مەملەكەت باسشىسى قاسىم-جومارت توقاەۆ «Egemen Qazaqstan» گازەتىنىڭ بۇگىنگى سانىندا جارىق كورگەن «اباي جانە XXI عاسىرداعى قازاقستان» اتتى ماقالاسىندا ۇلى ويشىل قارا سوزدەرىنىڭ بىرىندە دارىپتەگەن ءتىل ۇيرەنۋدىڭ يگىلىگىنە توقتالا كەلە, انا ءتىلدىڭ مارتەبەسىن ارتتىرۋ كەرەكتىگىن العا تارتادى.
«اباي ايرىقشا دارىپتەگەن يگىلىكتى ءىستىڭ ءبىرى – ءتىل ۇيرەنۋ. اقىن جيىرما بەسىنشى قارا سوزىندە وزگە ءتىلدىڭ ادامعا نە بەرەتىنىنە توقتالىپ: «اربىرەۋدىڭ ءتىلىن, ونەرىن بىلگەن كىسى ونىمەنەن بىردەيلىك داعۋاسىنا كىرەدى, اسا ارسىزدانا جالىنبايدى», – دەيدى. دەمەك, وزىمىزدەن وزىق تۇرعان جۇرتپەن دەڭگەيلەس بولۋ ءۇشىن دە ونىڭ ءتىلىن مەڭگەرۋدىڭ ماڭىزى زور» دەلىنگەن پرەزيدەنت ماقالاسىندا.
ق. توقاەۆ جاس ۇرپاق وزگە ءتىلدى جەتىك مەڭگەرىپ, ءوز ءتىلىن قۇرمەتتەسە ۇلت يگىلىگىنىڭ ارتاتىنىنا سەنىم ءبىلدىردى.
«ال قازىرگىدەي جاڭا تاريحي جاعدايدا ءبارىمىز انا ءتىلىمىزدىڭ دامۋى مەن دارىپتەلۋىنە نازار اۋدارىپ, ونىڭ مارتەبەسىن ارتتىرۋىمىز كەرەك. سونىمەن قاتار اعىلشىن ءتىلىن ۇيرەنۋگە دە باسىمدىق بەرۋ قاجەت. جاستارىمىز نەعۇرلىم كوپ ءتىلدى مەڭگەرسە, سوعۇرلىم مۇمكىندىگى كەڭەيەدى. بىراق ولاردىڭ انا ءتىلىن بىلۋىنە باسا ءمان بەرگەن ءجون. وسكەلەڭ ۇرپاق, اباي ايتقانداي, عىلىمدى تولىق يگەرسە, ءوز ءتىلىن قۇرمەتتەسە ءارى شىن مانىندە پوليگلوت بولسا, ۇلتىمىزعا تەك يگىلىك اكەلەرى ءسوزسىز» دەپ جازدى پرەزيدەنت.
سونداي-اق ماقالادا ءتىل ۇيرەنۋمەن قاتار, جاھاندانۋ زامانىندا سانانىڭ اشىقتىعىن قامتاماسىز ەتۋدىڭ ماڭىزدىلىعى ايتىلعان.
«قازىر الەم كۇن سايىن ەمەس, ساعات سايىن وزگەرۋدە. بارلىق سالادا جاڭا مىندەتتەر مەن تىڭ تالاپتار قويىلۋدا. عىلىمداعى جاڭالىقتار ادامدى العا جەتەلەيدى. اقىل-ويمەن عانا وزاتىن كەزەڭ كەلدى. زامان كوشىنە ىلەسىپ, ىلگەرى جىلجۋ ءۇشىن ءبىز سانانىڭ اشىقتىعىن قامتاماسىز ەتۋىمىز كەرەك. بۇل قادام وركەنيەتتىڭ وزىق تۇستارىن ۇلتتىق مۇددەمەن ۇيلەستىرە ءبىلۋدى تالاپ ەتەدى. مۇنداي كەزدە ءوزىمىزدىڭ تاپتاۋرىن, جاداعاي ادەتتەرىمىزدەن باس تارتۋىمىز قاجەت» دەگەن جولدار مەملەكەت باسشىسىنىڭ ماقالاسىندا كەزدەسەدى.