قازاقستانداعى اۆستريا ەلشىلىگىنىڭ ساۋدا ءبولىمى اۆستريالىق شاراپ ماركەتينگى كەڭەسىمەن (AWMB) بىرگە جاڭا جىل قارساڭىندا الماتىدا اۆستريالىق شاراپتاردىڭ ۇزدىك ۇلگىلەرىنىڭ دەگۋستاتسياسىن وتكىزدى. ءىس-شارانى وتكىزۋگە ءجۇزىمنىڭ رەكوردتىق ءونىمىن العان اۆستريالىق شاراپ جاساۋشىلاردىڭ وتكەن جىلعى ۇلكەن جەتىستىگى سەبەپ بولدى. جينالعان ونىمنەن اۆستريالىق تۇتىنۋشىلارعا جانە باسقا ەلدەرگە ەكسپورتقا جىبەرىلگەن جوعارى ساپالى شاراپ سانى رەكوردتىق كورسەتكىشكە جەتتى.
وسىلايشا 2018 جىلى اۆستريادان شاراپ ەكسپورتى بۇرىنعى رەكوردتى جاڭارتتى. ەكسپورتقا 170,3 ملن ەۋرو سوماسىنا 52,6 ملن ليتر شاراپ جىبەرىلدى. وتكەن جىلمەن سالىستىرعاندا ەكسپورتقا شاراپ ءوندىرۋ كولەمىنىڭ ءوسۋى 10,5%-دى قۇرادى, سونداي-اق اينالىم 6,9% ءوستى. ەكسپورتتىق شاراپتىڭ جارتىسىنا جۋىعى كورشىلەس گەرمانياعا ساتىلدى, شامامەن 12%-ى شۆەيتساريا مەن ليحتەنشتەين ەكسپورتىن قۇرادى, اۆستريالىق شاراپتىڭ 8,5%-ى اقش-قا جىبەرىلدى, 6,4%-ى نيدەرلاندىعا جانە 3,1%-ى ۇلىبريتانياعا جونەلتىلدى. قازاقستاندىق سومەلەنىڭ پىكىرى بويىنشا, اۆستريا شاراپتارى ءبىزدىڭ ەلىمىزدە ءساندى بولىپ كەلەدى – ولار بارلىق شاراپ بۋتيكتەرىندە كەزدەسەدى, ءتۇرلى تانىمال مەيرامحانالار ولاردى شاراپ كارتاسىنا قوسىپ وتىر.
– ءبىز اۆستريادا جەرگىلىكتى شاراپ جاساۋشىلاردىڭ جەتىستىكتەرىن ماقتان تۇتامىز. ىشكى ءوندىرىستىڭ وزىندە 15 جىل ىشىندە شاراپ سالاسى اۆستريالىق ەكسپورتتىڭ ماڭىزدى تارماقتارىنىڭ بىرىنە دەيىن ءوستى, ول اۆستريالىق مۋزىكا جانە ينجەنەرلىك عىلىممەن تانىمالدىعى بويىنشا باسەكەلەسەدى. اۆستريالىق شاراپتاردىڭ ەڭ ۇزدىك ۇلگىلەرى بۇگىندە بۇكىل الەم بويىنشا, سونىڭ ىشىندە قازاقستاندا دا كورسەتىلگەنىنە قۋانىشتىمىن,- دەيدى قازاقستانداعى اۆستريا ەلشىلىگى ساۋدا ءبولىمىنىڭ باسشىسى رۋدولف تالەر.