تۇركىستانداعى ماعجان جۇماباەۆ اتىنداعى№15 مەكتەپتىڭ مۇعالىمىن «اجەتحانا كۇزەتپەگەنى ءۇشىن» ۇستاپ اكەتكەن قالالىق پوليتسيا باسقارماسىنىڭ باستىعى دانيار مەيىرحان ۇستازدان كەشىرىم سۇرادى. بۇل تۋرالى قالا اكىمى راشيد ايۋپوۆ ءوزىنىڭ Facebook پاراقشاسىندا جازدى.
«تۇركىستانداعى №15 مەكتەپتە ورىن العان جاعداي بارشامىزدى الاڭداتتى. بۇل جاعدايدى ءوز باقىلاۋىما الىپ, ءمان-جايىن انىقتادىق. كەلەڭسىز جاعدايلار ورىن الىپ جاتادى. بىراق, ۇستازدىڭ ورنى بولەك, ءاردايىم بەدەلى بيىك. بالالارعا ءبىلىم بەرەتىن جاندار قاشان دا ءبىزدىڭ قولداۋىمىز بەن قامقورىمىزعا جۇگىنە الاتىنىنا سەنىمدى بولۋى ءتيىس. قالالىق ىشكى ىستەر ءبولىمىنىڭ باستىعىمەن بىرگە ۇستاز الدىنا باردىق. ۇستاز ۇيىندە پوليتسيا باسشىسى كەشىرىم سۇرادى, ۇستاز كەشىرىمىن بەردى. مۇنداي جاعدايلار قايتالانباس ءۇشىن بارلىق شارالار جاسالاتىنىن حابارلايمىز» دەپ جازدى اكىم.
وقيعا قالاي وربىگەن ەدى؟ 31 جىلدىق ەڭبەك ءوتىلى بار ۇستاز باقىت كەۋكەنوۆتى قالالىق پوليتسيا باسقارماسىنىڭ باستىعى, پوليتسيا پودپولكوۆنيگى دانيار مەيىرحان باستاعان ءبىر توپ پوليتسەي ۇستاپ اكەتكەن ەدى. مەكتەپ ديرەكتورى ك. ابدىقادىروۆانىڭ جازۋىنشا, مۇعالىم اياق كيىمىنەن سۋ وتكەن سوڭ, سونى اۋىستىرۋ ءۇشىن مەكتەپ عيماراتىنا كىرگەن. الايدا پوليتسەيلەر قارسىلىق كورسەتكەنىنە قاراماستان ۇستازدىڭ قولىن قايىرىپ, بولىمشەگە الىپ كەتكەن كورىنەدى. بۇل جاعدايدى سول جەردەن ءوتىپ بارا جاتقان ۇستازدار مەن وقۋشىلار كورگەن. پوليتسيا بولعان وقيعا بويىنشا ارنايى حاتتاما تولتىرىپ, ايىپپۇل راسىمدەپ, تولەتكەن. كەيىن بۇل جاعدايدى ەستىگەن ءبىلىم جانە عىلىم ءمينيسترى اسحات ايماعامبەتوۆ مۇعالىمگە اراشا ءتۇستى.
«تۇركىستان قالاسىنداعى №15 مەكتەپتىڭ مۇعالىمىنە قاتىستى بولعان وقيعاعا ۇقساس جاعدايعا مۇلدەم جول بەرىلمەۋى ءتيىس. ءبىلىم جانە عىلىم مينيسترلىگى تاراپىنان بۇل مۇعالىمدى قورعاۋ بويىنشا بارلىق قاجەتتى شارالار قابىلداناتىن بولادى. سونداي-اق, اتالعان وقيعاعا قاتىسى بار ادامداردى جاۋاپكەرشىلىككە تارتۋدى تالاپ ەتەتىن بولامىز. ونىڭ ىشىندە, مەكتەپ اكىمشىلىگى مەن ءبىلىم بولىمىنە دە قاتىستى. بالالاردىڭ قاۋىپسىزدىگىن قامتاماسىز ەتۋ - ىڭعايلى جانە قاۋىپسىز جاعداي جاساۋ ارقىلى جۇزەگە اسىرىلۋى ءتيىس دەپ سانايمىن. ەگەر وسىنداي فاكتىلەر قايتالاناتىن بولسا, قاتاڭ شارالار قولدانىلادى. ورىن العان جاعدايدىڭ سەبەپتەرىن جان-جاقتى ءتۇسىنۋ ءۇشىن مۇعالىممەن تەلەفون ارقىلى سويلەستىم. جاعداي مەنىڭ جەكە باقىلاۋىمدا», - دەپ جازدى مينيستر.