«قازاقستان - دالا مەن تاۋلار رۋحى» كورمەسى قازاقستانداعى كاسىبي كوركەمونەر مەكتەبىنىڭ دامۋىن 30-جىلدارداعى رەاليستىك جۇيەدەن باستاپ, 1990-2000 جىلدارداعى ءداستۇرلى, سيمۆولدىق جانە پوەتيكالىق ونەر تۇرلەرىنە دەيىن بايقاۋعا مۇمكىندىك بەرەدى.
كورەرمەندەر ءار ءتۇرلى سۋرەتشىلەردىڭ تۋىندىلارىن تاماشالاي الادى. ۇلتتىق كەسكىندەمە مەكتەبىنىڭ نەگىزىن قالاعان قازاقستاننىڭ العاشقى كاسىبي سۋرەتشىلەرى وزدەرىنىڭ تالانتىن 1920-1930 جىلدارى كورسەتتى. ولاردىڭ شىعارمالارىنىڭ نەگىزگى تاقىرىپتارى - رەۆوليۋتسيالىق وزگەرىستەر ءداۋىرى, جاڭا الەمنىڭ قالىپتاسۋى, حالىقتىڭ تاريحى. ەكسپوزيتسيانىڭ نەگىزگى بولىگىندە اعا بۋىنعا جاتاتىن سۋرەتشىلەردىڭ جۇمىستارى قويىلادى. ءابىلحان قاستەەۆتىڭ «الماتىنىڭ جاڭا عيماراتتارى», «مەدەۋ مۇز ايدىنى», اۋباكىر يسمايلوۆتىڭ «بەس-شاتىر», قانافيا تەلجانوۆتىڭ «كومپوزيتور س.مۇحامەدجانوۆتىڭ پورترەتى», مولداحمەت كەنباەۆتىڭ «الما-اتا ماڭىنداعى تاۋلار», ۇلى وتان سوعىسى جىلدارىنداعى كوپتەگەن ايگىلى قازاق سۋرەتشىلەرىنىڭ العاشقى ۇستازى - ا.م. چەركاسسكيدىڭ «كوكنار» اتتى تۋىندىسى ۇسىنىلعان.
ەكسپوزيتسيادا مۋزەي قورىندا سونىمەن بىرگە كورنەكتى قازاقستاندىق كەسكىندەمە شەبەرلەرى ايشا عالىمباەۆا, گۇلفايرۋس يسمايلوۆا, ساليحيتدين ايتباەۆ, جاناتاي شاردەنوۆ, ساحي رومانوۆ, ابدراشيت سىدىحانوۆ, توقبولات توعىسباەۆ, قانافيا تەلجانوۆ, باحتيار تابيەۆ, اري شكولنىي, اسقار ەسداۋلەت, سونىمەن قاتار وزبەك سۋرەتشىلەرى ورال تانسىقباەۆ , باحتيور باباەۆ, ۆلاديمير بۋرماكيننىڭ تۋىندىلارى قويىلادى.
سونداي-اق ايشا گاليمباەۆا مەن گۇلفايرۋس يسمايلوۆانىڭ كوپقىرلى جانە ءاردايىم تانىلاتىن تۋىندىلارى كورەرمەندى قىزىقتىراتىن بولادى. يمپروۆيزاتسيا شابىتىنىڭ شىڭىندا سومدالعان جاناتاي شاردەنوۆتىڭ پەيزاجدارى نەمەسە ابدراشيت سىدىحانوۆتىڭ كەسكىندەمە بەلگىلەرى كورەرمەنگە قازاقستانداعى كەسكىندەمە ونەرىنىڭ تاريحىنداعى جاڭا, كۇتپەگەن قۇبىلىستاردى اشادى.
«قازاقستان - دالا مەن تاۋلار رۋحى» كورمەسىندە ۇسىنىلعان ءار سۋرەتشى مەن ولاردىڭ جۇمىستارى ءوزىنىڭ شىعارماشىلىق ەرەكشەلىگىمەن تانىمال دەپ ايتۋعا بولادى.