«2020 – 2022 جىلدارعا ارنالعان رەسپۋبليكالىق بيۋدجەت تۋرالى» زاڭعا سايكەس قازاقستاندا 2020 جىلعى 1 قاڭتاردان باستاپ زەينەتاقى, الەۋمەتتىك تولەمدەر جانە جاردەماقىلار ارتتىرىلاتىن بولادى. بۇل تۋرالى ەڭبەك جانە الەۋمەتتىك قورعاۋ مينيسترلىگىنىڭ ءباسپاسوز قىزمەتى حابارلادى.
ەڭ تومەنگى جالاقى مولشەرى بۇرىنعى دەڭگەيدە قالادى جانە 42 500 تەڭگەنى قۇرايدى.
ەڭ تومەنگى كۇنكورىس دەڭگەيى 1500 تەڭگەگە ارتىپ, 31 183 تەڭگەنى قۇرايدى.
2020 جىلعى 1 قاڭتاردان باستاپ ىنتىماقتى زەينەتاقى 7% - عا ارتتىرىلادى, بۇل رەتتە ونىڭ ەڭ تومەنگى مولشەرى 38 636 تەڭگەنى قۇرايدى. مەملەكەتتىك بازالىق زەينەتاقى تولەمى 5 %- عا ۇلعايادى, ونىڭ ەڭ تومەنگى مولشەرى 16 839 تەڭگەنى قۇرايدى.
مۇگەدەكتىك بويىنشا مەملەكەتتىك الەۋمەتتىك جاردەماقىلاردىڭ مولشەرى كۇنكورىس دەڭگەيىنىڭ مولشەرىنە, مۇگەدەكتىكتىڭ توبى مەن سەبەبىنە, اسىراۋشىسىنان ايىرىلعان جاعدايدا - اسىراۋىنداعى ادامدار سانىنا جانە ءتيىستى قارجى جىلىنا ارنالعان رەسپۋبليكالىق بيۋدجەت تۋرالى زاڭدا بەلگىلەنگەن ەڭ تومەنگى كۇنكورىس دەڭگەيىنىڭ مولشەرىنە بايلانىستى بولادى.
ماسەلەن, 2020 جىلعى 1 قاڭتاردان باستاپ مۇگەدەكتىگى بويىنشا, اسىراۋشىسىنان ايىرىلۋ جاعدايى بويىنشا مەملەكەتتىك الەۋمەتتىك جاردەماقىلاردىڭ مولشەرى ەڭ تومەنگى كۇنكورىس دەڭگەيىنىڭ وزگەرۋىنە بايلانىستى 5% - عا ارتتىرىلاتىن بولادى.
مىسالعا, كەلەسى جىلدان باستاپ جالپى اۋرۋدان مۇگەدەكتىككە بەرىلەتىن مەملەكەتتىك الەۋمەتتىك جاردەماقى مولشەرى مۇگەدەكتىك توبىنا بايلانىستى 32 431 تەڭگەدەن 59 872 تەڭگەگە دەيىن بولادى.
اسىراۋشىسىنان ايرىلعاندارعا بەرىلەتىن جاردەماقى اسىراۋىنداعى ادامدار سانىنا بايلانىستى 26 818 تەڭگەدەن 65797 تەڭگەگە دەيىن بولادى. سونىمەن بىرگە جەتىم بالالارعا ارقايسىسى ءۇشىن 36 796 تەڭگەدەن بەرىلەدى, بىراق وتباسىنىڭ بارلىق مۇگەدەك مۇشەلەرى ءۇشىن 79 829 تەڭگەدەن اسپايدى.
