ابايدىڭ 175 جىلدىعىنا وراي پرەزيدەنتىمىز قاسىم-جومارت توقاەۆتىڭ «Egemen Qazaqstan» گازەتىنە بەرگەن ماقالاسىنان ۇلى تۇلعاعا ەرەكشە كوڭىل بولىنەتىنىن كورىپ, قۋاندىق. بۇل ءبىزدى, قالامگەرلەردى قۋانتادى, تولعانتادى.
ويتكەنى قالامگەر قاۋىم ەل ءۇشىن ەڭ قيىن كەزەڭدەردە دە «الدىمەن مادەنيەت كەرەك, سانا كەرەك!» دەپ ايتۋدان جاڭىلعان جوق. كەرەك دەسەڭىز, بۇل ناسيحاتتىڭ باسىندا ۇلى ابايدىڭ ءوزى, وعان دەيىنگى ويشىلدار تۇر. دانا ابايدىڭ ءوزى ارسىزدىق, ساناسىزدىق جارلىلىقتان دا جامان ەكەندىگىن «قارا سوزدەرىندە» كوپ ايتتى. كەيىنگى قالامگەرلەر تالاي قايتالادى. ءبىز كوپتەن كۇتكەن تاۋەلسىزدىگىمىز قولعا تيگەندە: «وسى ەگەمەندىكتى نىعايتۋ رۋحاني بايلىقپەن قاتار ءجۇرسىن!» - دەپ ارمانداعانبىز, رۋحاني بايلىق السىرەگەندە قينالعانبىز. ءبىز, بىراق, كەشەگى قايتا قۇرۋدىڭ قيىندىعىنا شىداپ شىقتىق. ويتكەنى ءبىز ابايدى وقىدىق!
ءيا, ءبىز ابايدى وقىپ وسكەن ۇرپاقپىز. ءبىز ابايدى جاتتاپ وستىك. ارينە, ءبىز وقىعان مەكتەپتىڭ تالابى باسقا بولدى. ءبىزدىڭ ۇرپاقتىڭ ءوزى ابايدىڭ ايتقانىن ومىردە تولىق ىسكە اسىرا المادى. سەبەبى ادىلەتتىڭ جولى ارقاشان قيىن. ول كۇرەسپەن كەلەدى. بۇل بىزگە وڭايعا تۇسكەن جوق.
اباي بىزگە الدىمەن ادامنىڭ جان-دۇنيەسىن وڭالتۋ ءۇشىن كەرەك.
مەن قازىرگى وسكەلەڭ جاستارعا – قازاقستاننىڭ كەلەشەگىن كەمەل ەتەم دەگەن جاستارعا: ابايدى وقىڭدارشى, كۇن سايىن جۇمىسقا باراردا ابايدىڭ كىتابىنان ءبىر دانا ءسوزدى وقىپ شىعىڭدارشى!» دەيمىن. مىسالى, اباي ايتقان بەس اسىل ءىس پەن بەس دۇشپاننىڭ ءوزى ويلانعان ادامعا قوعامدى تازارتار سۇزگى بولار ەدى-اۋ!؟
ءبىز بۇگىن ەڭ قىمبات ەگەمەندىكتى يەلەندىك. وسى ەگەمەندىكتى ساقتاۋ, نىعايتۋعا دا ابايدىڭ ناقىل سوزدەرى كومەكتەسەتىن بولادى. سوندىقتان پرەزيدەنتتىڭ ابايعا كوڭىل بولگەنى قالامگەر رەتىندە مەنى قاتتى قۋانتادى. ۇلى دالانىڭ بولاشاعىنا ابايدى وقۋ – وتە كەرەك ءىس! مەنىڭشە, ابايدى بىلمەگەن قازاق ءوزىن ساۋاتسىزبىن, اقىلسىزبىن, مادەنيەتسىزبىن دەپ ساناۋى كەرەك.
اقۇشتاپ باقتىگەرەەۆا,
اقىن, مەملەكەتتىك سىيلىقتىڭ لاۋرەاتى
باتىس قازاقستان