اقمولا وبلىسىنىڭ اكىمى ەرمەك مارجىقپاەۆ تسەلينوگراد اۋدانىنا جۇمىس ساپارىمەن باردى. ءوڭىر باسشىسى ەلوردا ماڭىنداعى ەلدىمەكەندەردەگى مەكتەپ, اۋرۋحانالار مەن دارىگەرلىك امبۋلاتوريالاردىڭ قۇرىلىسىنا توقتالىپ, قارقىندى ءوسىپ كەلە جاتقان اۋىلداردىڭ الداعى دامۋ جوسپارىن تالدادى.
قاراوتكەل اۋىلىنداعى №6 ورتا مەكتەپتە سىنىپ جەتىسپەۋشىلىگى ورىن الۋدا. ءبىلىم وشاعى 350 وقۋشىعا لايىقتالىپ سالىنعان بولسا, بۇگىنگى تاڭدا وقۋشىلاردىڭ سانى ەكى ەسە كوپ.
– قازىر مۇندا 720 بالا وقىپ, ءبىلىم الۋدا. كەيدە سىنىپ جەتىسپەگەننەن كىتاپحانانىڭ وقۋ زالىندا ساباق وتكىزەمىز, – دەيدى مەكتەپ ديرەكتورى ايتان احمەت.
قاراوتكەلدە 90 شاقىرىم اۋىل ىشىلىك جول بولسا, ونىڭ 10 شاقىرىمىنا اسفالت, 27 شاقىرىمىنا قۇمقايراق توسەلىپتى. قىستا قار باسىپ, جازدا شاڭى بۇرقىراپ جاتاتىن 60 شاقىرىم جولدى تالاپقا ساي سالۋ جوسپارلانۋدا. سونداي-اق, اۋىلدى جارىقپەن جانە اۋىزسۋمەن قامتۋ ماسەلەلەرىنە دە تۇبەگەيلى وزگەرىستەر ەنگىزىلمەك.
– الەۋمەتتىك سالاعا 4 ميلليارد تەڭگە ءبولىندى. 4 جاڭا مەكتەپ سالىنادى, بىرقاتار ءبىلىم وشاقتارىنا جوندەۋ جۇمىستارى جۇرگىزىلەدى. اۋىز سۋمەن قامتۋعا 3 جارىم ميلليارد تەڭگە ءبولىندى. 6 جارىم ميلليارد تەڭگە جول قۇرىلىسىنا باعىتتالدى. اۋداننىڭ جالپى بيۋدجەتى 20 ميلليارد تەڭگەگە جۋىق. حالىق سانىنىڭ كۇرت وسۋىمەن الەۋمەتتىك نىساندارعا سۇرانىس ارتاتىنى بەلگىلى. وعان ءتيىستى قاراجات ءبولىنىپ تە جاتىر, – دەيدى وبلىس اكىمى ەرمەك مارجىقپاەۆ.
قالىپتاسىپ وتىرعان جاي دارىگەرلىك امبۋلاتوريا ماماندارىنا دا سالماق سالىپ وتىر. دەمەك, ەكىنشى مەديتسينالىق نىسان سالۋ دا قاجەت. سالعىرتتىقتان سان سوققان ەلدى مەكەندەردىڭ ءبىرى – ورازاق اۋىلى. بۇل اۋىلدا دا ءبىلىم وشاعىندا, الەۋمەتتىك-تۇرمىستىق مەكەمەلەردىڭ قىزمەتىندە دە تۇرعىنداردىڭ كوبەيۋىنە بايلانىستى شەشىمىن كۇتكەن ماسەلەلەر از ەمەس.