پارلامەنت سەناتى كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتىنىڭ كەڭەيتىلگەن وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قىلمىستىق, قىلمىستىق-پروتسەستىك زاڭنامانى جەتىلدىرۋ جانە جەكە ادام قۇقىقتارىنىڭ قورعالۋىن كۇشەيتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى قارالدى. بۇل تۋرالى پارلامەنت سەناتىنىڭ ءباسپاسوز قىزمەتى حابارلادى.
زاڭ جوباسى قولدانىستاعى قىلمىستىق جانە قىلمىستىق ءىس جۇرگىزۋ زاڭنامانى ودان ءارى جەتىلدىرۋ, سونداي-اق قازاقستان رەسپۋبليكاسى پرەزيدەنتىنىڭ جەكەلەگەن قىلمىس قۇرامى بويىنشا تاپسىرمالارىن ىسكە اسىرۋ ماقساتىندا ازىرلەنگەن بولاتىن.
زاڭ جوباسىندا بىرقاتار زاڭنامالىق اكتىلەرگە وزگەرىستەر مەن تولىقتىرۋلار ەنگىزۋ كوزدەلىپ وتىر.
قۇجات قازاقستان رەسپۋبليكاسىنىڭ قىلمىستىق كودەكسىنە, قازاقستان رەسپۋبليكاسىنىڭ قىلمىستىق ءىس جۇرگىزۋ كودەكسىنە جانە «جەدەل-ىزدەستىرۋ قىزمەتى تۋرالى» زاڭعا زورلاۋ جانە ناپسىقۇمارلىق سيپاتتاعى كۇش قولدانۋ ارەكەتتەرىنىڭ بارلىق قۇرامى (ونىڭ ىشىندە قىزمەتتىك مىندەتتەرىن ورىنداۋ كەزىندە), بالالارعا جىنىستىق زورلىق-زومبىلىق فاكتىلەرى بويىنشا دالەلدەمەلەردى بۇرمالاعانى, سونداي-اق جاسىرعانى جانە ولار تۋرالى حابارلاماعانى ءۇشىن جاۋاپكەرشىلىكتى كۇشەيتۋ تۋرالى; ءۇي-جايعا, قويماعا نەمەسە كولىك قۇرالىنا كىرىپ جاسالعان ۇرلىق, توناۋ جانە قاراقشىلىق; زاڭسىز ەسىرتكى اينالىمى ءۇشىن ەلەكتروندىق اقپاراتتىق رەسۋرستاردى پايدالانعانى ءۇشىن جاۋاپكەرشىلىكتى ەنگىزۋ تۋرالى; مال ۇرلىعى بويىنشا جەكە قۇرامدى ەنگىزۋ تۋرالى; زاڭسىز اڭ اۋلاۋدى قىلمىستىق تەرىس قىلىقتان ورتاشا اۋىرلىقتاعى قىلمىستارعا اۋىستىرۋ تۋرالى, براكونەرلىكتىڭ اۋىرلاتاتىن قۇرامدارى ءۇشىن (ونىڭ ىشىندە اقبوكەندەر بويىنشا) جانە زورلىق-زومبىلىق قولدانعانى ءۇشىن, سونداي-اق جانۋارلار دۇنيەسىن قورعاۋ جونىندەگى مەملەكەتتىك ينسپەكتوردىڭ ومىرىنە قاتەر توندىرگەنى ءۇشىن جاۋاپكەرشىلىكتى كۇشەيتۋ تۋرالى تۇزەتۋلەرمەن تولىقتىرىلاتىن بولادى.
سونىمەن قاتار ودان ءارى ىزگىلەندىرۋ جانە رەپرەسسيۆتىلىكتى تومەندەتۋ بولىگىنە, اتاپ ايتقاندا, م ۇلىكتى تاركىلەۋدى تاعايىنداۋ جانە شارتتى جازا تاعايىنداۋ كەزىندە, سونداي-اق كەپىلدىككە بايلانىستى جازادان بوساتۋ كەزىندە كەپىل مولشەرىن تومەندەتۋ بويىنشا تۇزەتۋلەر ۇسىنىلادى.
سونداي-اق قىلمىستىق-اتقارۋ زاڭناماسىنا جازانى ورىنداۋ جۇيەسىن ودان ءارى ىزگىلەندىرۋگە باعىتتالعان تۇزەتۋلەر دە ۇسىنىلادى.
زاڭ جوباسىندا «نولدىك توزىمدىلىكتى» كۇشەيتۋگە, سونداي-اق قىلمىستىق جانە قىلمىستىق ءىس جۇرگىزۋ زاڭىنىڭ ەرەجەلەرىن ءىس جۇزىندە قولدانۋدىڭ ولقىلىقتارىن, كولليزيالارىن جانە ءارتۇرلى وقىلۋىن جويۋعا باعىتتالعان تۇزەتۋلەر كوزدەلىپ وتىر.
بۇدان باسقا, «نەكە (ەرلى-زايىپتىلىق) جانە وتباسى تۋرالى» قازاقستان رەسپۋبليكاسىنىڭ كودەكسىنە جەتىم بالالار مەن اتا-اناسىنىڭ قامقورلىعىنسىز قالعان بالالاردى قازاقستان ازاماتتارىنىڭ وتباسىلارىنا ورنالاستىرۋعا جاردەم كورسەتۋ جونىندەگى ۇيىمداردىڭ قىزمەتىن, ولاردى تىركەۋ ءتارتىبىن, تىركەۋدەن باس تارتۋ نەگىزدەرىن, وسى ۇيىمداردىڭ قۇقىقتارى مەن مىندەتتەرىن رەتتەيتىن تۇزەتۋلەر ەنگىزىلەدى.
زاڭ جوباسى پالاتانىڭ قاراۋىنا بەرىلدى.