سارسەنبىنىڭ ءساتتى كۇنى اقتوبە ايماعىندا تاعى ءبىر ءىرى ينۆەستيتسيالىق جوبانىڭ تۇساۋى كەسىلدى. بۇعان دەيىن وڭىردە قوماقتى ينۆەستيتسيالىق قاراجات نەگىزىنەن وبلىس ورتالىعى مەن ونىڭ ماڭايىنا تارتىلىپ كەلسە بۇل جولى ينۆەستيتسيا اعىسى اۋدانعا قاراي باعىتتالدى. ءسويتىپ يتالياندىق «Eni» كومپانياسى قارعالى اۋدانىندا جەل ەلەكتر ستانساسىنىڭ ءبىرىنشى كەزەڭىن ىسكە قوستى.
ايتا كەتەرلىك ماسەلە اتالعان اۋماقتى نىسان ەكولوگيالىق تۇرعىدان تازا ەلەكتر ەنەرگياسىن وندىرەدى. وسى تۇرعىدا اقتوبە وبلىسىندا ەل وڭىرلەرى اراسىندا ەشقانداي بالاماسى جوق قانات قاقتى جوبانىڭ العاشقى كەزەڭى ويداعىداي جۇزەگە استى. بۇل ينۆەستيتسيالىق قۇرىلىم وبلىس ەكونوميكاسىنىڭ الەۋەتىن ودان ءارى نىعايتۋعا ءوز سەپتىگىن تيگىزە الادى, دەدى گازەت تىلشىسىنە اتاعان جوباعا قولداۋ كورسەتكەن «Kazakh invest» ۇق اق باسقارماسى توراعاسىنىڭ ورىنباسارى ءبىرجان كانەشەۆ.
جاڭارتىلعان ەنەرگيا كوزدەرى ساپىنداعى تۇڭعىش ءارى قاناتقاقتى جوبا ەلىمىزدىڭ «جاسىل ەكونوميكاعا» كوشۋى جونىندەگى العاشقى ءىرى قادامداردىڭ ءبىرى بولىپ وتىر. تۇڭعىش پرەزيدەنت – ەلباسى ن.ءا.نازارباەۆپەن مەملەكەت باسشىسى قاسىم-جومارت توقاەۆ, جوعارى جانە جەرگىلىكتى اتقارۋشى ورگانداردىڭ الدىنا قويعان مىندەت تە وسى دەسەك اقتوبەدە اشىلعان جوبانىڭ قۇندىلىعى ودان ءارى ارتا تۇسەدى.
جەل ەلەكتر ستانساسىنىڭ جىلدىق قۋاتتىلىعى 48 MBt تەڭ بولسا, ونىڭ جالپى قۇنى 33 ميلليارد تەڭگەنى قۇرايدى. جاڭا نىسان شيرەك عاسىر ىشىندە ءار جىل سايىن 200 گۆت-عا جۋىق ەلەكتر قۋاتىن وندىرەدى دەپ كۇتىلۋدە. ءبىر سوزبەن ايتقاندا ستانسا جيىرما مىڭ ادامدى جارىق كوزىمەن قامتاماسىز ەتۋگە مۇمكىندىك بەرەدى. ياعني مۇنىڭ ءوزى تۇتاستاي قارعالى اۋدانى تۇرعىندارى مەن مۇنداعى وندىرىستىك جانە شارۋاشىلىق نىسانداردى ەلەكتر ەنەرگياسىمەن تولىقتاي قامتۋعا جەتەدى دەگەن ءسوز. الداعى 2020 جىلى جەل ەلەكتر ستانساسىنىڭ ەكىنشى كەزەڭى دە اياقتالىپ, اتالعان بىرەگەي نىسان تولىق قۋاتىندا ىسكە قوسىلماق.
ءبىز شەتەلدىك ينۆەستورلارعا بيزنەس جۇرگىزۋگە قاجەتتى بارلىق جاعدايلاردى تۋعىزۋ ءۇشىن بارلىق مۇمكىندىكتەردى قاراستىرىپ كەلەمىز. وسى ۇمتىلىسىمىزدىڭ ناتيجەلەرى دە جوق ەمەس. مۇنىڭ جارقىن مىسالدارىنىڭ ءبىرى يتاليالق «Eni» كومپانياسىنىڭ وڭىردە جاساعان قارقىندى ءىس-قيمىلى دەۋگە بولادى. ولاردىڭ جوباعا ءجۇز ميلليون دوللاردان استام قوماقتى ينۆەستيتسيالق قاراجات سالۋى جەرگىلىكتى اتقارۋشى ورگاندار تاراپىنان جاسالعان قولداۋدىڭ ءبىر كورىنىسى بولماق دەپ تۇيىندەدى ءوز ويىن قۋاتىن جەلدەن الاتىن ستانسانىڭ اشىلۋ ءراسىمى كەزىندە اقتوبە وبلىسىنىڭ اكىمى وڭداسىن ورازالين.
ءتۇيىپ ايتقاندا جاعىمدى ينۆەستيتسيالىق احۋال وڭىردە ەكونوميكانىڭ باسىم سەكتورلارىنا ينۆەستيتسيانىڭ جاڭا تولقىنىن تارتۋعا العىشارت قالاپ وتىر.