امەريكانىڭ ماسساچۋسەتس شتاتى تۇرعىندارى ەرلى-زايىپتى ليندا مەن دجوزەف مەيوتتقا قازاقستاننان اسىراپ الىنعان ەكى بالانى زورلاۋ ارەكەتىنە بايلانىستى 26 تارماق بويىنشا ايىپ تاعىلىپ وتىر. بۇل تۋرالى «Lifenews.ru» حابارلادى.
جۇبايلارعا قارسى تەرگەۋ جۇمىستارى 2009 جىلى باستالدى. جاپا شەككەن بالالاردىڭ ايتۋلارى بويىنشا, ولاردىڭ وكىل اتا-انالارى تاراپىنان ازعىرۋشىلىق ارەكەتتەر قىزدىڭ 8, ال اعاسىنىڭ 13 جاسقا تولعان كەزىنەن باستالىپتى.
قازىر 21 جاسقا تولىپ وتىرعان جىگىت 49 جاستاعى وكىل اناسىنىڭ ءوزىن توسەككە تارتىپ, ازعىرۋ ارەكەتتەرىنە باراتىنىن ايتادى. «مەن سول كەزدەرى نە ويلاپ, نە ىستەرىمدى بىلمەي قالاتىنمىن. مەنى قارىنداسىمنان اجىراتىپ, قايتادان قازاقستانداعى جەتىمدەر ۇيىنە جىبەرەدى دەپ قورىققاننان, ۇزاق ۋاقىت بۇل سۇمدىق تۋرالى ءتىس جارماي ءجۇردىم», – دەپ مالىمدەدى ول 29 شىلدەدە وتكەن سوت وتىرىسىنىڭ تىڭدالۋىندا.
ليندانىڭ كۇيەۋى 50 جاسار دجوزەف تە اسىراندى قىزىن ءوز توسەگىنە الىپ جاتىپ, ءجابىر كورسەتكەن كورىنەدى. الايدا, 2010 جىلى ەرلى-زايىپتىلاردى كىناسىز دەپ تانىپ, ولاردى 25 مىڭ دوللار كەپىلدىكپەن بوساتىپ جىبەرگەن ەكەن.
ءۇش جىلدان سوڭ ءىستى قايتا قاراۋ قولعا الىندى. تەرگەۋ جۇمىستارى بارىسىندا تاعى ءبىر سۇمدىقتىڭ بەتى اشىلدى. ليندا مەيوتت دۇنيەگە اكەلگەن ءسابيدىڭ بيولوگيالىق اكەسى ونىڭ اسىراپ العان بالاسى بولىپ شىقتى.
ايىپ تاعىلىپ وتىرعان اتا-انالار وزدەرىنىڭ تاراپىنان ەشبىر زورلاۋ ارەكەتتەرى بولماعانىن ايتىپ اقتالۋدا. ال ولاردىڭ قورعاۋشىلارى جاپا شەككەن بالا ءوز اناسىن زورلاعان دەگەن پىكىردى العا تارتادى. قورعاۋشىلاردىڭ ايتۋىنا قاراعاندا, دجوزەف مەيوتت اسىراندى قىزدىڭ قاراڭعىدان قورقاتىنىنا بايلانىستى ونى وزىمەن بىرگە الىپ جاتقان كورىنەدى.
ايدار ورىسباەۆ.