندەگى الاش ارىستارى مەن سول تۇستا ءومىر سۇرگەن وقىمىستىلاردىڭ تانىم-بىلىگىنەن باستالادى. قۇنانباي ۇلىنىڭ دانالىعىن جەتە مەڭگەرۋ ارقىلى بۇكىلالەمدىك گۋمانيستىك جانە ۇلتتىق ولشەمدەردىڭ ادام تۇلعاسىن قالىپتاستىرۋداعى ورنىن باعامداپ, ءومىردى جانە ادامزات قۇپياسىن تانۋعا بولادى, – دەيدى وقۋلىق اۆتورى, پروفەسسور رۋدا زايكەنوۆا.