مامانداردىڭ ەسەبى بويىنشا جىل باسىنان بەرى 4,5 مىڭنان استام توننا تۇرمىستىق قاتتى قالدىق جينالىپ, وڭدەلگەن.
وبلىستا قوقىستى كادەگە جاراتۋمەن 20 شاقتى كاسىپورىن اينالىسادى. سولاردىڭ ءبىرى «LS Petropavlovsk» سەرىكتەستىگى وبلىس ورتالىعىندا قايتالاما شيكىزات قابىلدايتىن ارنايى ورىن اشتى. كاسىپورىن تۇرعىنداردان كەز كەلگەن تۇرمىستىق قالدىقتاردى قابىلدايدى. اسىرەسە, پوليەتيلەن, شىنى, كارتون, پلاستيكالىق بوتەلكەلەرگە سۇرانىس جوعارى. قابىلداۋ بەكەتىنە كۇنىنە 10 توننادان استام ءتۇرلى قالدىق زاتتار جەتكىزىلەدى.
«قالا بويىنشا قايتالاما شيكىزاتتى قابىلداۋعا ارنالعان 5 پۋنكت جۇمىس ىستەيدى. بۇل – ءبىز ءۇشىن دە, تۇرعىندار ءۇشىن دە وتە ىڭعايلى. قالدىق زاتتاردى سۇرىپتاپ, قايتادان كادەگە جاراتۋ ءىسى الدەقايدا جەڭىلدەدى» دەيدى جشس ديرەكتورىنىڭ ورىنباسارى ۆيكتوريا رەدكينا.
كاسىپورىن جۋىردا «Green Park Kokshetau» سەرىكتەستىگىمەن ارىپتەستىك بايلانىس ورناتىپ, پلاستيكالىق بوتەلكەلەردى قايتا وڭدەۋمەن شۇعىلدانادى. دايىن شيكىزات قازاقستاننىڭ وزگە وڭىرلەرىمەن بىرگە رەسەيگە دە جونەلتىلەدى. تسەح ءبىر اۋىسىمدا 10 توننا تىعىزدالعان بوتەلكەنى قايتا وڭدەۋگە قاۋقارلى.
سەرىكتەستىك جەتەكشىسى يۆان يۆانيچكيننىڭ ايتۋىنشا جۇمىس ەكى اۋىسىمدا ۇيىمداستىرىلعان. ايىنا 300 تونناعا دايىن ءونىم شىعارۋ مۇمكىندىگى قاراستىرىلعان.
دەرەكتەرگە سۇيەنسەك, قازاقستاندا جىلىنا 5-6 ملن توننا قاتتى تۇرمىستىق قالدىق جينالىپ, 11 پايىزى عانا وڭدەلەتىن كورىنەدى. 2030 جىلعا قاراي ونىڭ ۇلەسىن 40 پايىزعا دەيىن ارتتىرۋ مىندەتى تۇر.
سولتۇستىك قازاقستان وبلىسى