بالا تۋىنا بايلانىستى بىرجولعى جاردەماقى كوبەيەدى: ءبىرىنشى, ەكىنشى جانە ءۇشىنشى بالاعا - 100 776 تەڭگەگە دەيىن (38 اەك), ءتورتىنشىسى ءۇشىن - 167 076 تەڭگەگە دەيىن (63 اەك). جۇمىس ىستەمەيتىن ايەلدەر ءۇشىن ءبىر جاسقا دەيىنگى بالانى كۇتۋگە اي سايىنعى جەڭىلدىكتەر: ءبىرىنشى بالاعا - 15 276 تەڭگە (5,76 اەك), ەكىنشى بالاعا - 18 061 تەڭگە (6,81 اەك), ءۇشىنشى بالاعا - 20 819 تەڭگە (7,85 اەك), ءتورتىنشى جانە ودان كەيىنگى بالالارعا - 23 603 تەڭگە (8,9 اەك).
«التىن القا», «كۇمىس القا» القالارىمەن ماراپاتتالعان نەمەسە بۇرىن «باتىر انا» اتاعىن العان, I جانە II دارەجەلى «انا داڭقى» وردەندەرىمەن ناگرادتالعان كوپبالالى انالارعا تولەنەتىن اي سايىنعى مەملەكەتتىك جاردەماقى تابىسىنا قاراماستان تولەنەدى, مولشەرى 16 973 تەڭگەنى قۇرايدى.
مۇگەدەك بالانى كامەلەتتىك جاسقا دەيىن تاربيەلەپ وتىرعان اناسىنا نەمەسە اكەسىنە, اسىراپ الۋشىسىنا, قامقورشىسىنا (قورعانشىسىنا) تاعايىندالعان جانە تولەنەتىن جاردەماقى مولشەرى 2020 جىلعى 1 قاڭتاردان باستاپ 43 657 تەڭگەنى قۇرايدى (1,4 ەتكد). وسىنداي مولشەردە بالا كەزىنەن ءبىرىنشى توپتاعى مۇگەدەك بالانى كۇتۋ بويىنشا جاردەماقى تولەنەدى.
12 جەلتوقساندا سەنات «مىندەتتى الەۋمەتتىك ساقتاندىرۋ تۋرالى» جانە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە دەنساۋلىق ساقتاۋ سالاسىنداعى مىندەتتى الەۋمەتتىك ساقتاندىرۋ, الەۋمەتتىك قامسىزداندىرۋ جانە مەملەكەتتىك-جەكە سەرىكتەستىك ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭداردى قابىلدادى.
ءبىرىنشى زاڭدا ەڭبەك ەتۋ قابىلەتىنەن ايىرىلۋ, اسىراۋشىسىنان ايىرىلۋ جانە جۇمىسىنان ايىرىلۋ بويىنشا الەۋمەتتىك تولەمدەردى تاعايىنداۋ كەزىندە پايدالانىلاتىن پارامەترلەردى وزگەرتۋ كوزدەلگەن. بۇل تولەمدى ورتاشا ەسەپپەن 30% - عا ارتتىرۋعا مۇمكىندىك بەرەدى.
مىسالى, بۇرىن 100 مىڭ تەڭگە مولشەرىندە ورتاشا ايلىق تابىسى جانە الەۋمەتتىك ساقتاندىرۋ جۇيەسىنە قاتىسۋ ءوتىلى 5 جىلدان استام بولعان جۇمىسىنان ايىرىلعان ادام ءۇشىن تولەم سوماسى 30 000 تەڭگەدەن 41 600 تەڭگەگە دەيىن وسەدى.
ەكىنشى زاڭ 4 جانە ودان دا كوپ كامەلەتكە تولماعان بالالارى بار نەمەسە 23 جاسقا دەيىنگى كۇندىزگى وقۋ بولىمىندە وقيتىن ستۋدەنتتەرى بار وتباسىلارعا جاڭا مەملەكەتتىك جاردەماقى ەنگىزۋدى كوزدەيدى. بۇل جاردەماقى وتباسىنىڭ تابىسىنا قاراماستان سارالانعان مولشەردە تاعايىندالادى: 4 بالاعا - 42 496 تەڭگە; 5 بالاعا – 53 127 تەڭگە; 6 بالاعا - 63 757 تەڭگە; 7 جانە ودان دا كوپ بالاعا – 74 388 تەڭگە.