قازاقستان رەسپۋبليكاسى ۇكىمەتىنىڭ قاۋلىسىمەن مارات راحمالى ۇلى نۇرعوجين باسقا جۇمىسقا اۋىسۋىنا بايلانىستى تسيفرلىق دامۋ, يننوۆاتسيالار جانە اەروعارىش ونەركاسىبى ۆيتسە-ءمينيسترى قىزمەتىنەن بوساتىلدى. بۇل تۋرالى پرەمەر-ءمينيستردىڭ ءباسپاسوز قىزمەتى حابارلادى.
مارات نۇرعوجين 1957 جىلى اقمولا وبلىسىندا دۇنيەگە كەلگەن. ن. باۋمان اتىنداعى ماسكەۋ جوعارى تەحنيكالىق ۋچيليششەسىن تامامداعان. ەڭبەك جولىن 1980 جىلى باستاعان.
ءتۇرلى جىلدارى قاراعاندى پوليتەحنيكالىق ينستيتۋتىندا, قاراعاندى مەملەكەتتىك تەحنيكالىق ۋنيۆەرسيتەتىندە, ءبىلىم جانە عىلىم مينيسترلىگىندە, «سامعاۋ» ۇلتتىق عىلىمي-تەحنيكالىق حولدينگى» اق-دا, «قازاقستان عارىش ساپارى» ۇلتتىق كومپانياسى» اق-دا جۇمىس ىستەدى.
2016-2017 جىلدارى — قورعانىس جانە اەروعارىش ونەركاسىبى ۆيتسە-ءمينيسترى.
2019 جىلعى ساۋىردەن باستاپ قازىرگى تاڭعا دەيىن تسيفرلىق دامۋ, يننوۆاتسيالار جانە اەروعارىش ونەركاسىبى ۆيتسە-ءمينيسترى لاۋازىمىن اتقاردى.