قىزىلورداداعى «سلاۆيانە» قوعامدىق بىرلەستىگىنىڭ ۇيىمداستىرۋىمەن ۇلى وتان سوعىسى جىلدارىندا قازا تاپقان جاۋىنگەرلەر جەرلەنگەن باۋىرلاستار زيراتىندا ميتينگ بولىپ ءوتتى. وعان «قوعامدىق كەلىسىم» كمم ديرەكتورىنىڭ ورىنباسارى اسىلبەك جۇماباەۆ, قالالىق ىشكى ساياسات ءبولىمىنىڭ باسشىسى رۋسلان كايۋپوۆ پەن ي.ۆ. پانفيلوۆ اتىنداعى №5 مەكتەپ ليتسەيىنىڭ ديرەكتورى التىن ءىزباسوۆا, ەتنومادەني بىرلەستىكتىڭ جەتەكشىلەرى مەن مۇشەلەرى, قالالىق اسكەري كوميسساريات وكىلدەرى, ارداگەرلەر كەڭەسىنىڭ مۇشەلەرى, اۋعان جاۋىنگەرلەرى, قالا جاستارى قاتىستى.
بىرلەستىك جەتەكشىسى گالينا ششەرباكوۆا شارانىڭ ماڭىزى تۋرالى ايتىپ ءوتتى.
- رەسەي فەدەراتسياسىنىڭ قورعانىس مينيسترلىگى كەلەر جىلى اتاپ وتىلەتىن ۇلى جەڭىستىڭ 75 جىلدىعى اياسىندا وتان ءۇشىن جانىن قيعان جاۋىنگەرلەر رۋحىنا ارنالعان «ەسكە الۋ جولى» جوباسىن باستادى. جوبا اياسىندا رەسەي فەدەراتسياسىنداعى «پاتريوت» مەموريالدىق كەشەنىنە مايداندا قازا تاپقان سولداتتار جەرلەنگەن زيراتتاردان جينالعان توپىراق سالتاناتتى تۇردە تابىستالادى. وسىعان وراي رەسەي فەدەراتسياسىنىڭ الماتى قالاسىنداعى باس كونسۋلدىعى باستاماسىمەن باۋىرلاستار زيراتىنا جينالىپ تۇرمىز, - دەدى.
ميتينگ اياسىندا №5 مەكتەپ ليتسەيىنىڭ وقۋشىلارى شاعىن ادەبي-مۋزىكالىق قويىلىم قويىپ, ەل قورعاعان اتالارىنىڭ رۋحىنا قۇرمەت تانىتتى. كەڭەس وداعىنىڭ باتىرى ي.ۆ. پانفيلوۆ ەسىمىن يەلەنگەن بۇل وقۋ ورداسى ىنتىماق پەن بىرلىكتى ناسيحاتتاۋ باعىتىندا «سلاۆيانە» ورتالىعىمەن تىعىز بايلانىستا جۇمىس جاسايدى. وسى جىلى مەكتەپ باسشىلىعى رەسەي كۇنىن مەرەكەلەۋگە بايلانىستى الماتىنىڭ باس كونسۋلدىعىنداعى سالتاناتتى قابىلداۋعا دا شاقىرىلدى.
باۋىرلاستار زيراتىنان الىنعان توپىراق ارنايى رەيسپەن ماسكەۋگە جونەلتىلەتىن بولادى.